Digital copies ng textbooks at reference books, panahon na

ni Kuya Win Gatchalian - @Win Tayong Lahat | December 6, 2022

Itinutulak natin sa Senate Committee on Basic Education ang paglikha ng tinatawag na Philippine Online Library upang matiyak na nananatiling “pandemic-proof” ang mga aklat at iba pang learning materials.

Inihain ng inyong lingkod ang Senate Bill No. 477 o ang Philippine Online Library Act. Sa ilalim ng naturang panukalang batas, gagawa ang Department of Education (DepEd) ng digital copies ng lahat ng textbooks at reference books na itinuturing na mahalaga para sa pampublikong edukasyon. Titipunin ang mga aklat sa Philippine Online Library na kapwa patatakbuhin ng DepEd at ng Department of Information and Communications Technology (DICT).

Papayagan din ng panukalang batas na gamitin ng DepEd ang dagdag-materyales mula sa National Library of the Philippines na kumakatawan sa kultura at panitikang Pilipino. Papayagan din ang DepEd na magdagdag ng materyales na sa tingin nito ay makakapagpalawig sa kaalaman ng mga mag-aaral.

Noong magpatupad ng distance learning dahil sa pandemya ng COVID-19, karamihan sa mga mag-aaral ay gumamit ng printed modules. Noong 2021, lumabas sa survey na kinomisyon ng World Bank sa mga low-income households na mahigit 95 porsyento ang gumamit ng mga printed modules bagama’t meron namang digital learning materials at platforms, tulad ng DepEd Commons.

Mahalaga ang magiging papel ng mga digital education tools upang maiwasan ang learning loss o pag-urong ng kaalaman dahil sa pagkaantala ng pasok. Sa pamamagitan din ng mga pandemic-proof na mga aklatan, magkakaroon ang mga mag-aaral ng mas malawak na access sa mga textbooks at materials.

Sa pamamagitan ng Philippine Online Library, matitiyak nating magkakaroon ang mga mag-aaral at guro ng access sa mas maraming mga aklat. Sa ganitong paraan, matitiyak natin na magpapatuloy ang edukasyon makaranas man tayo ng kalamidad o mga sakuna.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Gawing National Reading Month ang buwan ng Nobyembre

ni Kuya Win Gatchalian - @Win Tayong Lahat | November 24, 2022

Sa panukalang batas na Senate Bill No. 475 o ang National Reading Month Act, iminumungkahi ng inyong lingkod na ideklara ang Nobyembre ng bawat taon bilang National Reading Month, kung saan magsasagawa ng mga programang magsusulong sa pagbabasa. Layon nitong isulong ang kultura ng pagbabasa sa mga mag-aaral sa basic education at kanilang mga komunidad.

Sa ilalim ng naturang panukala, ang National Library at lahat ng mga congressional, city, municipal libraries at pati na ang mga barangay reading centers ay binibigyan ng mandato na makilahok sa gagawing mga programa ng National Reading Month. Isinusulong din na gawing mandato sa mga Public Telecommunications Entities (PTEs) na magbigay ng libreng access sa mga online educational platforms, digital libraries at iba pang online knowledge hubs at sites ng Department of Education (DepEd).

Imamandato rin sa DepEd ang pagsasagawa ng book fair sa pakikipagtulungan ng National Book Development Board. Bilang pangunahing ahensyang mamumuno sa pagdiriwang ng National Reading Month, dapat hikayatin ng DepEd ang pakikilahok ng publiko mula sa antas ng barangay hanggang sa rehiyon. Dapat hikayatin din ng DepEd ang media, book publishers, pribadong aklatan, magulang at iba pang stakeholders na ibahagi ang kanilang kaalaman, serbisyo at resources.

Iminumungkahi rin na hindi bababa sa 20 porsyentong diskuwento sa regular price ng mga reading materials, mapa-tradisyunal man o digital na format, na bibilhin sa buwan ng Nobyembre.

Ang panukalang batas ay hakbang upang iangat ang kalidad ng mga batang estudyante sa international standardized assessments. Matatandaang sa 2018 Programme for International Student Assessment (PISA), nakakuha ng pinakamababang marka ang 15 taong gulang na mag-aaral na nakilahok sa Reading o Pagbasa sa halos 80 bansa. Ayon sa resulta ng 2018 PISA, hindi naabot ng 80 porsyento ng mag-aaral ang minimum level ng proficiency sa Reading o Pagbasa.

Ang pagbabasa ay isa sa mga pinakamahalagang pundasyon ng ating mga kabataan na dapat patatagin. Sa pamamagitan ng panukala nating National Reading Month ay paiigtingin natin bilang Chairman ng Senate Committee on Basic Education ang pakikilahok ng ating mga komunidad upang isulong ang kultura ng pagbabasa.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Ngayong National Children's month…Paigtingin ang learning recovery ng mga mag-aaral

ni Kuya Win Gatchalian - @Win Tayong Lahat | November 10, 2022

Sa pagdiriwang ng National Children's Month ngayong Nobyembre, hinihimok ng inyong lingkod ang pamahalaan na tutukan ang kapakanan ng kabataan habang patuloy ang pagbangon ng bansa mula sa pandemya ng COVID-19.

Maliban sa learning loss o pag-urong ng kaalaman dahil sa kawalan ng face-to-face classes dulot ng pandemya, kapuna-puna rin ang pagtaas ng banta ng karahasan sa kabataan at ang tsansang makaranas sila ng problema sa mental health noong kasagsagan ng mga lockdown.

Bukod sa kahalagahan ng pagkakaroon ng mga hakbang sa pagbangon ng sektor ng edukasyon, kailangan din nating patatagin ang mga programa upang tugunan ang pangangailangan ng kabataan. Kabilang ang pagpapatupad ng learning recovery, psychosocial intervention at programa para sa child protection.

Sa ilalim ng Senate Bill No. 150 o ang Academic Recovery and Accessible Learning (ARAL) Act na isa sa mga priority bills natin ngayong 19th Congress, isinusulong ang pagkakaroon ng programa para sa national learning intervention na tutugon sa learning loss. Magiging bahagi ng panukalang programa ang mga tutorial sessions at remediation plans. Tututukan din ng naturang programa ang mga essential learning competencies sa Language, Mathematics at Science.

Layon din ng panukala ang sapat na probisyon ng suporta sa pangangailangang nutritional, social at emotional health ng kabataan upang tiyakin ang kanilang pangkalahatang kapakanan. Ito ay upang maging mas matatag ang kabataan at maging mas mahusay sila pagdating sa kanilang pag-aaral.

Inihain din natin ang Senate Bill No. 379 o ang Basic Education Mental Health and Well-Being Promotion Act. Layon ng naturang panukala na gawing institutionalized ang Mental Health and Well-Being Program. Isinusulong ng panukalang batas ang pagkakaroon ng Mental Health and Well-Being Center sa lahat ng mga paaralan sa basic education upang maghatid ng mental at well-being services na tutugon sa pangangailangang mental, emotional at developmental ng mga mag-aaral, guro at non-teaching personnel.

Sa patuloy na pagbangon natin mula sa pandemya, mahalaga na tutukan ng Senate Committee on Basic Education ang kapakanan ng kabataan, lalo na’t kasama sila sa mga pinakaapektado ng pinsalang dulot ng COVID-19. Mahalagang hakbang ang muling pagbabalik ng face-to-face classes, ngunit marami pa tayong maaaring gawin upang lalo pang itaguyod ang kaligtasan at kapakanan ng kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com