P3M multa at habambuhay kulong sa nakilahok sa hazing, ipatupad

ni Kuya Win Gatchalian @Win Tayong Lahat | October 31, 2023

Sa paglipas ng maraming taon, kabi-kabila ang mga balitang mga napahamak sa pagsali sa fraternity o sorority.

Kaya kahit na maganda naman ang adhikain ng isang samahan, nasisira ito dahil sa pag-abuso ng kapangyarihan. Ang pinakahuling napaulat na biktima ng isang “brotherhood” ay ang 25-taong gulang na Criminology student na si Ahldryn Lery Bravante. Siya ay namatay dahil sa umano hazing ng mismong mga kasama niya sa kapatiran.

Malinaw sa kasalukuyang batas na wala nang initiation rites o practices ang papayagan pang isagawa sa mga fraternity at sorority maliban lamang kung may pahintulot ng nangangasiwa at namamahala sa mga paaralan o pamantasan. Mahigpit na ipinagbabawal ng batas ang pananakit gaya ng paddling, paglalatigo, pambubugbog, paglalagay ng tatak, sapilitang pagpapaehersisyo, pagpapabilad sa araw, sapilitang pagpapainom ng alak, at pagpapagamit ng droga.

Sa Anti-Hazing Act of 2018 (Republic Act No. 11053), kung saan kasama tayo sa mga pangunahing may akda, sinasabi rito na obligasyon ng mga paaralan na protektahan ang mga mag-aaral mula sa hazing. Ipinagbabawal ng batas ang lahat ng anyo ng hazing sa mga fraternity, sorority, at organisasyon sa mga paaralan, kabilang ang citizens’ military training at citizens’ army training. Reclusion perpetua o habambuhay na pagkakabilanggo at multang P3 milyon ang ipapataw sa sino mang nagplano o nakilahok sa hazing na nagdulot ng pagkamatay, rape, sodomy, at mutilation.

Sa ilalim ng anti-hazing law, may mandato ang mga paaralan na maglunsad ng mga information campaign para sa mga mag-aaral, mga magulang, at guardian ukol sa mga pinsalang dulot ng hazing. Ang mga paaralan ay itinuturing na pangalawang tahanan ng mga estudyante. Kaya naman tungkulin ng mga eskwelahan na protektahan ang mga mag-aaral sa anumang kapahamakan.

Sa pamamagitan ng mas matibay na pangangasiwa at pagsunod sa batas, masisigurado na walang edukasyong maaantala at masasayang sa mga kabataang mag-aaral dahil sa matinding pinsalang idinulot ng hazing.

Nakikiisa tayo sa mga pamilya ng biktima ng hazing sa paghahangad ng hustisya.

Nananawagan din tayong muli sa mga alagad ng batas na tiyaking mahuhuli ang mga sangkot sa pagkamatay ng mga kawawang biktima ng hazing.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Hiwalay na ahensya para sa mas maayos na education assessment

ni Kuya Win Gatchalian @Win Tayong Lahat | October 26, 2023

Pagdating sa datos at pagsasaliksik, mahalaga na magkaroon tayo ng check and balance upang masuri nating maigi ang kalidad ng edukasyon sa bansa.

Kaya naman maghahain ang inyong lingkod ng isang panukalang batas na layong magtatag ng isang hiwalay na ahensya na siyang magsasagawa ng assessment sa performance ng ating mga kabataang mag-aaral pagdating sa edukasyon.

Kung titingnan nating maigi, ito ang kasalukuyang proseso: ang Department of Education (DepEd) ang bumubuo at nagpapatupad ng curriculum, ito rin ang nagsasagawa ng assessment, sumusuri sa datos, at batay sa mga nagiging resulta ng pag-aaral, mismong DepEd din ang nagwawasto sa sarili nito. Bakit kailangan pang iwasto ng DepEd ang sarili nito kung ito rin mismo ang gumagawa at nagpapatupad ng curriculum? Kaya marapat lamang na magkaroon ng isang independent body na siyang magsasagawa ng assessment, susuri ng mga resulta, at magbibigay ng mga rekomendasyon sa DepEd.

Isang halimbawa nito ang Australia. Mayroon silang National Assessment Program-Literacy and Numeracy (NAPLAN) na sumusukat at sumusuri sa literacy at numeracy ng mga batang Australians. Ang NAPLAN ay itinatag ng Australian Curriculum, Assessment and Reporting Authority, isang hiwalay na tanggapan para sa pagbuo ng national curriculum, national assessment program, at national data collection and reporting program.

Sa Finland naman, isinasagawa ng Finnish Education Evaluation Centre (FINEEC) ang mga evaluation mula early childhood education hanggang sa kolehiyo. Isang malayang ahensya ang FINEEC na ginagabayan ng national education evaluation plan ng Finland.

Taong 1991 pa noong magbigay ang unang Congressional Commission on Education (EDCOM I) ng rekomendasyon na lumikha at magkaroon ng isang malayang national testing and evaluation agency na bubuo, magsasagawa, at magsusuri sana ng mga national achievement tests.

