Dagdag-pondo sa programa para sa edukasyon ng mga bata

ni Kuya Win Gatchalian @Win Tayong Lahat | October 19, 2023

Dahil mas malapit ang mga local government units (LGUs) sa ating mga kababayan at mas nauunawaan nila ang mga agarang pangangailangan ng mga kabataang Pilipino, mahalaga na patatagin ang papel ng mga LGUs sa paghahatid ng dekalidad na edukasyon.

Kaya naman isinusulong ko bilang chairman ng Senate Committee on Basic Education ang 21st Century School Boards Act (Senate Bill No. 155) na naglalayong palawakin ang responsibilidad ng ating mga local school board, kabilang na ang pag-angat sa kalidad ng edukasyon ng mga mag-aaral.

Ang mungkahi na ito ay inspirasyon mula sa mga adbokasiya ng yumaong lider at lingkod bayan na si Jesse M. Robredo at sa mga pagsisikap at inisyatibo ng Synergeia Foundation. Hangad ni Robredo na baguhin ang lokal na komite ng paaralan upang magkaroon ng “large-scale systemic reforms” sa isang sentralisadong pamamahala ng pampublikong sistema ng edukasyon.

Nais din nating palawakin ang paggamit ng Special Education Fund (SEF). Sa ilalim ng Local Government Code (Republic Act No. 7160), nakalaan ang SEF para sa local school board upang magamit sa pagpapatakbo ng mga pampublikong paaralan, at pagpapatayo at pagkumpuni ng mga school building.

Isinusulong din natin ang paggamit nito bilang pansahod sa mga guro at non-teaching personnel sa mga pampublikong paaralan, sahod ng mga pre-school teacher, at capital outlay para sa mga pre-school. Bahagi rin ng panukalang pagpapalawak sa gamit ng SEF ang pagpapatakbo ng mga programa sa Alternative Learning System (ALS), pati na sahod at mga benepisyo ng mga guro sa mga karagdagang serbisyo sa labas ng regular school hours, at iba pa.

Naalala ko noong nanunungkulan pa ako bilang alkalde ng Lungsod ng Valenzuela ng siyam na taon, isinulong natin ang mga reporma sa edukasyon. Sa aking naging karanasan, masasabi kong talagang mabilis ang mga LGUs sa pagtugon sa mga pangangailangan ng kanilang mga nasasakupan. Kaya kung maisasabatas ang ating panukala, magiging katuwang natin ang bawat LGU sa pag-angat sa kalidad ng edukasyon.

Sa ilalim ng panukala ng inyong lingkod, bibigyan ng mandato ang local school board na magpatupad ng mga programa na susukatin ang tagumpay batay sa participation rate ng mga mag-aaral, bilang ng mga dropouts at mga out-of-school youth, achievement score sa mga national test o assessment tools, pagpapatayo ng mga child development centers, suporta sa special needs education, ALS, at ang parent effectiveness service program.

Naghain din ang inyong lingkod ng iba pang mga panukalang batas na naglalayong mapalawak ang papel ng mga LGU sa edukasyon. Isang halimbawa ang Basic Education and Early Childhood Education Alignment Act (Senate Bill No. 2029) na isinusulong ang pagpapatupad ng mga programa para sa early childhood care and development programs.

Kabilang dito ang panukalang karagdagang pondo upang matiyak natin ang kalidad ng Early Childhood Care and Development (ECCD) services na matatanggap ng mga bata.

Ipinapanukala rin ang pagtatalaga ng mga LGU ng mga plantilla positions para sa mga child development workers at child development teachers at pagsusulong ng kanilang professional development.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

SOCMED, may tulong sa pag-aaral at pagtuturo

ni Kuya Win Gatchalian @Win Tayong Lahat | October 17, 2023

Social media — araw man o gabi, ito na ang puntahan ng lahat ngayon, lalo na ng mga kabataang Pilipino.

Kaya nga puwede nating pakinabangan itong social media platform upang maabot ang mga bata para sa pagpapatuloy ng kanilang edukasyon lalo na sa gitna ng mga krisis tulad ng pandemya ng COVID-19.

Napapanahon ito at nagsisilbing malaking tulong para sa mga mag-aaral at mga guro lalo na’t sinisikap ngayon ng ating pamahalaan na gawing mas matatag at makabago ang sektor ng edukasyon.

Maraming mga aral ang mapupulot mula sa naging karanasan natin noong kasagsagan ng pandemya. Isang halimbawa na rito ang karanasan sa Lungsod ng Valenzuela na kung tawagin ay “Valenzuela Live”, kung saan gumamit sila ng Facebook at YouTube para sa pag-aaral at pagtuturo. Mayroon ding Facebook groups bilang alternative learning management systems para sa “Nanay-Teacher Program.” Bukod dito ay nagpamahagi rin ng 23,500 na tablets ang lokal na pamahalaan ng Valenzuela upang matulungan ang mga nangangailangang mag-aaral sa lungsod.

