Dapat i-level up ang edukasyon ng mga estudyanteng Pinoy!

ni Kuya Win Gatchalian - @Win Tayong Lahat | January 18, 2022

Pormal na kinilala ang CCF Life Academy Foundation, Inc. bilang “educational institution of international character” matapos lagdaan ang Republic Act No. 11638. Bilang sponsor at isa sa mga may akda ng batas, kumpiyansa ang inyong lingkod na palalawigin nitong bagong batas ang mga oportunidad at pagkakataon para makatanggap ang mas maraming Pilipino ng international education.

Itinatag ang CCF Life Academy noong 2013 na nagsusulong ng kahusayan sa edukasyon, Christian character at servant leadership sa mga mag-aaral nito. Layunin din ng paaralan na humubog ng mga internationally-minded na mamamayan. Kasama sa senior high school program ng paaralan ang International Baccalaureate program, ang itinuturing na gold standard sa pre-college international education.

Sa tulong ng bagong batas, maipagpapatuloy ng paaralan ang programa nito para sa edukasyon, maiaangat nito ang kalidad ng pagtuturo at matutugunan ang pangangailangan ng mga foreign temporary residents pagdating sa de-kalidad na edukasyon.

Bagama’t maaaring tumanggap ang CCF Life Academy ng mga aplikante anuman ang lahi nilang naaayon sa sarili nitong eligibility standards, rules for admission at grade placement, nakasaad sa batas na walang single alien nationality ang magiging katumbas ng 30 porsiyento ng student population sa isang school year. Ituturing na exceptions ang sitwasyon ng mga foreign diplomatic personnel at ibang foreign temporary residents.

Nakasaad din sa batas na bagama’t maaaring tumanggap ang CCF Life Academy ng sarili nitong teaching and management personnel mula sa ibang mga bansa o lahi, dapat bigyang-prayoridad ng paaralan ang pagtanggap sa mga kuwalipikadong teaching and management personnel mula sa Pilipinas. Nananatili ring nasa ilalim ng regulasyon ng Department of Education (DepEd) ang paaralan.

Noong School Year (SY) 2020-2021, ang student body ng CCF Life Academy ay binubuo ng mahigit 600 mag-aaral mula preschool, elementary, junior at senior high school levels. Ang 13 porsiyento nito ay mga foreign students mula sa anim na ibang bansa.

Ang pagkilala sa CCF Life Academy bilang educational institution of international character ay hakbang upang maisakatuparan ang layuning sinusuportahan natin: na ang ating bansa ay maging regional hub para sa edukasyon at mahikayat na mag-aral dito ang mas maraming foreign students. Para sa mga mag-aaral ng ating bansa, ihahatid ng CCF Life Academy ang world-class na edukasyon na lilinangin ang kanilang Christian values.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mas mababang buwis para sa mga pribadong paaralan, malaking tulong ngayong pandemya

ni Kuya Win Gatchalian - @Win Tayong Lahat | January 13, 2022

Sa gitna ng matinding pinsalang dulot ng COVID-19, malaking bagay ang paglagda sa batas na magpapataw ng mas mababang buwis sa mga pribadong paaralan — ang Republic Act No. 11635 na inaprubahan ng pangulo noong Disyembre 10, 2021.

Sa ilalim ng bagong batas, muling inamyendahan ang Section 27 (B) ng National Internal Revenue Code of 1997 upang pababain ang preferential tax rate sa mga pribadong paaralan o proprietary educational institutions. Ang dating 10 porsiyentong buwis ay magiging isang porsiyento na lamang sa loob ng tatlong taon.

Bagama’t nakasaad sa batas na nananatiling sampung porsiyento ang buwis sa taxable income ng mga pribadong paaralan, ang isang porsiyentong buwis ay nakatakdang ipataw mula Hulyo 1, 2020 hanggang Hunyo 30, 2023.

Sa ilalim ng naturang batas, ang mga proprietary educational institutions ay mga pribadong paaralan na pinatatakbo ng pribadong indibidwal o grupo. Kinakailangang meron ding permit to operate ang naturang mga paaralan mula sa Department of Education (DepEd), Commission on Higher Education (CHED) at Technical Education and Skills Development Authority (TESDA).

Nililinaw at binibigyang-diin nitong bagong batas ang intensiyon ng Corporate Recovery and Tax Incentives for Enterprises Act (CREATE) na magpataw ng mas mababang buwis sa mga pribadong paaralan. Matatandaang inilabas ng Bureau of Internal Revenue (BIR) ang Revenue Regulation No. 5, kung saan nakasaad na ang mga paaralang proprietary at non-profit lamang ang maaaring mapatawan ng mas mababang buwis. Para sa mga paaralang hindi pasok sa ganitong depinisyon, kinakailangan nilang magbayad ng 25 porsiyentong buwis o katumbas ng 150 porsiyentong pagtaas.

