Pagbubukas ng face-to-face classes, gawin kahit paunti-unti

ni Kuya Win Gatchalian - @Win Tayong Lahat | November 17, 2020

Kung unti-unti na nating binubuksan ang mga negosyo habang may pandemya, dapat na ring pahintulutan na magkaroon ng limitadong face-to-face classes ang mga mag-aaral.

Bilang Chairman ng Senate Committee on Basic Education, Arts and Culture, isinusulong ng inyong lingkod ang pagkakaroon ng ‘purok workshops’ sa mga tinatawag na ‘low-risk areas’ o mga lugar na wala o kakaunti ang kaso ng COVID-19.

Kapag sinabi nating ‘purok workshops’ ay tutungo ang mga ‘roving teachers’ o learning support aides sa mga purok upang magturo sa maliit na grupo ng mga mag-aaral na hindi lalagpas sa sampu. Ngunit siyempre, kailangan pa ring panatilihin ang health protocols tulad ng social distancing, pagsusuot ng mask at palaging paghuhugas ng mga kamay o paggamit ng alcohol.

Itong modelo ng ating panukala ay tinatawag na ‘learning pods’ na naging popular sa Estados Unidos kung saan tinitipon ang maliit na grupo ng mga mag-aaral para magkaroon ng physical social interaction ang mga bata at mahikayat silang mag-aral sa kabila ng pandemya. Binuo ang learning pods dahil maraming magulang na nagsasabing nahihirapang mag-adjust ang kanilang mga anak sa distance learning.

Hindi kaila na malaki pa ring hamon ngayon ang internet connection sa pagpapatupad ng distance learning kahit sa mga lugar kung saan dapat sana maayos o malakas ang signal ng internet, halimbawa sa mga siyudad. Ngunit kahit na maaaring gumamit ang mga mag-aaral ng self-learning modules ay may mga komplikadong subject na kinakailangan ang pisikal na paggabay ng kanilang guro.

Kung susuriin ang mapa ng COVID-19 tracker ng University of the Philippines noong Nobyembre 7, hindi lalagpas sa 500 munisipalidad ang walang aktibong kaso ng COVID-19.

Isa ring halimbawa ang Bangsamoro Autonomous Region in Muslim Mindanao (BARMM) kung saan iniulat ni Bangsamoro Minister of Basic, Higher and Technical Education Mohagher Iqbal sa isang pagdinig sa Senado na 20 porsiyento lamang ng rehiyon ang may internet connection. Base naman sa datos ng Department of Health (DOH) noong Nobyembre 10, may 501 lamang ang aktibong kaso ng COVID-19 sa buong rehiyon.

Dahil sa ganitong estado, pinaniniwalaang sa mga lugar na wala namang kaso ng COVID-19 ay malaki ang maitutulong ng mga purok workshops upang magabayan nang husto ng mga guro ang kanilang mga mag-aaral.

Sa kabila ng malaking hamong kinahaharap ng sektor ng edukasyon sa bansa lalo na’t marami pa rin sa atin ang naninibago sa sistemang ito, mahalagang makahanap tayo ng mga epektibong paraan para mas mahikayat natin ang mga bata na mag-aral habang pinag-iingat ang lahat laban sa pandemya.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Teaching Supplies Allowance sa mga guro, pasado na!

ni Kuya Win Gatchalian - @Win Tayong Lahat | November 12, 2020

Pasado na sa Senado ang panukalang-batas na taasan ang teaching supplies allowance ng mga guro.

Sa ilalim ng Senate Bill No. 1092 o ang Teaching Supplies Allowance Act of 2020, kung saan isa ang inyong lingkod sa mga may akda, unti-unting itataas ang kasalukuyang P3,500 na natatanggap ng mga guro mula sa susunod na taon hanggang sa 2025.

Para sa S.Y. 2021-2022 at S.Y. 2022-2023, ang teaching supplies allowance na matatanggap ng bawat guro ay magiging P5,000. Aakyat ang halagang ito sa P7,500 para sa S.Y. 2023-2024 hanggang sa maging P10,000 sa S.Y. 2024-2025 at sa mga susunod na taon.

Sa ilalim ng panukala, magiging bahagi na rin ang allowance na ito ng mga guro sa taunang budget ng Department of Education (DepEd).

