Batas sa Book Publishing, i-update para ‘di mapag-iwanan sa digitalization

ni Kuya Win Gatchalian @Win Tayong Lahat | December 12, 2023

Hindi kaila ang paglobo ng mga oportunidad para sa paggamit ng digital books.

Isinusulong ng inyong lingkod ang isang oversight review o pagrepaso sa Book Publishing Industry Development Act (Republic Act No. 8047) para tiyakin kung nakakasabay ang book publishing industry ng Pilipinas sa pagbabago ng panahon at sa digitalization.

Sa isang naganap na pagdinig sa panukalang National Reading Month Act (Senate Bill No. 475), ito ang ating tinanong sa mga stakeholder: Nakatutok ang batas na lumikha ng National Book Development Board (NBDB) sa mga printed na aklat, pero paano tayo makakasabay sa digitalization? Paano natin mahihikayat ang mga publishers na maging digital? At paano natin paiigtingin ang access ng publiko sa impormasyon lalo na’t digital na lahat ngayon?

Base kay Atty. Jane Blessilda Fabula mula sa Office of the Executive Director ng NBDB, walang programa sa kasalukuyan ang ahensya upang suportahan ang digitization ng mga aklat. Nababahala raw kasi ang mga stakeholder dahil sa mga copyright infringement issues. Kaya magsasagawa tayo ng oversight sa mandato ng NBDB para suriin kung tumutugon nga ba sila sa mga pagbabago ng panahon.

Ang mandato ng Book Publishing Industry Development Act sa NBDB ay bumuo ng mga plano, programa, mga polisiya at pamantayan sa paglikha, produksyon, at distribusyon ng mga aklat. Bahagi rin ng mga responsibilidad ng Board ang pagsasagawa ng pananaliksik tungkol sa book publishing industry, kabilang ang monitoring at paglikom ng datos at impormasyon sa produksyon ng mga aklat.

Ayon sa 2019 Southeast Asia Primary Learning Metrics (SEA-PLM), walo sa 100 mag-aaral sa Grade 5 ang nagbabahagi ng kanilang mga reading at mathematics textbooks sa dalawa pang mga mag-aaral. Lumabas sa naturang pag-aaral na mas mataas ang marka sa Reading, Writing, at Mathematics ng mga mag-aaral na may sariling textbook.

Ngunit sa isang pagdinig na isinagawa ng Second Congressional Commission on Education (EDCOM II), humaharap sa maraming hamon ang produksyon ng mga textbook para sa mga pampublikong paaralan. Ayon kay NBDB Officer-In-Charge Division Chief Kevin AnselDy, inaabot ng tatlo hanggang limang taon ang proseso ng rebisyon na tumatagal lamang dapat ng 180 araw.

Kabilang sa mga dahilan ng matagal na proseso ng rebisyon ang magkakatunggaling mga komento at ang kawalan ng buong atensyon mula sa Bureau of Curriculum and Development ng Department of Education (DepEd). Sabi ng NBDB, kinakailangan din ang kompetisyon sa industriya upang matiyak na may mga dekalidad na materyal na magagamit ang mga mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Revised Magna Carta for Public School Teachers, proteksyon at solusyon sa mga problema sa edukasyon

ni Kuya Win Gatchalian @Win Tayong Lahat | December 7, 2023

Nakasalalay sa ating teachers ang tagumpay ng sektor ng edukasyon, ngunit patuloy silang dumaranas ng iba’t ibang mga pagsubok sa pagtupad ng kanilang tungkulin.

Kaya naman para matugunan ang mga bago at patuloy na mga hamong kinakaharap ng mga public school teachers, inihain ng inyong lingkod ang Revised Magna Carta for Public School Teachers (Senate Bill No. 2493) na layong amyendahan ang Magna Carta for Public School Teachers (Republic Act No. 4670). Lumipas na kasi ang 57 taon mula noong maisabatas ito kaya kailangan nang i-revise at gawing mas angkop sa pangangailangan ng mga guro sa kasalukuyang panahon.

Maraming panukalang pagbabago ang nilalaman ng Senate Bill No. 2493 para matiyak na naitataguyod, nabibigyan ng proteksyon, at nirerespeto ang karapatan at kapakanan ng mga guro sa mga pampublikong paaralan.

Kasama rito ang mga sumusunod: ang pagbibigay ng calamity leave, mga educational benefits, at longevity pay; mga kondisyon sa pagbibigay ng special hardship allowance; mas maayos na criteria pagdating sa sahod; proteksyon ng mga guro mula sa mga out-of-pocket expenses; at iba pa. Iminumungkahi rin natin na ipantay ang mga sahod, benepisyo, at work condition ng mga probationary teachers sa entry-level teachers.

Nakasaad din sa panukala na babawasan ang oras ng pagtuturo ng mga public school teachers.

