top of page
Search
BULGAR
Dec 21, 2023

Batas laban sa bullying ipatupad, panukalang mangangalaga sa mental health ng estudyante suportahan

ni Kuya Win Gatchalian @Win Tayong Lahat | December 21, 2023

Alam naman natin na ang bullying ay nagdudulot ng mababang self-esteem, kawalan ng kumpiyansa, at kahirapan sa pag-focus sa pag-aaral ng mga biktima nito. Maaari ring maapektuhan ang kanilang emosyonal na kalagayan na puwedeng magresulta sa pagbaba ng interes sa kanilang pag-aaral.

 

Nakita natin ito sa resulta ng 2022 Programme for International Student Assessment o PISA kung saan bumaba ng 11 hanggang 44 puntos ang marka sa Mathematics ng mga mag-aaral na nakaranas ng bullying sa loob ng isang buwan.

 

Batay sa datos ng 2022 PISA, nananatiling problema ang bullying, lalo na sa mga lalaking mag-aaral at sa mga pampublikong paaralan. Sa katunayan, ayon sa naturang assessment, isa sa tatlong mag-aaral na Pilipino ang nakararanas ng bullying nang hindi bababa sa isang beses sa loob ng isang linggo. Ang PISA ay isang pag-aaral na isinasagawa ng Organization for Economic Co-Operation and Development (OECD) kung saan sinusuri nila ang kakayahan ng mga mag-aaral na 15 taong gulang.

 

Gayunpaman, bumaba na ang bilang ng mga naitalang pambu-bully. Ayon pa sa pinakahuling PISA, mula 50 porsyento noong 2018, bumaba sa 28 porsyento noong 2022 ang bilang ng mga mag-aaral na iniulat na pinagkatuwaan sila ng kanilang mga kapwa mag-aaral. Mula 35 porsyento noong 2018, bumaba sa 19 porsyento noong 2022 ang bilang ng mga mag-aaral na nagsabing pinagbantaan sila ng ibang mga mag-aaral.


Noong 2018, 33 porsyento ng mga mag-aaral ang nag-ulat na sinadya silang iwan sa ere ng ibang mga mag-aaral. Noong nakaraang taon, bumaba sa 14 porsyento ang bilang ng mga mag-aaral na nag-ulat ng parehong karanasan.

 

Ayon sa Department of Education (DepEd), 21,521 ang naitalang kaso ng bullying noong School Year (SY) 2018-2019. Bumaba ito sa 11,637 noong SY 2019-2020 — posibleng dahil sa pagpapatupad ng distance learning.

 

Bilang chairman ng Senate Committee on Basic Education, patuloy na isinusulong ng inyong lingkod ang mga programa para sa proteksyon at kapakanan ng mga kabataan. 

 

Ipinapanawagan natin ang epektibong pagpapatupad ng Anti-Bullying Act of 2013 (Republic Act No. 10627). Kung inyong matatandaan, pinangunahan natin noong Pebrero ang pagrepaso sa pagpapatupad ng Anti-Bullying Act of 2013, kung saan hinimok natin ang DepEd na paigtingin ang mga mekanismo nito para sa pag-uulat ng mga insidente kaugnay ng pambu-bully. 

 

Isinusulong din natin ang pagsasabatas ng Basic Education Mental Health and Well-Being Promotion Act (Senate Bill No. 2200). Layon ng panukala na gawing institutionalized ang School-Based Mental Health Programs. 


 

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

0 comments
BULGAR
Dec 19, 2023

Kapag maayos ang kalagayan ng guro, maayos ang kalidad ng edukasyon

ni Kuya Win Gatchalian @Win Tayong Lahat | December 19, 2023

Naniniwala tayo na mahalaga ang suportang natatanggap ng mga estudyante mula sa kanilang mga guro. 


Isa sa mga pinakamahalagang dahilan kung bakit hindi umurong ang kaalaman ng ating mga mag-aaral noong pandemya ay ang ating mga dakilang guro.


Sa 2022 Programme for International Student Assessment (PISA), lumabas sa index ng teacher support na mas mataas ang suportang ibinigay ng mga Pilipinong guro (0.50) sa kanilang mga mag-aaral kaysa sa average na naitala (-0.03) ng mga bansang kasapi ng Organization for Economic Co-Operation and Development (OECD). Sa isinagawang forum tungkol sa resulta ng PISA 2022, binigyang diin ni Department of Education (DepEd) Undersecretary Gina Gonong na mas mataas ng 17 hanggang 27 puntos ang marka ng mga mag-aaral na may gurong suportado ang kanilang pag-aaral.


