College Students, gawing tutor para sa Remedial Program

ni Kuya Win Gatchalian - @Win Tayong Lahat | January 27, 2022

Sa pagpapatupad ng learning recovery program na tutugon sa learning loss o pag-urong ng kaalaman sa gitna ng COVID-19 pandemic, iminumungkahi ng inyong lingkod na gawing tutor ang ating mga mag-aaral sa kolehiyo.

Sa ilalim ng Senate Bill No. 2355 o ang Academic Recovery and Accessible Learning (ARAL) Program Act na inihain natin noong nakaraang taon, maaaring magboluntaryo bilang tutor ang mga mag-aaral sa kolehiyo.

Ituturing na pagkumpleto nila ng Literacy Training Service sa ilalim ng National Service Training Program (NSTP) ang pagboluntaryo bilang tutor sa panukalang ARAL Program.

Maliban sa grade requirement, kailangang makapasa ang mga naturang mag-aaral sa mock tutoring session na isasagawa ng Department of Education (DepEd). Ang mga guro at para-teachers ay maaari ring magsilbing tutor sa panukalang ARAL Program.

Ipinanukala natin bilang chairman ng Senate Committee on Basic Education, Arts and Culture ang pagkakaroon ng ARAL Program upang magbigay ng learning intervention dahil sa kawalan ng face-to-face classes. Bahagi ng naturang programa ang mga tutorial sessions. Bibigyan ng prayoridad sa programang ito ang most essential learning competencies sa Language at Mathematics para sa Grade 1 hanggang Grade 10, at Science para sa mga Grade 3 hanggang Grade 10. Para sa mga mag-aaral sa Kindergarten, numeracy at literacy skills naman ang bibigyang-pansin.

Ang mga mag-aaral na nahihirapan sa Language, Mathematics, at Science ang bibigyang-prayoridad ng panukalang ARAL Program. Nais ding tulungan ng programa ang mga mag-aaral na hindi nag-enroll noong School Year (2020-2021) upang hikayatin din silang bumalik sa paaralan.

Matapos ang mahigit isang taong hindi pagpasok ng mga mag-aaral sa kanilang paaralan, isinagawa ang pilot implementation ng limited face-to-face classes noong Nobyembre 2021.

Sinimulan ang pilot run sa Metro Manila noong Disyembre. Ngunit muli ngang sinuspinde ang face-to-face classes sa mga lugar na ibinalik sa Alert Level 3 dahil sa muling paglobo ng mga kaso ng COVID-19. Mainam ding inanunsiyo kamakailan ng DepEd na magpapatupad ito ng programa para sa learning recovery dahil sa kawalan ng face-to-face classes sa gitna ng pandemya.

Kaya naman, sa pagbangon ng sektor ng edukasyon ay higit nating kinakailangan ang tulong ng ating mga komunidad, kabilang ang mga mag-aaral sa kolehiyo. Dahil sa lawak ng naging epekto ng pandemya sa sektor ng edukasyon, dapat palawigin ang ating mga pagsisikap upang maabot natin ang mas maraming kabataang mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Progressive expansion ng face-to-face classes mahalagang hakbang sa pagbangon ng sektor ng edukasyon

ni Kuya Win Gatchalian - @Win Tayong Lahat | January 25, 2022

Bilang chairman ng Senate Committee on Basic Education, Arts, and Culture, sinusuportahan ng inyong lingkod ang progressive expansion ng limited face-to-face classes sa mga lugar na nasa ilalim ng Alert Level 1 at Alert Level 2. Naninindigan tayong mahalagang hakbang ito tungo sa muling pagbangon ng sektor ng edukasyon at sa pagbabalik ng mas maraming kabataan sa kanilang mga paaralan.

Kamakailan, inaprubahan ni Pangulong Rodrigo Duterte ang rekomendasyon ng Department of Education (DepEd) na palawigin ang face-to-face classes. Ayon kay DepEd Secretary Leonor Briones, ang mga bakunadong teaching and non-teaching staff lamang ang papayagang makalahok sa limited face-to-face classes. Bibigyan naman ng prayoridad ang mga mag-aaral na bakunado na laban sa COVID-19.

Ang mahalagang susunod na hakbang ay ang pagbabakuna sa mga batang may edad na lima hanggang 11 upang mapataas pa lalo ang kumpiyansa ng mga magulang at mag-aaral.

Balak ng ating pamahalaan na simulan ngayong Pebrero ang pagbabakuna sa mga batang may edad na lima hanggang 11. Ayon kay National Task Force Against COVID-19 Chief Implementer at Vaccine Czar Carlito Galvez, Jr., target ng pamahalaan na mabakunahan ang mahigit 15 milyong batang may edad na lima hanggang 11. Kaya naman, muli rin nating hinihimok ang mga local government units (LGUs) na maghanda para sa pagbabakuna ng kabataan sa naturang age group.

