Math and Science High School, isulong sa bawat probinsiya

ni Kuya Win Gatchalian @Win Tayong Lahat | Oct. 1, 2024

Isa sa mga binibigyang prayoridad ng inyong lingkod bilang chairman ng Senate Committee on Basic Education ang pagkakaroon ng sapat na bilang ng science, technology, engineering, and mathematics (STEM) professionals sa ating bansa. Mariin natin itong isinusulong sa pamamagitan ng isang panukala na magkaroon ng mga public math and science high school sa lahat ng probinsya sa ating bansa.

Noong nagdaang linggo, nabigyan tayo ng oportunidad na dumalo sa inauguration ceremony at blessing ng bagong Eastern Visayas Regional Science High School campus sa Catbalogan City, Samar, kung saan nakapaghatid ng donasyon ang ating tanggapan para sa pagpapatayo ng mga gusali sa naturang campus. Sinamahan din natin si Governor Sharee Tan sa inisyal na pagbahagi ng 32 TV sets sa Samar National School, kung saan bahagi ng kabuuang 90 TV sets na ipapamahagi.

Isinusulong natin ang pagkakaroon ng mga public math and science high schools sa lahat ng mga probinsya, lalo na’t mahalaga ang papel ng agham at matematika sa pagtaguyod ng inobasyon sa ating bansa. Bukod dito, mahalaga ring tiyakin natin na ang bawat public math and science high school sa ating bansa ay may sapat na mga kagamitan at pasilidad para sa paghahatid ng dekalidad na edukasyon.

Sa ilalim ng 19th Congress, inihain ng inyong lingkod ang Equitable Access to Math and Science Education Act (Senate Bill No. 476), kung saan imamandato sa mga probinsyang wala pang public math and science high school na magpatayo ng isa. At upang magawa ito, kinakailangang makipagtulungan ng mga probinsya sa Department of Education (DepEd).

Magpapatupad ang mga paaralang ito ng six-year integrated junior-senior high school curriculum na nakatutok sa mga advanced na subject sa science, mathematics, at technology sa ilalim ng paggabay ng DepEd at Department of Science and Technology (DOST).

Para naman sa mga magtatapos sa mga public math and science high school na ito, kinakailangan nilang mag-enroll sa isang apat na taon o limang taong Bachelor’s degree in Science na programa sa isang accredited na kolehiyo o pamantasan.

Sa pagsusulong nito, maiaangat din natin ang performance ng mga kabataang mag-aaral sa mathematical and scientific literacy.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Excellence in Teacher Education Act, sagot sa teacher-subject mismatch

ni Kuya Win Gatchalian @Win Tayong Lahat | Sep. 26, 2024

Hindi natin hahayaang magpatuloy ang suliranin sa hindi pagkakatugma ng mga kursong tinapos ng ating mga guro sa mga subject na itinuturo nila sa mga paaralan.

Kaya nga nariyan ang ating batas na ‘Excellence in Teacher Education Act’ (Republic Act No. 11713) para tugunan itong tinatawag nating teacher-subject mismatch.

Kung inyong matatandaan, iniulat ng Second Congressional Commission on Education (EDCOM II) na 62 porsyento ng mga high school teacher ang nagtuturo ng mga subject na hindi batay sa tinapos nilang kurso sa kolehiyo. Ilan sa mga dahilan sa naturang mismatch ang kakulangan sa mga guro na may kinakailangang specialization sa mga subject. 

Samantala, sinabi noon ni EDCOM II Executive Director Karol Mark Yee na hindi ipinapaalam sa mga aplikante ang mga subject na ituturo sa proseso ng hiring.

Maliban naman sa pagreporma sa hiring process, mahalaga ring mabigyan ng pansin ang pag-usad ng Teacher Education Council (TEC) sa pagtupad ng mandato nito upang matiyak na sapat ang mga kuwalipikadong guro sa mga paaralan. 

Layunin ng Excellence in Teacher Education Act na iangat ang kalidad ng edukasyon at training ng mga guro sa pamamagitan ng mas pinaigting na ugnayan sa pagitan ng iba’t ibang mga ahensya ng pamahalaan, kabilang ang Department of Education (DepEd), Commission on Higher Education (CHED), at Professional Regulation Commission (PRC). 

Kasama rin sa mga mandato ng TEC ang pagbalangkas ng teacher education roadmap na isusumite sa CHED upang maging bahagi ng national higher education roadmap, ang pagtatalaga ng mga pangunahing pamantayan para sa iba’t ibang teacher education programs, ang rekomendasyon ng mga polisiya sa paghikayat ng mga mag-aaral sa high school na kumuha ng kurso sa edukasyon, at ang pagtiyak sa maayos na pagpasok sa trabaho mula kolehiyo hanggang sa pagtuturo.

Ngayong tinutugunan natin ang mga hamon sa sektor ng edukasyon, mahalagang tiyakin natin sa Senate Committee ng Basic Education na nakakatanggap ng dekalidad na edukasyon at pagsasanay ang ating mga guro na humuhubog ng kaalaman at katangian ng mga mag-aaral. Kasabay nito, dapat tiyakin din nating itinuturo nila ang mga paksang naaayon sa kanilang larangan ng espesyalisasyon.

Para matiyak na handa at may sapat na kakayahan ang ating mga guro, mahalagang matiyak na sila ay nabibigyan ng dekalidad na edukasyon at sapat na pagsasanay. Ipinasa natin ang Excellence in Teacher Education Act upang makamit natin ang layuning ito at kailangan nating tiyakin na maayos itong naipapatupad.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mga iskul, dapat tutukan ang digital transformation

ni Kuya Win Gatchalian @Win Tayong Lahat | Sep. 24, 2024

Inihain ng inyong lingkod ang Digital Transformation of Basic Education Act o Senate Bill No. 383 upang walang patid nating maisulong ang digital transformation ng sektor ng edukasyon.

Maliban sa pagpapabilis ng installation at activation ng libreng public WiFi sa lahat ng public schools, imamandato ng naturang panukala sa Department of Education (DepEd) na paigtingin ang kahandaan ng mga paaralan sa information and communications technology (ICT). 

Nakasaad din sa naturang panukala na imamandato sa Department of Science and Technology (DOST) ang pagtulong sa DepEd at Department of Information and Communications Technology (DICT) sa pagsulong sa agham, teknolohiya, at inobasyon.

Ito ay para paigtingin ang pag-aaral at pagtuturo at ihanda ang sektor ng edukasyon sa Fourth Industrial Revolution. 

Ang iba pa nating mga panukala upang isulong ang digitalization sa sektor ng edukasyon ay ang Philippine Online Library Act (Senate Bill No. 477), Public School Database Act (Senate Bill No. 478), at ang One Learner, One Laptop Act (Senate Bill No. 474). 

Umaasa tayong mapapabilis ang proseso ng digitalization sa bansa para matiyak na hindi mapag-iiwanan sa edukasyon ang ating mga kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com