Pagsulong ng dekalidad na edukasyon ang motibasyon sa karangalang natanggap mula BulSU at PNU

ni Kuya Win Gatchalian @Win Tayong Lahat | June 22, 2023

Isang karangalang matanggap ng inyong lingkod ang honorary Doctor of Laws mula sa Bulacan State University (BulSU) kamakailan. Nakalulugod ang pagkilalang ito sa mga adbokasiya sa edukasyon na ating isinulong at patuloy na isinusulong, kabilang na rito ang ating pagpasa ng Universal Access to Quality Tertiary Education Act (Republic Act No. 10931) o mas kilala bilang free higher education law.

Upang masiguro na magpapatuloy ang edukasyon para sa mga estudyanteng naka-enroll sa mga State Universities and Colleges (SUCs) at Local Universities and Colleges (LUCs), patuloy nating itinutulak ang pagkakaroon ng sapat na pondo para sa maayos na pagpapatupad ng nasabing batas.

Noong nagdaang taon, iniulat ng Commission on Higher Education (CHED) na 1.97 milyong mag-aaral mula sa 220 higher education institutions ang hindi na kinailangang magbayad ng tuition and miscellaneous fees mula School Year (SY) 2018-2019 hanggang SY 2021-2022.

Iniulat din ng CHED na sa naturang mga school year, nasa 364,000 ang nakinabang sa Tulong Dunong Program ng pamahalaan at sa Tertiary Education Subsidy (TES) — isang uri ng tulong pinansyal para sa mga pangangailangang pang-edukasyon, kasama na ang mga aklat, transportasyon, board and lodging, allowances para sa mga disability-related expenses, at iba pa.

Malugod rin nating tinanggap nitong nagdaang Pebrero lang ang honorary degree na Doctor of Education, honoris causa, mula sa Philippine Normal University (PNU). Ito naman ay isang pagkilala sa pagtaguyod natin sa mga batas na tulad ng Excellence in Teacher Education Act (Republic Act No. 11713), GMRC and Values Education Act (Republic Act No. 11476), at Instituting a Policy of Inclusion and Services for Learners with Disabilities in Support of Inclusive Education Act (Republic Act No. 11650).

Kung inyong matatandaan, noong kongresista pa lang tayo ay inihain na ng inyong lingkod ang Free Higher Education Act (House Bill No. 5905). Ito ang unang panukalang batas na nagsulong ng libreng kolehiyo sa mga SUCs. Nang mahalal ang inyong lingkod bilang senador noong 2016, muli nating inihain ang ating panukala na naging ganap na batas noong Agosto 2017.

Taos-puso ang aking pasasalamat sa lahat ng bumubuo ng BulSu para sa pagkilala ng ating mga adbokasiya upang gawing abot-kaya ang edukasyon para sa mga kabataan.

Bilang chairman ng Senate Committee on Basic Education, patuloy nating titiyakin na makatatanggap ang mga kabataang Pilipino ng abot-kaya at dekalidad na edukasyon upang matiyak ang kanilang magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Libreng WiFi sa lahat ng public schools, madaliin

ni Kuya Win Gatchalian @Win Tayong Lahat | June 20, 2023

Ngayong buwan ay ipinagdiriwang natin ang pambansang Information and Communications Technology (ICT) Month. At bilang inyong chairman ng Senate Committee on Basic Education ay patuloy na isinusulong ng inyong lingkod ang digital transformation sa sektor ng edukasyon sa bansa.

Sa ating panukalang batas na Digital Transformation of Basic Education Act (Senate Bill No. 383), makikita natin na nakaayon ito sa Republic Act No. 10929 o Free Internet Access in Public Places Act.

Sa ilalim ng panukala, minamandato ang Department of Information and Communications Technology (DICT) na pabilisin ang paglalagay ng libreng pampublikong WiFi sa lahat ng mga pampublikong paaralan.

Nang tinalakay ang 2023 national budget noong nakaraang taon, nakakadismayang mapag-alaman na halos dalawang porsyento lang pala o 860 sa 47,421 na mga pampublikong paaralan sa bansa ang may free public WiFi batay sa naitalang datos ng Free Public WiFi Dashboard noong Setyembre 2, 2022.

Malaking pinsala rin talaga ang naidulot ng digital divide sa mga nangangailangang mag-aaral habang lumalaban ang lahat sa pandemya ng COVID-19.

