Libreng pag-aaral sa kolehiyo, mas palawakin

ni Kuya Win Gatchalian @Win Tayong Lahat | September 11, 2023

Kailangang palawakin natin ang kapasidad ng State Colleges and Universities o SUCs upang mas maraming mga kuwalipikadong mag-aaral ang makinabang sa libreng kolehiyo o ang Universal Access to Quality Tertiary Education Act (Republic Act No. 10931), na mas kilala sa tawag na “free higher education,” upang mabigyan ang mga kabataan ng mas magandang kinabukasan.

Kung titingnan natin ang datos, tumaas ang bilang ng mga mag-aaral sa basic education na nagpatuloy ng pag-aaral sa kolehiyo dahil sa batas. Bago ito naging batas, umabot lamang sa 54% ang progression rate sa high school papuntang kolehiyo para sa Academic Year (AY) 2013-2014, habang 62% naman ang naitala para sa AY 2014-2015.

Ngunit buhat noong nagkaroon ng libreng kolehiyo, pumalo sa 81% ang progression rate ng high school tungo sa kolehiyo mula 2018 hanggang 2022.

Gayunman, may mga mag-aaral na hindi natutuloy mag-enroll kahit nakapasa na sila sa admission exam dahil sa kakulangan ng mga silid-aralan, mga pasilidad, laboratoryo, at mga guro na kinakailangan ng mga mag-aaral. Ito ay base sa naging konsultasyon natin sa mga pangulo ng mga SUCs. Sa madaling salita, may mga kabataan pa rin ang hindi nakikinabang sa libreng matrikula sa kolehiyo na ating ipinanukala kahit kuwalipikado naman sila. Dapat magkaroon ang gobyerno ng estratehiya at plano para tugunan ang mga kakulangang ito.

Sa kabila ng inilalaang pondo para sa libreng kolehiyo nitong mga nagdaang taon, kapansin-pansing hindi pa rin naging sapat ang pagtaas ng capital outlay para sa mga SUCs. Kaya naman sa gitna ng mga panawagang bisitahin at repasuhin ang nasabing batas, mariing isinusulong ng inyong lingkod ang pagpapalawak sa kapasidad ng mga SUCs.

Para sa 2024, humigit-kumulang 51.1 bilyong piso ang kinakailangan para sa pagpapatupad ng free higher education law.

Samantala, hindi na rin kailangang magsagawa ng national screening test upang suriin kung sino ang dapat makatanggap ng libreng kolehiyo dahil mayroon namang sariling admission exam ang mga SUCs at Local Universities and Colleges o LUCs.

Bilang chairman ng Senate Committee on Basic Education, titiyakin natin na sa pamamagitan ng Second Congressional Commission on Education (EDCOM II), patuloy ang ating pagsisikap na patatagin ang basic education sa bansa upang tumaas ang tsansa ng mga bata na makapasok at makatapos ng kolehiyo.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pramis na trabaho sa K-12 graduates, aksyunan

ni Kuya Win Gatchalian @Win Tayong Lahat | September 5, 2023

Isa sa mga balakid kung bakit nahihirapang makahanap ng trabaho ang mga K-12 graduates ng technical-vocational-livelihood (TVL) track ay ang requirement na dapat mayroon silang certification sa senior high school.

Sa mga pagdinig na ating ginawa sa Senado, ipinaliwanag ng Department of Education (DepEd) na ang bayad para sa certification ang isang dahilan kung bakit hindi sila nakakakuha nito.

Kaya isinusulong ng inyong lingkod bilang chairman ng Senate Committee on Basic Education na maglaan ng pondo sa 2024 national budget para sa certification ng mga senior high school na kumuha ng technical-vocational-livelihood (TVL) track.

Sa madaling salita, akuin na lang ng gobyerno ang pagbabayad sa requirement na certification. Dahil dito ay tataas din ang tsansa ng mga graduate ng TVL na makapasok sa trabahong nais nilang pasukan, kagaya ng ipinangako ng K to 12 program.

Nasa 1.52 bilyong piso ang kinakailangan para sa naturang certification ng humigit-kumulang 400,000 na mga mag-aaral ng TVL mula senior high school.

Bukod sa makakatulong ang libreng certification sa kanila na makakuha ng agarang trabaho, matutugunan din nito ang tila “dead end” para sa mga magsisipagtapos ng senior high school.