Siyempre, kung gagamitin ang social media sa kanilang pag-aaral, dapat kaakibat nito ang maayos na imprastraktura sa internet.

Ayon sa 2020 COVID-19 Low Income Household Panel and Economic (HOPE) Survey ng World Bank Philippines, 60 porsyento sa 25 porsyento na pinakamahihirap na households ay walang access sa internet. Lumabas din sa survey na 98 porsyento ng mga mag-aaral sa naturang mga kabahayan ay piniling gumamit ng self-learning modules bilang kanilang pangunahing paraan ng pag-aaral noong kasagsagan ng pandemya.

Ayon sa Digital Report 2022 tungkol sa Pilipinas, lumalabas na may 92.05 milyong social media users sa Pilipinas sa pagsisimula ng 2022, katumbas ang 82.4 porsyento ng kabuuang populasyon ng bansa. Batay sa datos ng Meta, may 83.85 milyong gumagamit ng Facebook sa bansa sa simula ng 2022. Sa mga gumagamit ng Facebook, 42 porsyento ang nasa edad 13-24 at bahagi ng itinuturing na student age group.

Kaya naman para matuldukan na ang digital divide sa ating bansa ay inihain ng inyong lingkod ang mga panukalang batas tulad ng Digital Transformation in Basic Education Act (Senate Bill No. 383) at ng One Learner, One Laptop Act (Senate Bill No. 474).

Kalahati ng ating populasyon na may edad 13 hanggang 24 ay nasa Facebook. Kung nasaan sila, dapat ay nandu’n din tayo at ang buong sektor ng edukasyon nang sa ganu’n ay masuportahan natin ang kanilang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pagtuturo sa Kinder-Grade 3, gamitin na rin ang ingles

ni Kuya Win Gatchalian @Win Tayong Lahat | October 12, 2023

Kamakailan ay inihain ko ang Senate Bill No. 2457 upang tugunan ang mga hamong bumabalot sa pagpapatupad ng Mother Tongue-Based Multilingual Education (MTB-MLE).

Layon nitong palitan ang saklaw ng paggamit ng mother tongue bilang medium of instruction o wika ng pagtuturo.

Iminumungkahi natin na maliban sa mga monolingual classes mula Kindergarten hanggang Grade 3, ang pagtuturo ng basic education ay magpapatuloy gamit ang Filipino. Kapag itinakda naman ng batas, puwede ring gamitin ang Ingles. Ito ay naaayon sa Section VII, Article XIV ng 1987 Constitution. ‘Pag sinabi nating monolingual class, ito ang mga grupo ng mga mag-aaral na nagsasalita ng parehong mother tongue at naka-enroll sa parehong baitang sa partikular na school year.

Ang panukala ng inyong lingkod ay gamitin ang mga lokal na wika bilang auxiliary media of instruction o pantulong na wika sa pagtuturo. Ito ay mas flexible na pamamaraan na nakasaad mismo sa Saligang Batas.

Sa ilalim ng ating panukalang batas, magpapatuloy ang mga prinsipyo at framework ng MTB-MLE sa mga monolingual classes, o sa mga pangkat ng mga mag-aaral na gumagamit ng parehong wika o mother tongue, at naka-enroll sa parehong grade level.

Kung inyong matatandaan, naging institutionalized ang MTB-MLE sa ilalim ng Enhanced Basic Education of 2013 (Republic Act No. 10533) o ang K to 12 Law.

Bagama’t merong 245 na nakatalang wika sa ilalim ng 2020 Census of Population and Housing, mayroong 19 na wika lamang na ginagamit ang Department of Education (DepEd) sa pagpapatupad ng MTB-MLE. Kapansin-pansin din na ilan sa mga pinaka-ginagamit na wika tulad ng Boholano, Masbateño, at Kankanaey ay hindi kasama sa 19 wika na ipinapatupad ng DepEd.

Kung babalikan natin ang apat na naging pagdinig na ginawa ng Senado patungkol sa pagpapatupad ng MTB-MLE, napag-alaman natin na lahat ng mga pag-aaral na ipinakita sa paggamit ng mother tongue ay isinagawa sa mga lugar na gumagamit lamang ng isang wika.

Mistulang naging eksperimento ang MTB-MLE sa ating bansa sa pagpapatupad ng mother tongue sa mga lugar na maraming wika.

Lumabas din sa isang pag-aaral ng Philippine Institute for Development Studies (PIDS) noong 2019 na siyam na porsyento lamang sa mga mag-aaral na nakilahok sa isinagawang survey ang nakatupad sa 4-minimal requirement para sa maayos na pagpapatupad ng MTB-MLE. Ito ay ang pagsusulat ng mga aklat sa wika, panitikan, at kultura; pagdodokumento sa ortograpiya ng wika; pagdodokumento sa balarila ng wika; at pagsusulat ng diksyunaryo ng wika.

Bilang chairman ng Senate Committee on Basic Education, tututukan natin ang paksang ito dahil ang nakasalalay dito ay ang kalidad ng edukasyon na natatanggap ng ating mga mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com