‘Yung dating anim na oras, isinusulong ng inyong lingkod na gawing apat na lang. Pero sa mga pagkakataong kinakailangan, maaaring magtrabaho ng hanggang walong oras ang mga guro. Sa ganitong sitwasyon, makakatanggap sila ng dagdag na omentong magiging katumbas ng kanilang regular na sahod at may dagdag na 25 porsyento ng kanilang basic pay.

Sa ilalim din ng panukalang batas, ipinagbabawal ang pagbibigay ng mga non-teaching task sa mga guro. Kung ang isang teacher naman ay naka-leave, pahihintulutan ang pag-hire ng substitute teacher.

Bukod dito, ipagbabawal ang pagtanggal sa mga permanent teachers nang walang sapat na dahilan at due process. Maaaring maibalik sa trabaho at makatanggap ng backwages ang mga permanent teachers na naaalis sa trabaho sa hindi makatarungang paraan. Titiyakin din ang confidentiality ng disciplinary actions sa mga guro. Layon din ng panukalang batas na magkaroon ng ugnayan sa pagitan ng Department of Education (DepEd) at Public Attorney’s Office (PAO) upang mabigyan ng serbisyong legal ang mga gurong humaharap sa mga reklamo at demanda na may kinalaman sa kanilang trabaho.

Bubuo naman ang DepEd ng Code of Ethics para sa mga guro sa public schools.

Ipagbabawal din ang anumang uri ng diskriminasyon at itataguyod ang gender equality.

Kung maisabatas ang panukalang ito, patuloy na maisusulong ang ating adbokasiya na matugunan ang pangangailangan ng mga guro at maitaguyod ang kanilang kapakanan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Web-based apps, online educational platforms, digital libraries, etc., gawing libre

ni Kuya Win Gatchalian @Win Tayong Lahat | December 5, 2023

Patuloy na isinusulong ng inyong lingkod ang kultura ng pagbabasa sa pamamagitan ng digitalization.

Kailangan nating harapin ang realidad na malawakan na ang paggamit natin ng digital technology.

Kung gusto natin ng agarang impormasyon sa panahon ngayon, madali lang nating nakukuha ito sa pamamagitan ng cellphone. Kaya, paano natin ngayon pagsasama-samahin ang digitalization, paggamit ng teknolohiya, at access sa mga aklatan o library?

Base kay Dr. Dolores Carungui, Chief Librarian ng Reference Division ng National Library of the Philippines (NLP), puwede nang ma-access ang online public access catalog sa website ng NLP at sa iba pang mga school at public libraries. Ang online public access na ito ay maaari ring magamit para humanap ng mga digital copies ng iba’t ibang mga resources, kabilang na ang mga electronic resources para sa mga bata. Dagdag pa niya, may humigit-kumulang na isang milyong pahina ang dumaan na sa digitization.

Nito lang Nobyembre 2023, may 1,660 na pampublikong mga aklatan ang naiuugnay sa NLP.

Meron ding 56 na mga provincial library, tatlong congressional library, tatlong locally-funded projects, isang regional library na matatagpuan sa Bangsamoro Autonomous Region of Muslim Mindanao (ARMM), 116 na aklatan sa mga siyudad, 611 sa mga munisipalidad, at 870 na mga barangay reading center.

Balak namang gawin ng inyong lingkod na bahagi ng panukala ang pagtiyak ng access sa catalog na ito. Titiyakin natin ang access sa mga aklatang ito upang isulong ang kultura ng pagbabasa, gawing komprehensibo ang pagsulong natin nito, at tiyaking magagamit ng mas marami ang parehong pisikal at digital na kopya ng mga materyal.

Sa ilalim ng inihain nating panukalang batas na National Reading Month Act (Senate Bill No. 475), isasagawa sa buwan ng Nobyembre ang mga pambansang programang may kinalaman sa pagbabasa. Dito, binibigyan ng mandato ang Department of Education (DepEd) na siyang magiging pangunahing ahensya sa pagbuo ng mga polisiya at estratehiya na magsusulong ng pagbabasa. Maihahanda rin nito ang mga kabataan sa panghinaharap pagdating sa pagbuo ng polisiya at iba pang paraan upang makatulong sa kaunlaran ng ekonomiya, lipunan, at kultura.

Upang palawakin ang access sa mga libro at iba pang mga learning materials, iminungkahi rin natin na tiyakin ng mga Public Telecommunications Entities (PTEs) ang libreng access sa mga learning management systems applications ng DepEd. Kabilang dito ang mga web-based applications, online educational platforms, digital libraries, at iba pang mga online knowledge hubs ng DepEd. Sa ilalim ng panukala natin, hindi papatawan ng data charges ang pag-download at pag-upload sa mga application na ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com