Pagtugon sa pinsalang idinulot ng pandemya, now na!

ni Kuya Win Gatchalian - @Win Tayong Lahat | February 9, 2021

Habang inaasahan natin ang paglunsad ng Updated Philippine Development Plan (PDP) 2017-2022 na tututok sa pagsasaayos ng mga pinsalang idinulot ng pandemya sa mga sektor ng edukasyon at paggawa o labor, kasabay nito ay ating isinusulong ang pagkakaroon ng national education agenda na makatutulong sa pagbangon ng bansa mula sa pandemya. Hindi naman lingid sa ating kaalaman ang pagkakaantala ng pag-aaral ng mga kabataan at marami ang nawalan ng trabaho at kabuhayan bunsod ng pagpapatupad ng mga lockdown.

Ang panukalang batas ng inyong lingkod na Senate Bill No. 1526 o mas kilala bilang National Education Council (NEDCO) Act ay nagsusulong na paangatin ang sektor ng edukasyon sa pamamagitan ng maigting na ugnayan at pagkakaisa ng mga polisiya ng Department of Education (DepEd), Commission on Higher Education (CHED) at Technical Education and Skills Development Authority (TESDA) pagdating sa mga mahahalagang isyu ng bansa.

Sa ilalim ng naturang panukala, tututukan ng NEDCO ang mga pangangailangan ng labor market, isang integrated curriculum na makapaghahatid ng mga layunin at mga prayoridad sa sektor ng edukasyon, at isang K-to-12 graduates employment plan upang tulungang makapaghanap ng trabaho ang mga nagtapos ng senior high school habang tinitiyak na matutugunan ang mga pangangailangan ng gobyerno at ng pribadong sektor pagdating sa human resources.

Kung maisabatas ang panukalang ito ay gagawing prayoridad ng NEDCO ang pagbuo ng national education agenda na tututok sa mga pinsalang idinulot ng pandemya para matugunan ang mga hamong dala nito, kabilang na ang digital divide o ang hindi pagkakapantay-pantay ng mga indibidwal tungkol sa access sa teknolohiya ng impormasyon at komunikasyon. Kabilang din sa mga prayoridad ng NEDCO ang pag-angat sa kalidad ng edukasyon.

Ayon sa United Nations Educational, Scientific and Cultural Organization (UNESCO), mahigit 28 milyong mga mag-aaral mula sa pre-primary hanggang kolehiyo ang naapektuhan ng pandemya sa bansa.

Buo ang ating paniniwala na nakasalalay ang matagumpay na pagbangon ng sektor ng edukasyon sa wastong paghahanda at matatag na pagpaplano para sa pagpapatupad ng mga kinakailangang reporma.

Kung mananatiling kulang ang pakikipag-ugnayan sa pagitan ng DepED, CHED at TESDA ay talagang hindi natin mabibigyan ng sapat na pagtutok ang mga hamon sa edukasyon na kailangan nating tugunan. Bilang inyong Chairman ng Senate Committee on Basic Education, Arts and Culture, mariin natin itong binabantayan hanggang sa maayos itong matugunan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

SIM card registration, solusyon para wakasan ang child cybersex

ni Kuya Win Gatchalian - @Win Tayong Lahat | February 2, 2021

Mariing isinusulong ng inyong lingkod ang mandatory registration ng mga prepaid SIM cards para masugpo ang mga gumagawa ng Online Sexual Exploitation of Children (OSEC).

Ang kawalan ng batas sa SIM card registration ang isa sa mga hadlang para sa mga awtoridad upang matugis ang mga child cybersex offenders, lalo na’t sa pamamagitan lamang ng unregistered SIM card ay puwede na silang makagamit ng teknolohiya para maisagawa ang kanilang maitim na balak.

Base sa pag-aaral ng United Nations Office on Drug and Crime noong 2014, ginagamit ng mga child cybersex offenders ang mga disposable prepaid SIM cards para hindi sila matunton.

Sa ilalim ng Senate Bill No. 176 o ang Subscriber Identity Module (SIM) Card Registration Act, ang mga gumagamit ng mga prepaid SIM cards ay kailangan nang magsumite ng valid ID at larawan at lumagda sa control-numbered registration form na magmumula sa service provider ng SIM card. Ang National Telecommunications Commission (NTC) ay mabibigyan din ng kopya ng naturang registration form.