Base sa isang pag-aaral ng World Bank noong 2021, 40 porsyento lamang ng mga low-income households ang may access sa internet. Lumabas din sa naturang survey na 95.5 porsyento ng mga sambahayang ito ang gumagamit ng mga papel na modules at learning materials.

Kaya naman para mapabilis ang pagpapatayo ng pambansang imprastraktura para sa ICT, iminamandato rin ng ating panukalang batas sa National Telecommunications Commission (NTC) na tukuyin ang mga lokasyon para sa pagpapatayo ng mga telecommunications tower sites, kung saan bibigyang prayoridad ang mga lugar na hindi pa konektado sa internet.

Sa ilalim ng naturang panukala ay inaasahan ang hakbang ng Department of Education (DepEd) na paigtingin ang kakayahan ng mga paaralan pagdating sa ICT at pagpapatupad ng distance learning. Upang gawing moderno ang tradisyunal na pagtuturo at pag-aaral at ihanda ang sektor ng edukasyon sa Fourth Industrial Revolution, tutulungan ng Department of Science and Technology (DOST) ang DepEd at DICT sa paggamit ng agham, teknolohiya at innovation.

Matapos ang lahat ng mga pinagdaanan natin noong kasagsagan ng pandemya, malinaw na hindi na natin maaari pang ipagpaliban ang modernisasyon at digitalization sa sektor ng edukasyon upang walang mag-aaral ang mapag-iiwanan.

Patuloy nating isusulong ang mga panukalang batas na nagpapalaganap ng paggamit ng teknolohiya sa ating mga paaralan. Kabilang dito ang iba pang inihain nating mga panukalang batas na may kinalaman sa digitalization para sa sektor ng edukasyon tulad ng Philippine Online Library Act (Senate Bill No. 477), Public School Database Act (Senate Bill No. 478) at One Learner, One Laptop Act (Senate Bill No. 474).

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Programa para sa magulang bilang unang guro ng mga kabataan

ni Kuya Win Gatchalian - @Win Tayong Lahat | June 13, 2023

Mahalaga ang papel at pakikilahok ng mga magulang sa edukasyon at growth and development ng kanilang mga anak. Kaya sa ilalim ng bagong batas na ating iniakda, itatatag ng Republic Act No. 11908 o ang Parent Effectiveness Service (PES) Program Act ang naturang programa para tulungan ang mga magulang at parent-substitutes na paigtingin ang kanilang kaalaman at kakayahan upang mas magampanan nila ang kanilang mga tungkulin pagdating sa edukasyon ng mga bata lalo na sa gitna ng mga hamong dulot ng inobasyon, social media, at pagbabago sa mga values.

Itinatatag ng naturang batas ang Parent Effectiveness Service (PES) Program upang linangin ang kanilang kaalaman at kakayahan sa pagtupad ng kanilang tungkulin, pagprotekta sa karapatan ng mga bata, at pagsulong sa positive early childhood development. Layon din nitong tulungan ang mga batang matuto nang husto.

Naging inspirasyon ng batas ang Nanay-Teacher Program ng lungsod ng Valenzuela. Ang programa ay ipinatupad sa tulong ng Synergeia Foundation at nagsimula bilang bahagi ng adbokasiya ng inyong lingkod sa edukasyon noong tayo ay alkalde pa lamang.

Ipatutupad ang PES Program sa bawat lungsod at munisipalidad sa pamamagitan ng kanilang social welfare and development offices at government units. Dito ay bibigyang prayoridad ang mga solo parents at mga parent-substitutes ng mga batang nangangailangan ng tulong, kabilang ang mga children-at-risk, children in conflict with the law, at maging ang mga batang nakaranas ng karahasan.

Kasama naman sa mga module ng programa ang mga paksa tulad ng hamon sa mga magulang, proteksyon ng mga kabataan mula sa pang-aabuso, paglinang sa magandang pag-uugali, kalusugan at nutrisyon, pagpapanatili ng maayos na physical environment, proteksyon ng mga bata sa panahon ng mga sakuna, at pagtaguyod sa kapakanan ng mga batang nagbibinata at nagdadalaga.

Ang mga magulang ang ating unang guro at nananatiling mahalaga ang kanilang tungkulin sa edukasyon ng mga kabataan. Kaya naman bilang chairperson ng Senate Committee on Basic Education ay tutulungan natin sila na maging epektibo sa kanilang ginagampanang papel.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com