Bawasan ang workload ng mga guro para makapag-focus sa pagtuturo

ni Kuya Win Gatchalian - @Win Tayong Lahat | August 2, 2022

Hinihimok ng inyong lingkod ang pamahalaan na pagaanin ang workload o trabaho ng mga guro upang matutukan nila ang kanilang tunay na tungkulin — ang pagtuturo sa mga mag-aaral.

Bukod sa pagtuturo ay kadalasang binibigyan ng iba pang trabaho ang mga guro, tulad ng iba’t ibang administrative roles at student support roles. Ilang halimbawa ng administrative roles ay ang pagtulong sa pagbabakuna, deworming, halalan, at iba pa, bagay na nakakaapekto sa kalidad ng pagtuturo. Noong 2019, pinuna ng Philippine Institute for Development Studies (PIDS) na nasasapawan ng mga administrative work ang aktuwal na pagtuturo ng mga guro.

Isa sa mga agarang hakbang na ipinapanukala natin sa Senado ay ang paglabas ng pondo para sa limang libong Administrative Officers (AO) sa mga pampublikong elementarya at high school sa bansa na tututok sa mga trabahong administratibo.

Isa ring pangmatagalang solusyon ang pagtiyak na may sapat na bilang ng non-teaching personnel batay sa school structure at staffing pattern, bagay na pag-aaralan at bubuuin ng Department of Education - Bureau of Human Resource and Organizational Development (BHROD) kasama ng Research Center for Teacher Quality (RCTQ).

Bukod dito ay hinihimok din natin ang DepEd na magsagawa ng pag-aaral sa workload ng mga guro. Ito ay upang mabalanse ang kanilang gawain at matiyak na mas nakatutok ang kanilang panahon sa paghasa sa kakayahan ng mga mag-aaral.

Ang panukalang pag-aralan ang workload ng mga guro ay isa sa mga rekomendasyon ng inyong lingkod noong ibinahagi natin ang resulta ng pagsusuri ng Committee on Basic Education, Arts and Culture sa pagpapatupad ng Magna Carta for Public School Teachers (Republic Act No. 4670).

Sa pagtataguyod ng kapakanan ng ating mga guro, dapat tiyakin nating nailalaan nila ang mas maraming oras para tutukan ang kanilang mag-aaral. Mahalagang pagsikapan nating maalis na sa mga guro ang mga trabahong walang direktang kinalaman sa kanilang pagtuturo, lalo na’t ang makikinabang dito ay ang ating mga mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

‘Di bilib sa K-12 ang mga Pinoy, dagdag-pasanin lang sa mga magulang

ni Kuya Win Gatchalian - @Win Tayong Lahat | July 28, 2022

Mariing isinusulong ng inyong lingkod ang pagrepaso at pagreporma sa K to 12 system, lalo na’t dumarami ang bilang ng mga Pilipinong hindi kuntento sa naturang sistema ng edukasyon.

Sa isang Pulse Asia Survey na isinagawa noong Hunyo 24 hanggang 27 na may 1,200 na kalahok, lumalabas na 44 porsyento ang “dissatisfied” o hindi kuntento sa K-12. Mas mataas ito ng 16 percentage points kung ihahambing sa survey na isinagawa noong Setyembre 2019, kung saan lumalabas na wala pang 30 porsyento ang nagsasabing hindi sila kuntento sa sistema ng K to 12.

Lumabas din sa survey noong Hunyo na bumagsak ng 11 percentage points ang satisfaction rate o pagiging kuntento ng mga Pilipino sa K-12 system kung ihahambing sa survey na isinagawa noong Setyembre 2019. Bagama’t 50 porsyento ng mga kalahok sa survey noong Setyembre 2019 ang kuntento sa programa, wala pang 40 porsyento sa mga kalahok ng survey ngayong taon ang nagsabing kuntento sila sa programa.

Inihain natin ang Proposed Resolution No. 5 na nagsusulong ng pagrepaso ng Senado sa pagpapatupad ng Enhanced Basic Education Act of 2013 o ang K to 12 Law (Republic Act No. 10533), 10 taon matapos ipatupad noong school year 2012-2013 ang enhanced curriculum para sa K to 12. Ang panukalang pagrepaso ay isa sa mga prayoridad ng inyong lingkod ngayong 19th Congress at isa sa mga ipinangako natin noong nagdaang kampanya.

Napag-alaman natin na dagdag-gastos ang isang dahilan kung bakit hindi pabor ang marami sa K-12.