Kung inyong matatandaan, nagbabala na tayo noon tungkol sa mga ulat ng mga estudyanteng nagbebenta ng mga malalaswang larawan at mga video upang makalikom ng pantustos sa distance learning. Ayon sa news portal sa sektor ng mga mag-aaral na The Philippine Online Student Tambayan (POST), mga online payment platforms ang ginagamit para sa mga transaksiyong ito.

Base sa non-government organization na International Justice Mission, ang Pilipinas ang pinagmumulan ng pinakamaraming kaso na may kinalaman sa OSEC. Ipinaliwanag ng naturang grupo na mas mataas ng halos walong beses ang mga ulat na natatanggap ng Pilipinas sa referral ng mga kaso kung ito ay ihahambing sa ibang bansa. Ganito na ang sitwasyon bago pa dumating ang pandemya ng COVID-19.

Pero pinalala pa ng pandemya ang suliranin ng bansa sa OSEC. MInsan nang nabanggit ni Cabinet Secretary Karlo Nograles na mahigit 47,000 ang naiulat na mga transaksiyong may kinalaman sa OSEC. Mas mataas ito sa 19,000 na naitala noong 2019. Ang mga pangkaraniwang edad ng mga nabibiktima ay nasa 11.

Sa pagsugpo ng buong bansa sa child pornography, kailangan nating isulong ang lahat ng paraan upang mapabilis ang pagtugis sa mga kriminal sa likod ng mga karahasang ito.

Kung magiging batas ang pagpaparehistro sa mga prepaid SIM card, mas mahirap na para sa mga traffickers na umaabuso sa kabataan na makapagtago at makatakas. Gawin natin ang lahat para mahuli na ang mga ito at mahinto na ang ganitong krimen at karahasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mas mabilis matuto ang kabataan sa wika na kanilang nauunawaan, period!

ni Kuya Win Gatchalian - @Win Tayong Lahat | January 28, 2021

Naghain ang inyong lingkod ng resolusyon para suriin ng Senado ang pagpapatupad ng Mother Tongue-Based Multilingual Education (MTB-MLE) o “mother tongue” policy na mandato sa ilalim ng K to 12 Law o ang Republic Act No. 10533.

Sa ating inihaing Senate Resolution No. 610, nais nating masuri kung epektibo ba ang paggamit sa MTB-MLE sa sistema ng edukasyon sa Pilipinas mula nang ipatupad ito noong 2012. Ilan sa mga nakitang hamon sa programa ang kakulangan ng mga textbooks na nakasulat sa mother tongue, pati na rin ang kakulangan ng pagsasanay ng mga guro sa paggamit ng mother tongue sa pagtuturo.

Malaki ang kinalaman ng wika o language upang matuto talaga ang mga bata. Ayon sa 2018 Programme for International Student Assessment (PISA), 94% ng mga estudyanteng nakilahok dito na nasa edad 15 ay gumagamit sa bahay ng lengguwaheng iba sa ginamit na medium of instruction sa mismong assessment. Pumapangalawa ang Pilipinas sa Lebanon na may 98%. Kung matatandaan natin, nakakuha ng mababang marka ang ating mga estudyante sa naturang global assessment.

Mas mabilis matuto ang kabataan sa wika na kanilang nauunawaan. Ang epekto nito ay makikita sa kanilang self-esteem upang lalo silang maengganyo sa pag-aaral.

Sa pagpapatupad ng programang K to 12, ang katutubong wika o ang pangunahing wika ng mga mag-aaral ang gagamitin sa pagtuturo, mga teaching materials at assessment mula Kindergarten hanggang sa unang tatlong taon ng edukasyon sa elementarya. Sa pamamagitan ng language bridge program, sisimulan ang paggamit ng Filipino at English mula Grade 4 hanggang Grade 6. Sa high school naman, ang dalawang wikang ito ang magiging pangunahing mga wika para sa pagtuturo.

Bagama’t maganda ang layunin ng mother tongue policy sa ilalim ng programang K to 12, nakita natin na may mga hamon sa ating kakayahan at kahandaan na ipatupad ito. Ang nakasalalay dito ay ang kalidad ng edukasyon na natatanggap ng ating mga mag-aaral, kaya ang kailangan dito ay masusing pag-aaral upang malaman natin kung paano ba talaga matutugunan ang mga kakulangan ng naturang programa.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com