Halos 300 paaralan at may 15-K mag-aaral ang lumahok sa pilot run ng limited face-to-face classes. Ayon sa DepEd, walang naitalang kaso ng COVID-19 sa mga lumahok sa pilot run.

Ayon pa sa DepEd, umabot ng 83 porsiyento ang attendance sa limited face-to-face classes. Sa isang survey naman na ibinahagi ng kagawaran ngayong buwan, 97 porsiyento ng mag-aaral sa Grade 1 hanggang Grade 3 at 86 porsiyento sa senior high school ang nagsabing kontento sila sa kanilang karanasan sa face-to-face classes.

Habang unti-unti nating binubuksan ang mga paaralan, lalo na ‘yung nasa itinuturing na may low at minimal risk ng COVID-19, nananatiling prayoridad ang pagbibigay natin ng proteksiyon sa ating mga mag-aaral. Kaya naman, mariin nating isinusulong ang pagbabakuna sa mga batang lima hanggang 11 taong gulang upang patuloy na matiyak ang kanilang kaligtasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Imbes nag-aaral, meron na agad pamilya… Tuldukan ang child marriages sa bansa!

ni Kuya Win Gatchalian - @Win Tayong Lahat | January 20, 2022

Ayon sa United Nations International Children’s Emergency Fund (UNICEF), ang Pilipinas ay pang-12 sa may pinakamaraming bilang ng child marriages sa buong mundo. At dahil sa kasalukuyang pagsasara ng mga paaralan, pagkaantala ng mga serbisyo, at pinsala sa ekonomiya na dulot ng pandemya, nagbabala ang ahensiya na maaaring umabot ang bilang ng child marriages sa buong mundo sa 10 milyon sa pagwawakas ng dekada.

Kaya naman, ang pagsasabatas ng panukalang pataasin ang statutory rape age mula 12 hanggang 16 ay makatutulong upang masugpo ang child marriages sa bansa.

Kakaapruba lang ni Pangulong Rodrigo Duterte ng panukalang batas na nagbabawal sa child marriages o ang Republic Act No. 11596.

Ang child marriage ay kasal, kung saan ang isa o parehong indibidwal ay wala pang 18 taong gulang. Sa ilalim ng bagong batas, kabilang sa mga ipinagbabawal ang pagsasaayos o pagtutulak sa child marriage, kabilang ang pagsasagawa ng mga ritwal upang bigyan ito ng basbas.

Ipinagbabawal din sa batas ang pagsasama sa pagitan ng adult o nakatatanda at ng menor-de-edad na hindi pa ikinakasal.

Noong nakaraang taon ay niratipikahan na ng Kamara at Senado ang bicameral conference committee na nagtataas sa edad ng pagtukoy ng statutory rape. Bilang chairman ng Senate Committee on Basic Education, Arts and Culture at isa sa mga may akda ng Senate Bill 2332, naniniwala ang inyong lingkod na ang pagbabawal sa child marriages at ang mas mataas na edad sa pagtukoy ng statutory rape ay mahalaga sa pagsugpo ng mga itinuturing na gender-based violence at paglabag sa karapatang-pantao.

Ayon sa United Nations Population Fund (UNFPA), marami sa mga batang babaeng ikinakasal sa murang edad ang nakararanas ng maaga at paulit-ulit na pagbubuntis at panganganak.

Ayon sa 2017 National Demographic and Health Survey (NDHS), mahigit 26 na porsiyento ng mga ikinasal na babaeng may edad na 15 hanggang 19 ang nakaranas ng karahasang pisikal, seksuwal at emosyunal.

Batay naman sa datos ng Philippine Statistics Authority (PSA) para sa taong 2019, lumalabas na dalawa sa tatlong batang babae ay nabuntis ng nakatatanda sa kanila ng humigit-kumulang 20-taon. Ito ay mula kay Commission on Population and Development (POPCOM) Executive Director Juan Antonio Perez III. Sinabi rin niyang ipinakikita nito na ang mga batang babaeng may edad na 11 hanggang 12 ay biktima ng power play at seduction o pang-aakit.

Noong 2000, ang bilang ng mga batang may edad na 10 hanggang 14 na nanganak ay mahigit 755 lamang. Ngunit ayon sa POPCOM, umabot na ito sa mahigit 2,411 sa taong 2019 — katumbas ng pito kada araw.

Kung maisasabatas sa lalong madaling panahon ang pagtaas ng statutory rape age, mas mapaiigting natin ang mga hakbang upang tuluyang masugpo ang child marriage sa bansa. Ang kabataan ay dapat patuloy na nag-aaral at hindi nagpapakasal sa murang edad. Napapanahon na para tuldukan ang ganitong uri ng pang-aabuso at karahasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com