Hindi lingid sa ating kaalaman na isa sa mga pangako ng K to 12 program ang mas magandang pagkakataon na makahanap ng trabaho para sa mga magtatapos ng senior high school. Pero sa isang discussion paper na inilabas ng Philippine Institute for Development Studies (PIDS) noong 2020, lumalabas na mahigit 20 porsyento lamang sa mga nagtapos ng senior high school (SHS) ang sumali sa labor force samantalang nagpatuloy sa kolehiyo ang 70 porsyento.

Ayon pa sa PIDS, ang mga kabataang may edad 15 hanggang 24 ang may pinakamababang labor force participation sa ASEAN region. Kung ikukumpara sa Vietnam, 70 porsyento ng kanilang kabataan ay nasa labor force, ngunit wala pang 60 porsyento ng kabataang Pilipino ang nasa labor force.

Malinaw sa ating mga kababayan na hindi sila kuntento sa programa ng K to 12. Ito ay dahil hindi natutupad ang mga pangako nito at naging dagdag-pasanin lamang ito sa ating mga magulang at mga mag-aaral.

Bilang Chairman ng Senate Committee on Basic Education, Arts and Culture, susuriin natin nang husto ang pagpapatupad ng K to 12 upang matiyak na natutupad nito ang layuning makapaghatid ng dekalidad na edukasyon at isulong ang pagiging competitive ng kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Hindi na dapat ipagpaliban ang F2F classes

ni Kuya Win Gatchalian - @Win Tayong Lahat | July 26, 2022

Lumabas sa survey ng Pulse Asia na karamihan sa mga Pilipino ay pabor sa pakikilahok ng mga bata sa face-to-face classes sa darating na school year, bagay na noon pa ipinananawagan ng inyong lingkod bilang Chairman ng Senate Committee on Basic Education, Arts and Culture.

Malinaw na hudyat ito sa pamahalaan na hindi na dapat pang ipagpaliban ang pagbabalik ng face-to-face classes mula sa mahigit dalawang taong online learning bunsod ng pandemya. Ang patuloy na kawalan ng face-to-face classes ay lalo lamang magdudulot ng pinsala sa ekonomiya dahil sa nakababahalang learning loss o pag-urong ng kaalaman.

Ayon sa survey na ating kinomisyon at isinagawa noong Hunyo 24 hanggang 27, 94 porsyento ng mga nakilahok sa survey ang sumasang-ayon na dapat pahintulutan ang mga batang mag face-to-face classes na, samantalang apat na porsyento ang hindi matukoy kung sang-ayon sila o maaaring hindi sang-ayon at dalawang porsyento lamang ang hindi sang-ayon. Kung pagbabatayan ang estado sa buhay ng mga kalahok sa survey, lumalabas na 85 porsyento mula Class ABC, 96 porsyento mula Class D, at 92 porsyento mula sa Class E ang sumasang-ayon dito.

Taliwas ang naging resulta ng naturang survey sa isang parehong pag-aaral na ginawa noong Hunyo 2021, kung saan 44 porsyento lamang ang sumang-ayon sa pagbabalik ng face-to-face classes, 33 porsyento ang nagsasabing hindi nila matukoy kung sang-ayon sila o maaaring hindi sila sang-ayon at 23 porsyento ang hindi sang-ayon.

At para naman matiyak ang kaligtasan ng mga mag-aaral, iginigiit natin na dapat paigtingin pa ang pediatric vaccination laban sa COVID-19. Dapat pamunuan ng DepEd ang mas agresibong school-based vaccination program sa tulong ng Department of Health (DOH).

Nakababahala ring nananatiling mababa ang bilang ng mga kabataang may edad lima hanggang 11 na nabakunahan na laban sa COVID-19. May naitalang 3.6 milyon o 26 porsyento pa lamang sa 14 milyong mga batang may edad na 5 hanggang 11 ang fully vaccinated na, ayon sa datos noong Hulyo 7. Samantala, nasa 9.6 milyon na o 86 porsyento ng 11.4 milyon ang fully vaccinated sa mga kabataang may edad 12 hanggang 17.

Ayon sa National Economic and Development Authority (NEDA), ang pagsasara ng mga paaralan ay katumbas ng 10.8 trilyong pisong mawawala sa bansa pagdating sa productivity. Ang mas malala pa, magdudulot daw ito ng kawalan ng trabaho sa susunod na apat na dekada.

Kung pakikinggan lang natin ang ating mga kababayan, makikita nating napakalakas ng panawagan para sa pagbabalik ng face-to-face classes. Hindi natin maaari pang ipagpaliban ang pagbabalik ng ating mga kabataan sa paaralan at hindi na natin dapat hayaang mahuli ang sektor ng edukasyon mula sa pagbangon natin sa pandemya.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com