DepEd Computerization Program, malaking pakinabang sa mga mag-aaral sa gitna ng pandemya

ni Kuya Win Gatchalian - @Win Tayong Lahat | April 06, 2021

Sa kabila ng maraming beses na pagkakaloob ng Bureau of Customs (BOC) sa Department of Education (DepEd) ng mga kinumpiskang gadgets upang makatulong sa distance learning, mariing hinihimok ng inyong lingkod ang DepEd na tiyakin ang mabilis at maayos na pagpapatupad ng sarili nitong computerization program—ang DepEd Computerization Program (DCP).

Pangunahing layon ng naturang programa na maglagay ng mga angkop at kinakailangang teknolohiya para mapunan ang kakulangan ng mga computer sa mga pampublikong paaralan, kung saan target nitong mapahusay ang proseso ng pag-aaral at pagtuturo. Nakasaad din sa programa na dapat magkaroon ng computer laboratory packages sa bawat high school, e-classroom sa bawat elementary school at laptop sa mga mobile teachers.

Sa ilalim ng 2021 national budget, mayroong halos anim na bilyong pisong nakalaan para sa DCP. Ngunit may ilang mga hamong kinahaharap ang pagpapatupad ng programa na kailangan ding matugunan ng DepEd.

Ayon sa Commission on Audit (COA), halos 60 porsiyento lamang ang naabot ng programa sa target nito mula 2015 hanggang 2019. Ibig sabihin, naglalaro lang sa 8,000 sa mahigit 14 libong mga target na paaralan ang nakatanggap ng information and communications technology (ICT) packages. Base pa sa COA, mahigit tatlong bilyong piso ang ibinayad na sa ilang mga supplier noong 2019 kahit may kulang pa sila sa documentary requirements.

Ayon din sa pag-inspeksiyon ng Komisyon, may ibang mga paaralan na hindi pa handang makatanggap ng ICT packages dahil sa kawalan ng computer rooms, angkop na electrical groundings, wirings at circuit breaker, at mga window grills.

Sa ulat naman ng ilang ICT coordinators, may ilang suppliers na hindi nagbigay ng after-sales service. Hindi na kasi sila makontak sa ibinigay nilang numero at email address kaya hindi na nakakuha ng warranty sa mga suppliers na ito.

Nakita natin ngayong panahon ng pandemya ang kahalagahan ng teknolohiya para sa mga mag-aaral at guro. Kaya mahalagang matiyak natin ang pagpapatupad ng nasabing programa upang mapakinabangan nila ito.

Bunsod ng sitwasyon ngayon, pinag-aaralan na ng inyong lingkod ang panukalang-batas na magbibigay ng laptop at internet allowance para sa mga mag-aaral ng K to 12 sa buong bansa dahil maituturing nang pangunahing pangangailangan ang laptop at internet connection sa pag-aaral. Huwag nating hayaang mapag-iwanan ang kabataang Pilipino at tulungan natin silang makamit ang dekalidad na edukasyon sa gitna ng pandemya.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Paggabay sa mga magulang, mahalaga sa gitna ng hamon ng distance learning

ni Kuya Win Gatchalian - @Win Tayong Lahat | March 30, 2021

Habang patuloy na tinutugunan ng mga pamilya ang mga pinsalang dulot ng pandemya, muling isinusulong ng inyong lingkod ang pagpapatupad ng programang Parent Effectiveness Service (PES) sa bawat lungsod at munisipalidad sa bansa. Ito ay upang matulungan ang mga magulang na maging epektibo sa paggabay sa kanilang anak sa usapin ng edukasyon, pati na sa pagbibigay ng socio-emotional support.

Pangunahing layunin ng ating panukalang-batas na Senate Bill No. 1985 o Ang Parent Effectiveness Service (PES) Program Act ay paigtingin ang kakayahan ng mga magulang at parent-substitutes sa pagbibigay-kalinga sa mga kabataan at paggabay sa kanilang edukasyon. Nakasaad sa naturang panukala na ang PES program ay magkakaroon ng parent effectiveness sessions sa mga barangay.

Ang mga psychologists, health professionals, social workers, paraprofessionals at social workers ay ilan lamang sa magsisilbing facilitator para sa naturang programa. Tatalakayin naman ng mga modules na gagamitin sa programa ang mga usapin tulad ng child development, home development, pagtuturo ng magandang-asal at pagkakaroon ng malusog na kapaligiran para sa kabataan.

