Pagbuo ng EDCOM, malaking tulong sa pagresolba ng ‘education crisis’

ni Kuya Win Gatchalian - @Win Tayong Lahat | July 13, 2021

Kailangan ng maigting na pagsulong at pagpapatupad ng mga reporma sa ating sektor ng edukasyon sa lalong madaling panahon. Kaya naman, kasama ang iba pang senador ay isinusulong ng inyong lingkod ang Senate Joint Resolution No. 10 upang muling buuin ang Congressional Oversight Committee on Education o EDCOM na unang binuo noong 1990.

Kung walang makabuluhang reporma sa sektor ng edukasyon — mula sa kurikulum, kalidad ng mga guro, hanggang sa education governance — ang pinsalang dulot ng krisis sa edukasyon ay maaaring tumagal pa kahit tapos na ang pandemya ng COVID-19. Nakababahala rin ang kasalukuyang kawalan ng tinatawag na “catch-up plan” o remedial programs upang matulungan ang mga mag-aaral na makahabol mula sa epekto ng isang taong pagsasara ng mga paaralan.

Sa isang pag-aaral ng World Bank, lumalabas na mahigit 80 porsiyento ng mga mag-aaral sa bansa ang hindi natututo ayon sa kanilang antas. Lumabas din sa naturang pag-aaral ang ilan sa mga pangunahing isyu tulad ng mababang kalidad ng disiplina sa classroom, mga insidente ng bullying at ang pakiramdam ng mga mag-aaral na hindi sila tanggap sa kanilang mga paaralan.

Ang pag-aaral na ito ng World Bank ay batay sa datos ng tatlong malalaking international assessments na sinalihan ng Pilipinas na isinagawa bago pa tumama ang pandemya: Ang 2018 Programme for International Student Assessment (PISA), Southeast Asia Primary Learning Metrics (SEA-PLM) 2019 at Trends in International Mathematics and Science Study (TIMSS) 2019.

Bukod sa pag-decongest ng kurikulum, nais din nating bigyang-diin ang kahalagahan ng pag-angat sa kalidad ng pagsasanay at edukasyon ng mga guro — bagay na nais matamo ng Senate Bill No. 2152 o ang Teacher Education Excellence Act. Layon ng panukalang-batas na amyendahan ang Republic Act No. 7784 upang paigtingin ang kakayahan ng Teacher Education Council (TEC) na pagbuklurin ang Commission on Higher Education (CHED), ang Professional Regulation Commission (PRC), at ang Department of Education (DepEd).

Isinusulong din ng inyong lingkod ang mas malaking papel ng mga local government units sa pag-angat ng kalidad ng edukasyon sa pamamagitan ng Senate Bill No. 1579. Sa ilalim ng nasabing panukala, magiging mandato sa mga local school boards ang pagpapatupad ng mga reporma para maiangat ang kalidad ng edukasyon. Ito ay susukatin gamit ang datos mula sa mga achievement scores ng national tests, assessment tools at iba pang standardized test scores.

Bago pa man tumama ang pandemya, nasa ilalim na ng krisis ang sistema ng edukasyon sa bansa. Kaya lalo pa nating dapat paigtingin ang mga reporma upang maiwasan ang lalong pag-urong ng kaalaman ng mga kabataang mag-aaral. Tandaan na ang pagbibigay ng sapat at wastong edukasyon ay isa sa mga pinakamahalagang hakbang na maaari nating gawin upang hindi mapagkaitan ang kabataan ng magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Kahalagahan ng job-skills matching sa LUCs

ni Kuya Win Gatchalian - @Win Tayong Lahat | June 29, 2021

Mahalaga ang papel ng mga local universities and colleges (LUCs) sa pagresolba sa mga suliranin sa trabaho, pagpapalago ng ating ekonomiya at pagbangon ng Pilipinas mula sa pandemya.

Habang patuloy ang pagbangon ng ating bansa mula sa pinsalang dulot ng COVID-19 pandemic, nais natin pagtuunan ng pansin ang kahalagahan ng paghahatid ng edukasyon ng mga LUCs habang tinutugunan natin ang suliranin sa jobs-skills mismatch.

Sa webinar na isinagawa kamakailan ng Philippine Futures Thinking Society at ng Pamantasan ng Lungsod ng Valenzuela na pinamagatang “The Future of Local Colleges and Universities,” binigyang- diin natin ang malaking potensiyal ng mga LUCs na tugunan ang jobs-skills mismatch habang naghahatid ng edukasyon sa ating mga kababayan. Dahil ang mga LUCs ay nag-uulat sa mga local government units (LGU) na nagtatag sa kanila, mas mabilis silang rumesponde sa mga lokal na sitwasyon at pangangailangan, lalo na sa pagsasanay ng mga skilled professionals na kailangan ng mga LGUs.

