Paigtingin ang partisipasyon ng LGUs sa sektor ng edukasyon

ni Kuya Win Gatchalian - @Win Tayong Lahat | June 21, 2022

Bilang Chairman ng Senate Committee on Basic Education, Arts and Culture, mariing isinusulong ng inyong lingkod ang mas aktibong pakikilahok ng mga lokal na pamahalaan sa paghahatid at pag-angat sa kalidad ng edukasyon sa bansa.

Maraming mahahalagang papel ang ginampanan ng mga lokal na pamahalaan sa pagpapatuloy ng edukasyon sa gitna ng pandemya. Isa na ang mas agarang pagtugon sa pangangailangan ng mga guro at mag-aaral sa kanilang mga nasasakupan dahil mas malapit sila sa mga ito.

Bukod dito, malaking impluwensiya rin ang susunod na Secretary of Education na si Vice-President-elect Sara Duterte-Carpio sa mga lokal na pamahalaan upang maging mas aktibo ang mga ito sa usapin ng edukasyon. Dahil natanggap ng Vice-President-elect ang boto ng mahigit 61% ng mga boto ng taumbayan, mayroon siyang political capital upang maipatupad ang mga kinakailangang reporma upang tugunan ang krisis sa sektor ng edukasyon.

Sa kakatapos lamang na 18th Congress, inihain ng inyong lingkod ang Senate Bill No. 1579 o ang 21st Century School Boards Act. Sa ilalim ng panukalang batas, mandato ng mga school boards na magpatupad ng kinakailangang reporma upang iangat ang kalidad ng edukasyon.

Ang tagumpay ng mga reporma at programang ito ay masusukat sa mga batayang tulad ng participation rate ng mga mag-aaral, bilang ng dropouts at out-of-school youth, achievement scores sa mga national tests, assessment tools at iba pang standardized test scores. Gagawin ding batayan ang pagkakaroon ng mga child development centers at suporta sa special education at Alternative Learning System o ALS.

Ipinapanukala rin natin ang pagpapalawig sa paggamit ng Special Education Fund o SEF upang magamit na pambayad sa sahod ng mga guro sa pampublikong paaralan sa elementarya at high school, sahod ng mga guro at capital outlay sa preschool, pagpapatakbo ng mga programa sa ALS at iba pa.

Nakita natin nitong panahon ng pandemya kung gaano kahalaga ang papel ng mga lokal na pamahalaan upang matiyak ang pagpapatuloy ng edukasyon, lalo na’t mas nauunawaan nila ang pangangailangan ng mga mag-aaral at mga guro sa kanilang mga nasasakupan. Sa pagpasok ng bagong administrasyon, kailangang palawakin pa natin ang papel ng lokal na pamahalaan at gawin silang katuwang sa pag-angat sa kalidad ng edukasyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Face-to-face classes sa lahat ng paaralan, dapat nang ibalik

ni Kuya Win Gatchalian - @Win Tayong Lahat | June 9, 2022

Upang lalong makabangon ang sektor ng edukasyon mula sa pinsalang dulot ng pandemya ng COVID-19, labis ang ating panawagan bilang Chairman ng Senate Committee on Basic Education, Arts and Culture na ibalik na ang face-to-face classes sa susunod na academic year.

Bagama’t ang pagbabalik ng face-to-face classes ang isa sa mga unang hakbang, nais nating bigyang diin ang pangangailangan para sa malawakang programa para sa learning recovery, lalo na’t ang kawalan ng face-to-face classes sa loob ng dalawang taon ay nagdulot ng learning loss o pag-urong ng kaalaman. Kung matatandaan natin, may pagtayang ginawa ang National Economic and Development Authority o NEDA na aabot sa P22 trilyon ang mawawala sa bansa dahil sa productivity losses dahil sa kawalan ng face-to-face classes sa loob ng dalawang taon.

