DEPED, pakinggan ang mga titser at opisyal sa pagrepaso sa MTB-MLE

ni Kuya Win Gatchalian - @Win Tayong Lahat | June 08, 2023

Nagkaroon ng konsultasyon ang inyong lingkod sa mga guro mula sa Pangasinan, Davao, Cebu at Metro Manila hinggil sa mother tongue.

Aminado tayong malaking hamon ang pagpapatupad ng polisiya sa mother tongue sa gitna ng napakaraming mga wika sa bansa.

Kaya naman hinihimok natin ang Department of Education o DepEd na pakinggan ang mga guro, supervisor, superintendent, at punong-guro sa pagrepaso sa Mother Tongue-Based Multilingual Education (MTB-MLE).

Base sa ating obserbasyon, may ilang mga guro na hindi bihasa sa paggamit ng mother tongue ang napipilitang gamitin ito sa pagtuturo. Base rin sa mga ulat ng mga guro, nahihirapan ang kanilang mga Grade 4 students sa pag-aaral ng Math at Science gamit ang Ingles. Sa nagdaang apat na taon, pinag-aralan nila ang Math at Science gamit naman ang mother tongue.

Mahigit sa 200 ang wikang naitala ng Philippine Statistics Authority (PSA) sa Census of Population noong 2020. Sa mga paaralan naman na multilingual ang kanilang setting, maaaring diskriminasyon ang maidulot ng MTB-MLE policy sa kanilang mga estudyante na gumagamit ng wika na hindi pareho sa lokal na wikang ginagamit sa pagtuturo.

Sa isang pag-aaral ng Philippine Institute for Development Studies (PIDS), tinukoy dito na ginagamit ng mga paaralan ang mga lokal na wika na maaaring hindi pareho sa ginagamit ng mga mag-aaral sa bahay. Pinuna rin ng nasabing pag-aaral ang kaisipang isa lamang ang unang wika o first language ng mga mag-aaral, kahit na gumagamit ang mga mag-aaral ng maraming unang wika.

Ayon pa sa PIDS, wala pang 10 porsyento sa mga 16,827 na lumahok sa kanilang pag-aaral ang nakapagsagawa ng apat na gawaing kailangan para sa epektibong pagpapatupad ng MTB-MLE. Ang mga ito ay ang pagsusulat ng mga aklat sa wika, panitikan at kultura; dokumentasyon ng ortograpiya ng wika; dokumentasyon ng balarila; at dokumentasyon ng diksyunaryo ng wika.

Ipinatupad na natin ang MTB-MLE mula pa noong 2013, kaya napapanahon na para magsagawa tayo ng pagsusuri kung epektibo nga ito o hindi, at kung paano nito naaapektuhan ang pagkatuto ng ating mga kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Public School Database, para sa mas madaling proseso ng enrollment

ni Kuya Win Gatchalian @Win Tayong Lahat | June 1, 2023

Kasunod ng pagbubukas ng early registration sa mga pampublikong paaralan, muli nating isinusulong ang paglikha ng National Public School Database para sa mas madaling proseso ng enrollment.

Sa ilalim ng ating panukalang-batas na Public School Database Act (Senate Bill No. 478), lilikha ang Department of Education (DepEd) ng National Public School Database na paglalagyan ng impormasyon ng mga mag-aaral. Kabilang dito ang mga school grades, personal na datos, good moral record, improvement tracking, atbp.

Magiging bahagi rin ng National Public School Database ang mga exam score, attendance, at immunization record para sa biographical data ng mga mag-aaral.

Kabilang din dito ang pagproseso ng admission at discharge at paglipat sa ibang mga paaralan. Magkakaroon din ang mga school administrator ng access sa mga datos para magkaroon sila ng napapanahon, akma, at wastong impormasyon na gagabay sa pagtupad nila sa kanilang mga tungkulin.