Mahalaga para sa mga LUCs na maging sentro ng human capital development at maging bahagi ng pagpaplano ng mga LGUs. Dapat din nilang patatagin ang ugnayan sa pribadong sektor, magpatupad ng kurikulum na angkop sa Fourth Industrial Revolution, at isulong ang flexible learning methods.

Kailangan ding suriin ang kalidad ng edukasyon na inihahatid ng LUCs dahil dapat mayroong sapat na kakayahan ang mga magsisipagtapos upang balang araw ay magkaroon sila ng maayos na trabaho.

Base sa Commission on Higher Education (CHED), may 121 LUCs sa bansa, katumbas ng limang porsiyento ng mahigit 2,000 higher education institutions (HEIs) sa bansa noong school year (SY) 2019-2020. May halos 250,000 mag-aaral sa mga LUCs noong SY 2019-2020, katumbas ng pitong porsiyento ng enrollment sa mga HEIs.

Upang matiyak na ang pagkakaroon ng de-kalidad na edukasyon ang pangunahing konsiderasyon ng mga LGU sa pagtatayo ng HEI, inihain natin ang Senate Bill No. 370 o ang Local Universities and Colleges Governance Act. Sa ilalim ng naturang panukala, magkakaroon ng pamantayan sa pagtatatag at pagpapatakbo ng mga LUCs.

Itinulak din ng inyong lingkod na maging bahagi ang LUCs sa Universal Access to Quality Tertiary Education (Republic Act No. 10931) Act o ang free higher education law. Sa ilalim ng batas, ang mga mag-aaral sa CHED-accredited na mga LUCs ay hindi na magbabayad ng matrikula at iba pang mga bayarin.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

‘Distance cheating’, sugpuin at huwag tularan!

ni Kuya Win Gatchalian - @Win Tayong Lahat | April 08, 2021

Sa kabila ng patuloy na paglaganap ng “sagot-for-sale” sa ilalim ng distance learning, nais nating paalalahanan ang Department of Education (DepEd), Commission on Higher Education (CHED) at ang mga paaralan na paigtingin at bilisan ang kanilang pag-iimbestiga at pagsugpo sa anumang uri ng distance cheating o pandaraya sa mga pagsusulit sa klase.

May ilang ulat na patuloy pa rin ang sagot-for-sale, ang iskema kung saan nagbabayad ang mga magulang ng ibang tao upang sagutan ang modules ng kanilang mga anak. Ayon sa mga ulat, may mga mag-aaral at mga magulang na nag-aalok mismo ng kanilang serbisyong sagutan o gawin ang requirements ng ibang mag-aaral sa halagang P150 hanggang P500. Kabilang sa mga requirements na ito ang mga modules, research papers, essays at kung minsan ay may video editing pa. Binabayaran ang mga naturang requirements sa pamamagitan ng online banking o virtual wallets.

Ayon sa mga ulat, ang mga nagpapagawa ng kanilang requirements ay kadalasang nagmumula sa junior high school, senior high school at kolehiyo. Ang mas nakadidismaya, minsan ay ginagamitan pa ito ng mga hashtags tulad ng #AcademicCommission, #AcademicWriting at #AcademicService.

Para sa mga mag-aaral na gumagawa ng mga academic requirements, ang kinikita raw nila ay ginagamit na pantustos sa mga pangangailangan sa pag-aaral. Para naman sa mga magulang na nag-aalok ng kanilang serbisyo, ang kanilang kinikita ay ginagamit na pantustos sa pang-araw araw nilang mga pangangailangan sa bahay.

Maliban sa pag-imbestiga sa mga insidenteng ito, nais bigyang-diin din ng inyong lingkod ang kahalagahan ng pagpapaigting sa kakayahan ng mga guro na masuri o matukoy ang anumang uri ng pandaraya pagdating sa academic requirements ng kanilang mga estudyante. Dapat maging prayoridad din ang investment sa mga “assessment technology” upang maiwasan ang pandaraya sa digital education.

Bukod sa kukulangin ang mga mag-aaral ng kaalaman at kahusayan kung papayagang magpatuloy ang ganitong gawain, ang siguradong panganib ay magdudulot ito ng kawalan ng integridad ng ating mga mag-aaral. Dekalidad na edukason ang nakasalalay dito.

Kung hindi natin wawakasan ang sagot-for-sale at iba pang anyo ng pandaraya sa distance learning, lalong hindi matututo ang mga bata. At kapag nalusutan nila ito sa unang pagkakataon, nakakalungkot ngunit malaking tyansa na uulit-ulitin na nila ang ganitong pandaraya.

Ang layunin natin sa pagpapatuloy ng edukasyon ay matiyak na ang ating mga kabataan ay hindi lamang natututo. Hinuhubog din natin sila para maging matapat, mahusay at mapagkakatiwalaan. Wakasan na natin ang sagot-for-sale sa lalong madaling panahon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com