Inirekomenda rin ng EDCOM I noon na magsasagawa at susuri rin sana ng pinaplanong independent body ng iba pang mga test o pagsasanay sa kakayahan, talino, personalidad, equivalency, at mga pambansang scholarships. Nakakalungkot lang na hindi naisakatuparan ang pagbuo ng ahensyang ito.

Ang problema sa atin ay wala tayong organisado at sentralisadong data bank sa kabila ng pagsasagawa ng maraming mga test tulad ng Early Language, Literacy and Numeracy Assessment (ELLNA), National Achievement Test (NAT), Comprehensive Rapid Literacy Assessment (CRLA), Philippine Informal Reading Inventory (PHIL-IRI), at iba pa.

Wala tayong regular at sistematikong pagsusuri ng assessment data upang magabayan ang mga kasalukuyang polisiya sa edukasyon. Hindi rin ibinabahagi sa publiko ang mga assessment dataset para sa pagsusuri, bagay na nagdudulot ng kawalan ng malinaw at napapanahong feedback mechanism sa datos ng assessment ng mga mag-aaral, mga guro, mga eksperto, mga policymakers, at iba pang mga katuwang sa edukasyon.

Marami ang kailangang ayusin pagdating sa pagsusuri ng kakayahan at performance ng kabataang Pilipino sa kanilang pag-aaral. Bilang chairman ng Senate Committee on Basic Education, tungkulin kong maiangat ang kalidad ng kanilang pagkatuto. Sa pamamagitan ng angkop na mga panukala at polisiya, sisikapin nating matupad ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Training sa mga titser para ready sa bagong kurikulum

ni Kuya Win Gatchalian @Win Tayong Lahat | October 24, 2023

Isang dahilan kung bakit pinaiigting natin ang pagkakaroon ng Teacher Education Council o TEC ay dahil sa kawalan ng koneksyon sa pagitan ng edukasyon ng mga guro noong sila ay nasa kolehiyo pa at kapag nagtuturo na sila sa mga paaralan. Ang nagiging problema, ituturo ng ating mga guro sa kanilang mga mag-aaral ang isang curriculum na hindi naman nila ginamit sa pagsasanay nila sa kolehiyo. Ito ngayon ang isa sa kinakaharap na suliranin ng sistema ng edukasyon sa bansa.

Kaya naman mariing iginigiit ng inyong lingkod ang panawagan sa TEC na siguruhing nakahanay ang pagsasanay at edukasyon ng mga guro sa kalulunsad lamang na K to 10 MATATAG curriculum.

Sa ilalim ng Excellence in Teacher Education (Republic Act No. 11713), ang Kalihim ng Edukasyon ang itinalagang chairperson sa pinaigting na Teacher Education Council na may mandatong iangat ang pagsasanay at edukasyon ng mga guro. Mandato rin ng TEC na magtalaga ng basic requirements para sa mga teacher education programs o kurso sa edukasyon.

Nakasaad din sa batas na tungkulin ng TEC na paigtingin ang ugnayan sa pagitan ng Department of Education (DepEd), Commission on Higher Education (CHED), at Professional Regulation Commission (PRC) upang matiyak ang ugnayan ng pre-service o ‘yung training at edukasyon ng mga guro mula kolehiyo hanggang sa in-service o ‘yung panahon na nagtuturo na sila sa mga paaralan.

Bahagi ng responsibilidad at kapangyarihan ng Council na iugnay ang bagong curriculum sa mga polisiya, pamantayan, at mga guidelines sa mga kurso ng edukasyon sa kolehiyo.

Sa ilalim din ng naturang batas, ang Quality Pre-service Teacher Education Office, ay minamandatong makipag-ugnayan sa iba’t ibang Teacher Education Institutions (TEIs) upang magbahagi ng mga pinagkukunang resources, kasanayan, pananaliksik, at iba pang mga pinakamahusay na pamamaraan para mapagbuti ang mga teacher education programs.

Iminamandato rin ang pagsasagawa ng pagsusuri para sa intelligent assessment ng Council sa nilalaman ng pagsusulit para sa licensure exam ng mga guro.

Muli rin nating hinihimok ang DepEd na tiyaking may pormal na dokumentasyon at pag-aaral sa pilot run ng MATATAG K to 10 curriculum, na sinimulan noong Setyembre 25 sa 35 na piling paaralan sa pitong rehiyon. Makakatulong sa polisiya ng DepEd ang magiging mga aral mula sa pilot implementation—kabilang na ang feedback mula sa mga mag-aaral at mga guro. Dapat ding tiyakin nating handa ang mga dekalidad na learning materials hanggang sa maipatupad nang ganap ang bagong curriculum.

Kailangan nating kumilos lalo na’t may bago tayong curriculum. Sa pagsugpo natin sa krisis na bumabalot sa sektor ng edukasyon, mahalagang magarantiya natin na handa at may sapat na kakayahan ang ating mga guro.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com