Sa isang survey na isinagawa ng Social Weather Stations (SWS), halos 90 porsiyento ng mga pamilyang may miyembrong nag-aaral (lima hanggang 20-taong gulang) ang nagsasabing mas nahihirapan sila sa distance learning kung ikukumpara sa face-to-face classes. Lumabas din sa survey na 60 porsiyento ng mga pamilya ang naglalaan ng mas maraming oras sa pagtuturo at kadalasang ang mga ina ang nagtuturo sa kanilang anak.

Ayon sa mga eksperto, ang isang taong pagsasara ng mga paaralan at pananatili sa mga tahanan ng kabataang mag-aaral ay nakapipinsala sa kanilang mental health. Bukod dito ay problema rin ang kawalan ng access sa psychosocial support ng ilang mga mag-aaral. Bagama’t alam natin kung gaano kahalaga para sa mga magulang na suportahan ang kanilang anak sa usapin ng mental health, kinikilala rin natin ang kanilang hirap, pagod at patung-patong na responsibilidad sa gitna ng pandemya.

Marahil, ito ang ilan sa mga dahilan ng malungkot na balitang pumapatol ang ilang magulang sa “sagot for sale,” kung saang kailangan pa nilang magbayad ng ibang tao para sagutan ang modules ng kanilang anak.

Hindi kaila na mahalaga ang papel ng ating mga magulang sa pagpapatuloy ng edukasyon at sa pangangalaga sa mental health ng mga kabataang mag-aaral sa panahon ng pandemya. Hindi natin maaaring ipasa sa kanila ang lahat ng gawain, lalo na’t marami sa kanila ang naghahanapbuhay din at nakararanas ng pagod. Dapat matulungan natin sila sa suliraning ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Isama sa ‘priority’ ng mga babakunahan kontra COVID ang mga guro

ni Kuya Win Gatchalian - @Win Tayong Lahat | March 25, 2021

Muling hinihimok ng inyong lingkod ang National Task Force (NTF) Against COVID-19 at ang Inter-Agency Task Force on the Management of Emerging Infectious Diseases (IATF-EID) na itaas ang mga guro sa listahan ng mga grupong bibigyang-prayoridad sa COVID-19 vaccination program.

Sinusuportahan natin ang panawagan ng 33 organisasyon mula sa pribadong sektor, mga grupong pang-edukasyon at pangkalusugan na nagsusulong na gawing bahagi ang mga guro ng A4 priority list. Ayon sa kasalukuyang listahan ng mga grupong prayoridad na mabigyan ng bakuna kontra COVID-19, nasa B1 priority list ang mga guro kasama ng social workers.

Sa ating mga nagdaang pagdinig sa ilalim ng Senate Committee on Basic Education, Arts and Culture ay nanawagan na tayong maisama ang mga guro sa A4 priority list, kung saan kabilang ang mga frontline personnel, mga nasa essential sectors at mga uniformed personnel.

Sa madaling salita, sa ilalim ng COVID-19 vaccination program, dapat mabakunahan muna ang mga frontline healthcare workers, senior citizens, ang mga may comorbidity at mga kasapi ng indigent population bago bakunahan ang mga guro.

Sang-ayon ba kayong maituturing na frontliners ang mga guro? Alam nating mula pa noong nagsimula ang distance learning, nag-iikot na rin sila sa iba’t ibang barangay para mamigay ng self-learning modules. May ilan pa nga sa ating mga guro na bumibisita sa mismong bahay ng kanilang estudyante. Bukod pa rito, ang pagpapabakuna ng mga guro ay mahalagang hakbang upang maiwasan ang hawaan kapag binuksan na ulit ang mga paaralan para sa face-to-face classes.

Noong nakaraang taon, ipinanawagan ng mga grupong tulad ng United Nations Educational, Scientific and Cultural Organization (UNESCO) at United Nations Children’s Fund (UNICEF) ang pagbibigay-prayoridad sa mga guro sa pagpapabakuna kontra COVID-19.

Umaasa tayong matutulad ang mandato ng bansa sa Indonesia, kung saan unang binakunahan ang kanilang mga guro bago ang mga nasa vulnerable groups.

Ang mga guro ay frontliners dahil isinasakripisyo nila ang kanilang kaligtasan para magpatuloy ang edukasyon sa gitna ng pandemya. Ngayong inaasahan natin ang malawakang pagpapabakuna laban sa COVID-19 sa mga susunod na buwan, mariin nating isinusulong na mabigyan ng mas mataas na prayoridad ang mga guro upang matiyak natin ang ligtas na pagpapatuloy ng edukasyon at muling pagbubukas ng mga paaralan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com