Ang mas mabigat na buwis ay kinatatakutang magresulta sa pagsasara ng mas maraming paaralan at pagkawala ng mas maraming trabaho. Maaari ring mapagkaitan ang mas maraming mag-aaral ng de-kalidad na edukasyon dahil dito. Lumalabas sa datos ng DepEd na dahil sa pandemya, bumaba ng halos isang milyon ang enrollment sa mga pribadong paaralan, mahigit 600,000 mag-aaral ang lumipat sa mga pampublikong paaralan at mahigit 400 ang nagsuspinde ng operasyon o nagsara.

Dahil sa matinding pinsalang dulot ng pandemya sa mga pribadong paaralan, higit nilang kinakailangan ang lahat ng uri ng suporta mula sa pamahalaan. Kaya naman, napapanahon ang batas na magbabawas sa kanilang buwis hanggang sa 2023, upang tulungan silang makabangon at maipagpatuloy ang paghahatid ng de-kalidad na edukasyon sa kabataan.

Bilang chairman ng Senate Committee on Basic Education, Arts and Culture, co-author at co-sponsor ng bagong batas, nagpapasalamat ang inyong lingkod sa ating mga kapwa mambabatas na sina Senador Sonny Angara na pangunahing may akda ng naturang batas at Senador Pia Cayetano na co-sponsor din nito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Nangyayari sa panahon ng pandemya… Milyun-milyong reklamo laban sa online child sexual abuse sa

‘Pinas, ‘wag dedmahin!

ni Kuya Win Gatchalian - @Win Tayong Lahat | January 11, 2022

Hindi natin maitanggi ang pagkadismaya dahil lumalabas na muli na namang lumobo ang bilang ng mga reklamo sa online child sexual abuse sa bansa.

Noong 2021, nakatanggap ang Department of Justice ng 2.8 milyong ulat ng online sexual abuse.

Mahigit doble ito sa 1.3 milyong naiulat noong 2020. Ayon sa DOJ Office of Cybercrime (OOC), karamihan sa halos tatlong milyong ulat na natanggap ay maituturing na hindi actionable dahil naisumite na umano ang mga ito ng makailang ulit at itinuturing na mapanlinlang o kaya ay mali ang pagkakaulat.

Gayunman, ayon sa annual report ng DOJ OOC, umabot sa 268 ang mga kaso ng online sexual exploitation of children (OSEC) na iniimbestigahan na ng naturang opisina. Ang bilang ay mas mataas ng apat na beses sa 73 na naitala noong 2020.

Dahil patuloy na hinaharap ng kabataan ang banta ng iba’t ibang uri ng karahasan sa gitna ng pandemya, nais bigyang-diin ng inyong lingkod na napapanahon ang pag-amyenda ng Kongreso sa mga batas kontra human trafficking upang mas mapaigting ang pagsugpo sa OSEC at iba pang anyo ng human trafficking.

Noong Nobyembre 2021, naging co-sponsor tayo ng Senate Bill No. 2449 o ang Expanded Anti-Trafficking Act of 2021. Layon nitong naturang panukala na patatagin ang Republic Act No. 9208, na una nang naamyendahan ng Republic Act No. 10364, upang maglatag ng mga pamantayan sa imbestigasyon, surveillance, pagharang at pag-usig sa iba’t ibang anyo ng human trafficking.

Binibigyang-diin ng naturang panukala ang mga papel at responsibilidad ng internet intermediaries, mga may-ari at operator ng internet cafes, hotspots at kiosks, money transfer at remittance centers, mga bangko, money service businesses, mga kompanya ng credit card at financial institutions upang masugpo ang human trafficking.

Layon din ng naturang panukala na palawakin ang Inter-Agency Council Against Trafficking (IACAT) upang mapabilang ang mga ahensiya, tulad ng Department of Health, Department of Education, Department of Information and Communications Technology, Department of Transportation, Department of Tourism, National Council on Disability Affairs, at ang Council for the Welfare of Children.

Dapat ding paigtingin ang papel ng Child Protection Program ng DepEd upang dagdagan ang kaalaman ng mga mag-aaral tungkol sa OSEC at iba pang uri ng karahasan sa kabataan.

Mahalaga ang pagpapatatag natin sa mga batas kontra human trafficking. Sa kabila ng patuloy na pagtaas ng mga kaso ng pang-aabuso gamit ang internet, kailangan nating paigtingin ang pagbibigay-proteksiyon sa kabataan at pagharang sa ganitong klaseng mga pang-aabuso.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com