Kasama rin sa minamandato ng panukala ang DepEd na bumuo at magpatupad ng Database Information Program, kung saan sasailalim sa training ang mga education professionals sa paglikha at pagpapatakbo ng National Public School Database, pati na rin sa paggamit ng impormasyong nakasaad dito.

Kapag naisabatas, malaking pakinabang ito, lalo na’t madaling masira ang mga pisikal na dokumento dahil sa kawalan ng maayos na lalagyan, lalo na kung nagkaroon ng pagbaha, sunog, at iba pang mga sakuna. Kaya naman, kung mailalagay natin sa isang database ang mga datos at impormasyon ng mga mag-aaral, matitiyak ng mga guro at mga school head na madaling mahahagilap ang mahahalagang dokumentong ito.

Bukod dito, mas padadaliin din ng national public school database ang pagmonitor sa pag-usad ng mga mag-aaral sa kanilang edukasyon.

Base sa karanasan natin noong kasagsagan ng pandemya, nakita natin ang napakahalagang papel ng teknolohiya, hindi lamang para sa pag-aaral at pagtuturo kundi pati na rin sa pamamalakad ng ating mga eskuwelahan. Kaya naman bilang Chairman ng Senate Committee on Basic Education, isinusulong ng inyong lingkod ang adhikaing ito para sa kapakanan ng mga kabataan at para matulungan ang ating mga guro at school heads.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

DepEd, LGUs at mga iskul, dapat joint forces sa pagtulong sa K-12 Graduates

ni Kuya Win Gatchalian @Win Tayong Lahat | May 30, 2023

Habang nakatakda ang Department of Education (DepEd) na repasuhin ang pagpapatupad ng senior high school (SHS) program, nais naman nating bigyang-diin ang pangangailangan na tutukan ang kahandaan ng mga graduates sa trabaho o kolehiyo.

Nakakabahala dahil kahit isang dekada na ang lumipas simula nang isabatas ang Enhanced Basic Education Act of 2013 (Republic Act No. 10533) o K to 12 Law, bigo ang programa na tuparin ang pangako nitong ihanda ang mga graduates sa trabaho o sa kolehiyo.

Ang mga graduate ng Technical-Vocational-Track (TVL) strand, halimbawa, ay hindi nakatanggap ng certification matapos ang kanilang graduation na magbibigay sana sa kanila ng mas mataas na tsansang makapasok sa trabaho.

Kapansin-pansin na 6.8% lang ang certification rate sa 473,911 TVL graduates para sa School Year 2020-2021. Sa kabilang banda, sa 32,965 na kumuha ng national certification para sa school year na 'yun, 31,993 o 97.1% ang pumasa.

Dahil maituturing na sagabal para sa mga senior high school graduates ang gastos sa pagkuha ng National Certificate (NC) I o II, iminumungkahi ng inyong lingkod na sagutin na lang ng gobyerno ang certification ng mga senior high school graduates.

Bukod pa rito, kailangan ng ugnayan sa pagitan ng DepEd, Commission on Higher Education (CHED), at Technical Education and Skills Development Authority (TESDA) para matiyak ang mas maayos na transition ng mga senior high school graduates.

Ayon sa isang tracer study ng DepEd, kabilang sa mga isyung kinakaharap ng mga senior high school graduates na nagpatuloy sa kolehiyo ang hirap ng mga subjects at hindi pag-credit sa mga ito. Bagama’t nagpapatupad ang ibang pamantasan ng bridging programs, nagiging dagdag na gastos ito para sa mga mag-aaral at kanilang mga pamilya. Isa pa, hindi lahat ng pamantasan at kolehiyo ay nagpapatupad ng bridging program.

Kaya naman para matugunan ang mga hamon na ito sa senior high school program, inihain natin ang Batang Magaling Act (Senate Bill No. 2022) na layong patatagin ang ugnayan sa pagitan ng DepEd, local government units, mga paaralan, at mga katuwang sa industriya.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com