School buildings na kayang tumindig sa paghagupit ng mga bagyo, aprub!

ni Kuya Win Gatchalian - @Win Tayong Lahat | November 26, 2020

Mariing hinihimok ng inyong lingkod ang Department of Education (DepEd) at ang Department of Public Works and Highways (DPWH) na tiyaking ang mga gusali ng mga paaralan ay kayang tumindig sa gitna ng paghagupit ng mga bagyo.

Ayon sa Education Cluster Report noong Nobyembre 15, mahigit isang libong mag-aaral sa halos 70 dibisyon ang apektado ng Bagyong Ulysses. Halos dalawang libong mag-aaral naman sa 36 na dibisyon ang naapektuhan dahil sa Bagyong Rolly. Ayon sa DepEd, humit-kumulang siyam na bilyong piso ang kailangan upang muling maipatayo ang nasirang mga paaralan.

Mahalaga ang pagkakaroon ng mga ‘typhoon-resistant buildings’ upang mapanatili ang kaligtasan ng mga paaralan na kadalasan ay ginagamit bilang evacuation centers. Alam naman nating ang mga paaralan ay hindi itinayo para magsilbing evacuation center, ngunit patuloy pa rin ang paggamit sa mga ito sa ganoong paraan.

Sa ilalim ng ating panukalang Evacuation Center Act o ang Senate Bill No. 747, kailangang magpatayo ng permanenteng evacuation center sa bawat lungsod at munisipalidad sa bansa. Layon din ng naturang panukalang-batas na magpatayo ng mga dagdag na pasilidad sa mga paaralan na magsisilbing evacuation center.

Bukod dito, nakasaad din sa panukala na kinakailangang ang mga gagawing evacuation center ay kayang labanan ang hanging may bilis na 320 kilometers per hour o lindol na hindi bababa sa 7.2 magnitude. Dapat ding sumusunod ang mga pasilidad na ito sa National Building Code of the Philippines o ang Republic Act No. 6541.

Sa ating pagpapatayo ng mga bagong gusali sa mga paaralan, dapat nating siguruhing ang disenyo ng mga ito ay kayang makaiwas sa pinsalang maaaring idulot ng mga kalamidad.

Ayon sa opisyal ng DepEd, ang substandard construction ang isa sa mga dahilan kung bakit patuloy na nasisira ang maraming paaralan tuwing bumabagyo. Base sa kanyang obserbasyon, malaki ang posibilidad na gumuho ang kisame ng mga gusaling ipinatayo noong 2014 hanggang 2019.

Kung ang suhestiyon ng naturang opisyal ay lagyan ng storm protector ang mga bubong at bintana ng mga paaralan upang mas maging ligtas ang mga ito, sa ganang akin naman ay ang paglalagay ng roof decks na konkretro ay solusyon din kaysa naman palaging pinapalitan ang mga nasisirang bubong sa tuwing may bagyo.

Mahalaga ang pagkakaroon ng matitibay na mga paaralan hindi lamang para sa agarang pagpapatuloy ng edukasyon kundi para rin sa kaligtasan ng mga residente na matinding naaapektuhan ng dumadating na mga kalamidad. Dapat bigyan natin ito ng prayoridad.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Protektahan ang kabataan sa anumang uri ng pang-aabuso at karahasan

ni Kuya Win Gatchalian - @Win Tayong Lahat | November 24, 2020

Sa pagdiriwang ng National Children’s Month ngayong buwan, hinihimok ng inyong lingkod ang mga pampubliko at pribadong paaralan na palawigin ang kaalaman ng mga mag-aaral sa kanilang mga karapatan.

Kasama sa mga epekto nitong pandemya ang pagtaas ng mga insidente ng karahasan at pang-aabuso sa mga kabataan. Bilang Chairman ng Senate Committee on Basic Education, Arts and Culture, naninindigan tayong dapat pangalagaan at itaguyod ang karapatan ng mga bata lalo na’t naging banta sa kanilang kaligtasan ang pinsalang dulot ng COVID-19.

Ayon sa datos ng Philippine National Police - Women and Children Protection Desks (PNP-WCPD), mahigit 2,000 ang naitalang kaso ng mga krimen laban sa kabataan mula noong ipatupad ang Enhanced Community Quarantine (ECQ) noong Marso hanggang Hulyo 11.

Iniulat din ng Department of Justice (DOJ) Office of Cybercrime na mula Marso 1 hanggang May 24 ngayong taon, halos 280,000 ang naitalang bilang ng kaso ng online sexual exploitation of children (OSEC). Ito ay mas mataas ng higit dalawang daang porsiyento (264%) mula sa 76,651 na kasong naitala sa parehong panahon noong nakaraang taon.

Dati na nating iminungkahi na dapat pinagagana ng mga paaralan ang kanilang mga Child Protection Committee (CPC) para maprotektahan ang mga bata laban sa anumang uri ng pang-aabuso at karahasan.