Sa pinakahuling PISA, lumabas na 8 sa 10 mag-aaral ang nag-ulat na patuloy ang mga guro sa pagtuturo hanggang sa matutunan nila ang aralin (80 porsyento), tinutulungan nila ang mga mag-aaral sa kanilang pag-aaral (81 porsyento), nagbibigay ng karagdagang tulong kung kinakailangan (81 porsyento), at nagpapakita ng interes sa pagkatuto ng mga mag-aaral (79 porsyento).


Gayunpaman, wala namang naitalang malaking pagbabago sa marka ng mga mag-aaral sa Reading, Mathematics, at Science mula 2018 hanggang 2022, kaya naman kailangan pa rin ng mga programa sa learning recovery.


Mahalaga na ating suportahan ang mga teacher sa pamamagitan ng pagtataguyod sa kanilang kapakanan. Bilang chairman ng Senate Committee on Basic Education, inihain kamakailan ng inyong lingkod ang Revised Magna Carta for Public School Teachers (Senate Bill No. 2493), na layong amyendahan ang 57-taong Magna Carta for Public School Teachers (Republic Act No. 4670).


Kasama sa mga probisyon ng panukalang batas ang pagbabawas ng oras ng pagtuturo sa apat mula anim. Nakasaad din sa panukalang batas na bawal bigyan ng non-teaching tasks ang mga guro. Kung kinakailangan, maaaring magtrabaho ng hanggang walong oras lang ang mga guro at makakatanggap sila ng umentong katumbas ng kanilang regular na sahod at dagdag na 25 porsyento ng kanilang basic pay.


 

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

0 comments
BULGAR
Dec 14, 2023

Paigtingin ang Learning Recovery Programs kasunod ng resulta ng 2022 PISA

ni Kuya Win Gatchalian @Win Tayong Lahat | December 14, 2023

Meron tayong good news at bad news.

 

Ang good news: tumaas ang Pilipinas (+2.66 points) sa average performance sa 2022 Programme for International Student Assessment (PISA).

 

Mula sa puntos na 340 noong 2018, umakyat sa 347 noong 2022, ang marka ng mga Pilipinong mag-aaral na 15 taong gulang pagdating sa Reading Literacy. Sa Mathematical Literacy, umakyat sa 355 noong 2022 ang marka mula 353 noong 2018.


Pagdating naman sa Scientific Literacy, bumaba ang marka sa 356 noong 2022 mula 357 noong 2018.

 

Ang bad news: hindi pa sapat ang pagtaas na natamo natin.

 

Batay sa pagsusuri ng Organization for Economic Cooperation and Development (OECD), maituturing na hindi statistically significant o hindi kalakihan ang itinaas ng marka sa Reading at Math ng mga mag-aaral ng bansa. Hindi rin statistically significant ang pagbaba ng marka sa Science. Pagdating sa ranking, pang-76 sa Reading ang Pilipinas sa 81 na bansa, pang-75 sa Mathematics, at pang-79 naman sa Science.

 

Hindi man umurong ang kaalaman ng mga kabataan noong tinamaan ang bansa ng COVID-19, kailangan pa rin nating paigtingin ang pagpapatupad ng learning recovery at pagsugpo sa krisis sa edukasyon na kinakaharap ng bansa.

 

Kasama sa mga hakbang ng inyong lingkod ang pagsusulong ng learning recovery programs ng Department of Education at ang pagsasabatas ng ARAL Program Act (Senate Bill No. 1604) na ipinasa na ng Senado sa huli at ikatlong pagbasa noong Marso. Layon din ng panukalang batas na tugunan ang learning loss at tiyakin ang maayos na remediation plans para sa mga mag-aaral.

 

Bukod dito, isinusulong din natin ang paglalaan ng P10 bilyon para sa pagpapatupad ng academic recovery.

 

Bilang chairman ng Senate Committee on Basic Education, marami pa tayong mga repormang isusulong upang matiyak ang dekalidad na edukasyon sa bawat kabataang Pilipino.

 

Isa na rito ang kalulunsad lamang na MATATAG K to 10 curriculum na inaasahang magpapatatag sa foundational skills ng mga mag-aaral tulad ng literacy at numeracy.

 

Isa pang reporma ay ang Excellence in Teacher Education Act (Republic Act No. 11713) na layong iangat ang kalidad ng edukasyon at training ng mga guro sa bansa. Sa naturang batas na iniakda at inisponsor ng inyong lingkod, patatatagin ang Teacher Education Council (TEC) para paigtingin ang ugnayan sa pagitan ng mga ahensyang may kinalaman sa teacher education and training kagaya ng DepEd, Commission on Higher Education (CHED), at Professional Regulation Commission (PRC). Tinitiyak nito ang maayos na transition ng mga guro mula kolehiyo hanggang sa magsimula na silang magturo. 


 

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

0 comments
RECOMMENDED
bottom of page