Bahagi ng panukalang learning recovery program ng inyong lingkod ang mga sistematikong tutorial sessions para sa mga mag-aaral na nahihirapan sa kanilang mga aralin. Saklaw ng panukalang programa ang “most essential learning competencies” sa ilalim ng Language at Mathematics para sa Grade 1 hanggang Grade 10 at Science para sa Grade 3 hanggang Grade 10. “Literacy at numeracy competencies” naman ang tututukan sa mga mag-aaral sa Kindergarten upang mahasa ang kanilang mga foundational competencies.

Ayon sa Department of Education o DepEd, mayroong 34,238 na mga paaralan na ang nominado para sa face-to-face classes at 1,174 dito ay mga pribadong paaralan. May higit 33,000 o 73.28 porsiyento ng mga pampublikong paaralan ang nagsasagawa na ng face-to-face classes.

Sa pagbubukas ng 19th Congress, maghahain tayo ng mga panukalang batas upang iangat ang kalidad ng edukasyon at paigtingin ang pagbangon ng sektor mula sa pinsala ng pandemya.

Matapos ang halos dalawang taon ng pagtugon natin sa mga hamon ng pandemya, napapanahon nang buksan natin ang lahat ng mga paaralan upang makabalik na ang mga mag-aaral. Habang patuloy ang pagbangon ng iba’t ibang sektor, dapat nating tiyaking hindi mapag-iiwanan ang sektor ng edukasyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

EDCOM 2, matutugunan ang krisis sa edukasyon

ni Kuya Win Gatchalian - @Win Tayong Lahat | February 03, 2022

Magandang balita! Aprubado na sa huli at ikatlong pagbasa ang panukalang batas na lilikha sa Second Congressional Commission on Education (EDCOM II). Naninindigan ang inyong lingkod bilang chairman ng Senate Committee on Basic Education, Arts, and Culture na mahalaga ang hakbanging ito upang matugunan ang krisis na kinahaharap ng bansa pagdating sa edukasyon.

Sa ilalim ng ating panukalang batas na Senate Bill No. 2485, magsasagawa ang EDCOM 2 ng national assessment at evaluation o komprehensibong pagsusuri sa lagay ng sektor ng edukasyon sa bansa. Layunin ng panukalang pagsusuri na magrekomenda ng mahahalagang reporma sa sektor upang gawing intellectual power sa Asya ang Pilipinas.

Susuriin sa ilalim ng EDCOM 2 kung paano tinutupad ng Department of Education (DepEd), Commission on Higher Education (CHED) at ng Technical Education and Skills Development Authority (TESDA) ang kanilang mga mandato sa ilalim ng batas.

Pag-aaralan din sa ilalim ng panukalang pagsusuri ang mga sanhi kung bakit nananatiling mababa ang performance ng mag-aaral sa international at local standards.

Magrerekomenda rin ang EDCOM ng mga tiyak na solusyon upang paigtingin ang performance ng sektor, ayon sa mga lokal at pandaigdigang mga pamantayan.

Ang panukalang Komisyon ay magkakaroon ng sampung kasapi — lima mula sa Senado at lima mula sa Kamara. Ang mga miyembro mula sa Senado ay ang mga Chairpersons ng mga sumusunod na komite: Basic Education, Arts and Culture; Higher, Technical and Vocational Education; Finance; Science and Technology; at Labor, Employment and Human Resources Development.

Mula naman sa mababang Kapulungan, ang mga magiging kasapi ay ang mga miyembro ng mga sumusunod na komite: Basic Education and Culture; Higher and Technical Education; Appropriations; Science and Technology; at Labor and Employment.

Tutuparin ng Komisyon ang mandato nito sa loob ng dalawang taon mula sa pagkakatatag nito.

Matapos ang dalawang taon, ang Technical Secretariat na bubuuin kasabay ng Komisyon ay magpapatuloy ng dalawang taon upang magkaroon ng administrative oversight sa mga rekomendasyon ng Komisyon. Ang Philippine Institute for Development Studies (PIDS) naman ang magsisilbing research arm ng Komisyon.

Napapanahon na ang pagkakaroon ng EDCOM 2 upang masuri ang mga hamong hinaharap ng sektor ng edukasyon. Mahalaga ito upang maipanukala natin ang mga kinakailangang reporma na mag-aangat sa kalidad ng edukasyong ibinibigay natin sa kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com