Remedial programs, oks gawin habang wala pang face-to-face classes

ni Kuya Win Gatchalian - @Win Tayong Lahat | January 5, 2021

Malaki sanang tulong ang pagsasagawa ng limitadong face-to-face classes sa mga lugar na wala o kakaunti ang kaso ng COVID-19 sa mga suliranin ng distance learning. Ngunit dahil sa alarma ng bagong uri ng COVID-19 na kumakalat sa buong mundo ay tama lang na ikansela muna ito ngayong Enero para sa kaligtasan ng mga mag-aaral, guro at pati na rin ng mga magulang.

Dahil dito, malaki ang ating pangamba na lalong umurong ang kaalaman ng kabataang mag-aaral at lumala ang krisis ng edukasyon sa bansa. Kapag nangyari ito, mas malaki ang magiging suliranin natin kaya hinihimok ng inyong lingkod ang pamahalaan na gawin ang lahat ng mga posibleng hakbangin upang makabawi ang mga mag-aaral sa panahong nakalaan sana para sa face-to-face classes.

Kabilang sa mga hakbang na ito ang pagsasagawa ng remedial programs. Dapat suriin nang mabuti kung aling aspeto ng mga aralin ang kailangan tutukan at kung sinu-sinong mag-aaral ang dapat tutukan.

Dapat din ay mailaan ang budget at lahat ng mga kakailanganin para matiyak na hindi maaantala ang edukasyon ng mga estudyante. Sa ilalim ng 2021 national budget, higit 16 bilyong piso ang nakalaan sa “programmed appropriations” sa ilalim ng pondo ng Department of Education (DepEd) para sa “flexible learning options.” Anim na bilyong piso naman ang nakalaan para sa flexible learning options sa ilalim ng unprogrammed appropriations.

Habang hindi pa tayo bumabalik sa face-to-face o pangkaraniwang setup ng klase, inaasahan natin na magtutuluy-tuloy pa rin ang paggamit sa iba’t ibang paraan ng pagtuturo tulad ng self-learning modules, radyo at telebisyon upang suportahan ang ating mga guro at mag-aaral.

Dapat din nating alalahanin ang kahalagahan ng Alternative Learning System (ALS) upang maabot ang mahigit dalawang milyong mag-aaral sa K to 12 na hindi nakapag-enroll dahil sa pandemya. Nakasaad sa 2021 national budget ang isang special provision sa pondo ng flexible learning options ng DepEd na naglalaan ng mahigit 559 milyong piso para sa programa.

Bukod dito, mahalaga rin ang pagsasagawa ng reporma sa pagsasanay at edukasyon para sa mga guro upang umangat ang kalidad ng edukasyon sa bansa. Sa ating inihaing Senate Bill No. 1887 o ang Teacher Education Council Act, isinusulong nito ang mas maigting na ugnayan sa pagitan ng DepEd, Commission on Higher Education (CHED) at ng Professional Regulation Commission (PRC) upang iangat ang kalidad ng pagsasanay at edukasyon ng mga guro sa bansa.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mga guro, punong-guro at iba pang kawani ng mga paaralan, iprayoridad sa bakuna laban sa COVID-19

ni Kuya Win Gatchalian - @Win Tayong Lahat | December 29, 2020

Hinihimok ng inyong lingkod ang National Task Force Against COVID-19 na isama ang mga guro, kabilang ang mga punong-guro at kawani ng mga paaralan, sa mga grupong unang mabibigyan ng bakuna kontra COVID-19.

Mahalagang hakbang ang pagpapabakuna sa mga guro para sa ligtas na pagbubukas ng mga paaralan. Malaki ang maitutulong nito para maging kampante ang mga magulang at ang publiko kapag nagkaroon na ng face-to-face classes sa buong bansa.

Kamakailan naman ay nanawagan din ang United Nations Educational, Scientific, and Cultural Organization (UNESCO) na bigyang-prayoridad ang mga guro sa pagpapamahagi ng bakuna kontra COVID-19.