Ang mga Child Protection Committee ng mga paaralan ay may mahalagang papel sa pagpapaigting ng kaalaman ng mga mag-aaral pagdating sa kanilang mga karapatan. Sa ilalim ng DepEd Order No. 40 s. 2012, kasama sa mga tungkulin ng CPC ang pagsasagawa ng mga programa at aktibidad laban sa iba’t ibang uri ng pang-aabuso, karahasan, diskriminasyon at bullying sa mga mag-aaral. Bahagi rin ng tungkulin ng CPC ang pag-uulat sa mga kasong ito sa angkop na mga tanggapan.

Bukod dito, tungkulin din ng CPC ang pakikipag-ugnayan sa mga non-government organizations (NGOs) at mga ahensiya ng pamahalaan tulad ng PNP-WCPD at ang Local Social Welfare and Development Office.

Maliban sa pag-uulat ng mga kaso, ang mga ahensiya at organisasyong ito ay maaaring maging katuwang ng pamahalaan sa pagpapalawig ng kaalaman sa karapatan ng mga bata. Tiyak na makatutulong ang mga ugnayang ito upang patatagin ang tiwala ng mga mag-aaral at kanilang mga magulang sa mga institusyon.

Naniniwala rin tayo na mahalagang manatiling bukas ang mga helpline ng mga paaralan, mga tanggapan ng pamahaalaan at NGOs upang agarang matugunan ang pangangailangan ng mga mag-aaral.

Kung mas malawak ang pakikilahok at kaalaman ng mga kabataan sa pagtataguyod ng kanilang karapatan, siguradong mas magiging epektibo ang ating pagsugpo sa mga pang-aabusong maaari nilang maranasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Tiyaking ligtas sa COVID-19 ang mga batang apektado ng nagdaang mga bagyo

ni Kuya Win Gatchalian - @Win Tayong Lahat | November 19, 2020

Bilang Chairman ng Senate Committee on Basic Education, Arts and Culture, hinihimok ng inyong lingkod ang Department of Social Welfare and Development (DSWD) at mga lokal na pamahalaan na siguruhin ang kaligtasan ng mga batang apektado ng mga nagdaang bagyo, lalo na ngayong patuloy ang banta ng COVID-19 sa kanilang kalusugan.

Ayon sa United Nations Office for the Coordination of Humanitarian Affairs (UN OCHA), sa nagdaang super typhoon na Rolly pa lang, higit pitong daang libo nang mga bata ang apektado. Nagbabala rin ang United Nations Children’s Fund (UNICEF) dahil karamihan sa mga apektadong bata, kabilang ang kanilang pamilya ay mas nanganganib na mahawaan ng COVID-19 dahil siksikan sa mga evacuation centers.

Dito pumapasok ang kahalagahan ng pagpapatupad ng Comprehensive Emergency Program for Children (CEPC) na nabuo sa ilalim ng Republic Act No. 10821 o ang Children’s Emergency Relief and Protection Act. Sa ilalim ng batas, ang CEPC ang magsisilbing gabay sa pagtaguyod sa pangangailangan ng kabataan sa gitna ng mga sakuna.

Sa ilalim din ng naturang batas, mandato sa mga lokal na pamahalaan na gawing bahagi ang CEPC sa kanilang mga plano at budget sa Local Disaster Risk Reduction and Management (LDRRM).

Ilan sa mga aspeto ng CEPC ang pagkakaroon ng child-friendly spaces sa mga lugar na nasa ilalim ng state of calamity. Bahagi rin ng programa ang pakikipag-ugnayan ng Department of Health (DOH) sa DSWD, mga lokal na pamahalaan at civil society organizations para tugunan ang mga pangangailangang pang-kalusugan ng mga kabataan, kabilang na ang psychosocial interventions.

At dahil layon ng CEPC ang agarang paghahatid ng mga pangunahing pangangailangan tulad ng pagkain, tubig, gamot, sanitary at hygiene kits, nararapat na magpamahagi rin ito ng mga face masks, alcohol at sanitizers sa mga bata at kanilang pamilya.

Bukod dito, isa pang panukalang-batas na ating isinusulong ay ang Senate Bill No. 747 na layong magpatayo ng mga permanent evacuation centers sa bawat lungsod at munisipalidad sa bansa.

Kapag naisabatas, bukas ang bawat evacuation center sa lahat ng mga naapektuhan ng bagyo, pagbaha, storm surge, epekto ng tagtuyot, sunog, lindol, pagsabog ng bulkan at iba pang mga malalaking sakuna. Ito ay upang maiwasan ang paggamit sa mga classroom at maiwasan ang patuloy na pagkaantala sa pagbabalik ng mga mag-aaral sa klase.

Ngayong bumabangon ang bansa mula sa pinsalang dulot ng nagdaang mga kalamidad, patuloy dapat na tutukan ang pangangailangan at kaligtasan ng kabataan, lalo na ang mga nawalan ng tahanan dahil sa hagupit ng magkakasunod na bagyo.

Higit sa lahat, mahalagang manatili ang pagtutulungan at tungkulin ng pamahalaan na protektahan ang mga kabataang mag-aaral at kanilang pamilya mula sa panganib ng COVID-19.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com