Kapansin-pansin ang mababang certification rate ng ating mga graduates ng senior high school na kumuha ng TVL track. Sa 486,278 senior high school graduates na kumuha ng TVL track para sa School Year (SY) 2019-2020, ang kumuha lamang ng national certification ay nasa 127,796 at 124,970 ang pumasa. Pero kahit na umabot sa 97.8 porsyento ang passing rate sa mga kumuha ng national certification, lumalabas na umabot lang sa 25.7 porsyento ang certification rate sa mga TVL graduate sa nabanggit na school year.

Bumaba pa noong SY 2020-2021 ang certification rate sa 473,911 ng kabuuang TVL graduates. Para sa school year na nabanggit, 32,965 ang kumuha ng national certification, at 31,993 o 97.1 porsyento ang nakapasa sa national certification. Ngunit lumalabas na 6.8 porsyento lamang ang certification rate para sa taong iyon.

Samantala, isa sa mga itinutulak ng inyong lingkod ang Batang Magaling Act (Senate Bill No. 2367). Dito iminumungkahi ang ugnayan sa pagitan ng DepEd at ng Technical Education and Skills Development Authority (TESDA) para gawing libre ang national competency assessments ng mga senior high school graduates ng DepEd. Gagawaran ng National Certificates (NCs) ang mga makakapasa ng mga assessment na ito bilang pagkilala sa kanilang mga skills and competencies batay sa mga pamantayang itinakda ng TESDA.

Layon din ng Batang Magaling Act ang paglikha sa National at mga Local Batang Magaling Council upang paigtingin ang ugnayan sa pagitan ng DepEd, local government units, mga paaralan, at mga katuwang sa industriya para tugunan ang mismatch sa skills ng K to 12 graduates at pangangailangan ng labor market.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Digital education, para sa mas mataas na antas ng pagtuturo

ni Kuya Win Gatchalian @Win Tayong Lahat | August 29, 2023

Mahalaga na magpatuloy ang edukasyon anumang hamon ang dumating sa buhay ng ating mga kabataang mag-aaral. Bilang chairman ng Senate Committee on Basic Education, isinusulong ng inyong lingkod ang makabago at alternatibong paraan ng pagtuturo, kabilang na ang online learning.

Matatandaan na inihain natin ang Digital Transformation of Basic Education Act (Senate Bill No. 383) noong nakaraang taon, kung saan layon nitong isulong ang digital transformation sa sektor ng edukasyon sa bansa. Sa ilalim ng panukalang batas, bibigyan ng mandato ang Department of Education (DepEd) na patatagin ang kakayahan sa Information and Communication Technologies (ICT) ng mga public at private schools upang magpatupad ng distance learning.

Nakasaad din sa naturang panukala na tutulungan ng Department of Science and Technology (DOST) ang DepEd at ang Department of Information and Communications Technology (DICT) sa paggamit ng agham, teknolohiya, at inobasyon sa pag-aaral at pagtuturo.

Bukod dito, ihahanda rin ang sektor ng edukasyon sa Fourth Industrial Revolution o pag-usbong ng digitalization, connectivity, artificial intelligence (AI) at teknolohiya. Sa pamamagitan nito, maisusulong ang malawakang pagbabago sa paraan ng edukasyon at pagkatuto ng mga mag-aaral.

Kaya kung maantala man ang klase, halimbawa, sa loob ng dalawang linggo, mainam na mayroon nang alternatibong paraan ng pagtuturo. Kailangan maging handa tayo sa anumang sitwasyon upang patuloy na makapagturo ang ating mga guro at patuloy na matuto ang ating mga mag-aaral. Ito ang realidad na dapat nating harapin.

Kamakailan lang ay inihain din natin ang Proposed Senate Resolution No. 689, upang suriin naman ang kahandaan ng ating mga paaralan para sa Academic Year 2023-2024.

Layunin ng gagawing pagsusuri ang pagiging epektibo at ang mga hamong kinakaharap ng pagpapatupad ng face-to-face classes at pag-aaral gamit ang mga alternative delivery modes. Kabilang din sa konsiderasyon ang banta ng El Niño at ang panawagang ibalik sa Abril at Mayo ang bakasyon ng mga bata.

Kailangan natin ng pormal na polisiya, lalo na ng mga iminumungkahing panukalang batas, upang hindi maantala ang pag-aaral ng mga kabataan at patuloy na makapagturo ang ating mga guro.

Magkakatuwang tayo sa pagkamit ng mataas na antas ng edukasyon tungo sa maunlad at makabagong kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com