Pero hindi pa mangyayari ang muling pagbubukas ng klase sa mga tinaguriang low-risk areas sa Enero ng susunod na taon kasunod na rin ng direktiba ng Pangulo dahil sa sinasabing bagong uri ng COVID-19 na mas nakahahawa. Bagama’t wala namang ulat na kumalat na ito sa bansa, mas mainam na rin na mag-doble-ingat.

Ang halos 900,000 na mga guro ay itinuturing nating mga magigiting na frontliners, kabilang na ang mga non-teaching staff, dahil sa pamamahagi ng mga learning materials para sa may 87 porsiyento na mga mag-aaral sa gitna ng banta ng COVID-19.

Upang hindi na lumala ang krisis sa edukasyon na kinahaharap ng bansa, dapat ding bigyang-prayoridad ang paghahanda sa muling pagbubukas ng mga paaralan lalo na’t nalalapit na ang pagkakaroon ng bakuna.

Bago pa tumama ang pandemya, ipinakita na ng mga global assessments na Programme for International Student Assessment (PISA) 2018, Trends in International Mathematics and Science Study (TIMSS) 2019 at ng Southeast Asia Primary Learning Metrics (SEA-PLM) 2019 na nahuhuli na ang mga mag-aaral natin kung ikukumpara sa mga mag-aaral ng ibang bansa at hirap silang matutunan ang mga tinaguriang “basic competencies”.

Patuloy nating tututukan ang mga updates para sa adhikaing ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Medical allowance ng mga guro, kailangang magpatuloy sa 2021

ni Kuya Win Gatchalian - @Win Tayong Lahat | December 22, 2020

Bilang frontliners sa pagpapatuloy ng edukasyon, isinasakripisyo ng mga guro ang kanilang kaligtasan at kalusugan, kaya dapat hindi sila napagkakaitan ng anumang uri ng suporta na maaari nating ibigay sa kanila.

Kailangan nating tiyakin na tuluy-tuloy ang suportang pang-medikal na ibinibigay sa ating mga guro para patuloy na maitaguyod ang kanilang kapakanan.

Bilang Chairman ng Senate Committee on Basic Education, Arts and Culture, nais bigyang-diin ng inyong lingkod na dapat manatili ang medical benefits ng mga guro at maglaan ng pondo para dito sa panukalang national budget ng bansa sa susunod na taon.

Ang isa pang nais nating masiguro ay ang pagpapatupad ng Magna Carta for Public School Teachers o Republic Act No. 4670 na layong i-angat ang antas ng pamumuhay at kapakanan ng mga guro. Lumalabas na wala pang kalahati o 40 porsiyento lamang sa mga probisyon ng naturang batas ang ganap na naipatutupad. Kung kaya’t inihain ng inyong lingkod ang Senate Resolution No. 522 upang mariing siyasatin ang pagpapatupad ng Magna Carta o rebisahin ito kung kinakailangan.

Kabilang sa mga probisyon ng naturang batas ay ang libreng check-up para sa mga guro bago sila magsimulang magturo at taunang pagpapagamot nila kung sila’y magkasakit.

Mandato rin ng Magna Carta na hindi dapat lumalagpas sa anim na oras sa isang araw ang pagtuturo ng mga guro. At kung kailanganin man nilang magsagawa ng mga tungkulin na labas sa kanilang normal na gawain sa paaralan, dapat silang bigyan ng karagdagang bayad.

Itinalaga rin ng batas ang pagbibigay ng special hardship allowances para sa anumang maranasan nila kaugnay ng kanilang trabaho. Isang halimbawa nito ay ang hirap ng pagko-commute kung nakatira sila malayo sa lugar ng kanilang trabaho.

Importante na ating masiguro na kampante ang ating mga frontliners sa sektor ng edukasyon. Sa pamamagitan ng wastong pagtutok sa kanilang kapakanan, maipapakita natin ang pagbibigay-pugay para sa lahat ng kanilang mga sakripisyong hindi matatawaran at dapat na kilalanin, lalong hindi dapat abusuhin.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com