Bago pa kumalat ang COVID-19 sa bansa, ipinanukala na ng inyong lingkod ang pagtaas ng teaching supplies allowance sa P5,000. Pero dahil malaking hamon ang pagpapatupad ng distance learning sa panahon ng pandemya, nararapat lamang na taasan pa ang naturang halaga. Sa ilalim ng panukalang-batas, maaaring gamitin ang allowance para matustusan ang pagbili ng gamit para sa iba’t ibang learning modalities.

Marami tayong narinig na mga kuwento na mismong guro ang gumagastos para makabili ng ilang gamit nila sa pagtuturo. Lumala pa ang suliraning ito noong magsimula ang pandemya, halimbawa na lang ang pagbili ng load para sa kanilang internet connection. Panahon na para matapos ang ganitong sitwasyon.

Malaking sakripisyo sa oras, gastusin at kalusugan ang ibinubuhos ng guro kapalit ng kanyang tungkulin sa pagtuturo.

Sa ating pagtugon sa mga hamon ng pandemya at sa pagbangon ng sektor ng edukasyon, nararapat lamang na ibigay natin ang lahat ng suporta para na rin sa kapakanan ng mga estudyanteng kanilang tinuturuan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Medical allowance ng mga guro, dapat ilaan sa 2021 budget

ni Kuya Win Gatchalian - @Win Tayong Lahat | November 10, 2020

Sa kabila ng patuloy na banta ng COVID-19 sa kalusugan at kaligtasan ng lahat, kailangan nating siguruhing tuloy-tuloy ang suportang pang-medikal na ibinibigay sa ating mga guro para patuloy na maitaguyod ang kanilang kapakanan.

Bilang frontliners sa pagpapatuloy ng edukasyon, isinasakripisyo ng mga guro ang kanilang kaligtasan at kalusugan, kaya dapat hindi sila napagkakaitan ng anumang uri ng suporta na maaari nating ibigay sa kanila.

Bilang Chairman ng Senate Committee on Basic Education, Arts and Culture, ang mungkahi ng inyong lingkod ay ituloy ang medical benefits para sa mga guro at maglaan ng pondo para dito sa panukalang national budget ng bansa sa susunod na taon.

Nakatakda nang talakayin ng Senado ang panukalang budget na P4.506 trilyon para sa 2021 sa muling pagbubukas ng sesyon ngayong buwan.

Kamakailan ay isiniwalat ni Education Undersecretary Annalyn Sevilla na hindi na pinondohan ng Department of Budget and Management (DBM) ang medical allowance ng mga guro para sa susunod na taon. Ngayong taon, may P400 milyon pondong nakalaan para sa kanilang annual check-up o P500 kada guro.

Mas mataas ang panukalang pondo para sa Department of Education (DepEd) sa 2021. Mula sa P552.9 bilyon ngayong taon, nais itong gawing P605.74 bilyon sa susunod na taon.

Ang isa pang nais nating masiguro ay ang pagpapatupad ng Magna Carta for Public School Teachers o Republic Act No. 4670 na layong i-angat ang antas ng pamumuhay at kapakanan ng mga guro. Lumalabas na wala pang kalahati o 40 porsiyento lamang sa mga probisyon ng naturang batas ang ganap na naipatutupad. Kung kaya’t inihain ng inyong lingkod ang Senate Resolution No. 522 upang mariing siyasatin ang pagpapatupad ng Magna Carta o rebisahin ito kung kinakailangan.

Kabilang sa mga probisyon ng naturang batas ay ang libreng check-up para sa mga guro bago sila magsimulang magturo at taunang pagpapagamot nila kung sila’y magkasakit.

Mandato rin ng Magna Carta na hindi dapat lumalagpas sa anim na oras sa isang araw ang pagtuturo ng mga guro. At kung kailanganin man nilang magsagawa ng mga tungkulin na labas sa kanilang normal na gawain sa paaralan, dapat silang bigyan ng karagdagang bayad.

Itinalaga rin ng batas ang pagbibigay ng special hardship allowances para sa anumang maranasan nila kaugnay ng kanilang trabaho. Isang halimbawa nito ay ang hirap ng pagko-commute kung nakatira sila malayo sa lugar ng kanilang trabaho.

Importante na ating masiguro na kampante ang ating mga frontliners sa sektor ng edukasyon. Sa pamamagitan ng wastong pagtutok sa kanilang kapakanan, maipapakita natin ang pagbibigay-pugay para sa lahat ng kanilang sakripisyong hindi matatawaran at dapat na kilalanin, lalong hindi dapat abusuhin.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com