Pagrebisa sa ‘Magna Carta’ para sa mga guro, napapanahon

ni Kuya Win Gatchalian @Win Tayong Lahat | Pebrero 8, 2024

Bukod sa pagbabawal ng mga non-teaching task sa mga guro na ating tinalakay sa nakaraang kolum, may iba pang mga mahahalagang probisyon sa ilalim ng itinutulak ng inyong lingkod na Revised Magna Carta for Public School Teachers (Senate Bill No. 2493).

Kasama sa mga panukalang pag-amyenda sa 57-taong Magna Carta for Public School Teachers (Republic Act No. 4670) ay ang pagbabawas sa oras ng pagtuturo — mula anim hanggang apat — at ang pag-hire sa substitute teacher kung naka-leave ang isang guro.

Kung kinakailangan, maaaring maglaan ng hanggang walong oras ang mga guro pero may additional pay. Katumbas ito ng regular na sahod na dadagdagan ng 25 porsyento ng kanilang basic pay.

Napapanahon na para sa isang bagong Magna Carta na magtataguyod ng kapakanan ng ating mga guro. May mga pangako kasi ang Magna Carta for Public School Teachers na hindi natupad mula nang isabatas ito noong 1966, kung saan pito sa 30 seksyon sa batas ang compliant o sumusunod. Kailangan na itong i-revise at gawing mas angkop sa pangangailangan ng mga guro sa kasalukuyang panahon.

Isinusulong din ng inyong lingkod sa pamamagitan ng panukalang ito ang pagbibigay ng calamity leave, educational benefits, at longevity pay sa mga guro. Nakasaad din dito ang mga kondisyon para sa pagbibigay ng hardship allowance at ang mas pinaigting na criteria para sa mga sahod. Layon din nating bigyan ng proteksyon ang mga guro mula sa mga out-of-pocket expenses at diskriminasyon.

Kasama rin sa ipinaglalaban natin na nakapaloob sa ating panukala ay ang pagkakaroon ng mga mekanismo para itaguyod ang due process sa mga guro.

Halimbawa, puwedeng makatanggap ng back wages ang mga permanenteng guro na natanggal sa trabaho at hindi nabigyan ng due process. Ipinagbabawal ng panukalang batas ang pag-alis sa mga permanent teacher ng walang due process at sapat o makatarungang dahilan. Siyempre, tiyak na may confidentiality sa anumang magiging disciplinary action laban sa mga guro.

Magkakaroon din ng partnership sa pagitan ng DepEd at Public Attorney’s Office (PAO).

Ito ay para maghatid ng mga serbisyong legal para sa mga gurong humaharap ng reklamong may kinalaman sa pagtuturo at kanilang mga responsibilidad.

Bilang chairman ng Senate Committee on Basic Education, naninindigan tayong kapag naisabatas ang panukalang ito, patuloy na maisusulong ang ating adbokasiya na matulungan ang ating mga teacher sa kanilang mga pangangailangan upang magawa nila ang kanilang tungkulin. 

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pag-alis ng non-teaching task sa mga guro, para mas epektib na makapagturo

ni Kuya Win Gatchalian @Win Tayong Lahat | Pebrero 6, 2024

Suportado ng inyong lingkod ang bagong kautusan ng Department of Education (DepEd) na alisin ang mga non-teaching task sa mga guro. Kailangang gawin ang hakbanging ito para maiangat natin ang kalidad ng sistema ng edukasyon sa bansa.

Bukod dito, makikita rin natin ang magiging epekto nito sa performance at efficiency ng mga mag-aaral. 

Sa katunayan, ang pag-alis ng non-teaching tasks sa ating mga guro sa public schools ay isa sa mga probisyon sa ating inihaing panukalang batas na Revised Magna Carta for Public School Teachers (Senate Bill No. 2493). Nakalagay din sa naturang panukala ang pag-hire ng sapat na non-teaching staff na magsasagawa ng mga administrative task.

Dito, imamandato ng DepEd na punan ang lahat ng non-teaching positions at tukuyin ang standard class size sa bawat antas sang-ayon sa international standards.

Makakatanggap naman ng karampatang sahod ang mga guro na humahawak ng malalaking klase. Nakasaad sa inilabas na Department Order No. 002 ng DepEd na hindi na gagawin ng mga guro ang mga trabahong tulad ng personnel administration; property at physical facilities custodianship; general administrative support; financial management; records management; at ang pagpapatakbo ng mga programang tulad ng feeding, school disaster risk and reduction management; at iba pang mga programa. 

Napapanahon na para pagaanin ang workload ng lahat ng mga guro. Napakalaki ng kanilang papel sa ating lipunan at sa paghubog ng kaalaman at abilidad ng ating mga kabataan, pero hindi nila epektibong magagampanan ang kanilang makabuluhang papel kung kumplikado at ubod nang dami ang kanilang mga responsibilidad. 

Batay sa ulat ng Second Congressional Commission on Education na pinamagatang “Miseducation: The Failed System of Philippine Education,” patuloy na isinasagawa ng mga guro ang iba’t ibang administrative tasks sa kabila ng mga pagsisikap na bawasan ang kanilang mga trabaho. 

Kapag natanggal na ang mga non-teaching task sa mga guro, masisiguro nating matututukan na nila ang pagtuturo. Bilang chairman ng Senate Committee on Basic Education, makakaasa kayong patuloy nating isusulong ang ating adbokasiya na matugunan ang pangangailangan ng mga guro at maitaguyod ang kanilang kapakanan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

All-out support dapat sa MATATAG K-10 Curriculum

ni Kuya Win Gatchalian @Win Tayong Lahat | Pebrero 1, 2024

Bahagi ng motibasyon ng inyong lingkod sa patuloy na pagsusulong ng mga panukala saSenado kaugnay sa edukasyon ay ang pagkamit ng mga layunin ng MATATAG Agenda ng Department of Education (DepEd). 

Napapanahon itong paglikha ng MATATAG K to 10 curriculum para maiangat ang performance ng mga mag-aaral.

Ang naturang programa ay produkto ng dalawang taon ng pagtuklas at pagsisiyasat sa mga kasalukuyang pangangailangan ng mga mag-aaral at mga pagsubok sa kanilang pag-aaral.

Sa pamamagitan nito, mababawasan na ang mga required competency sa 3,600 mula sa bilang na 11,000, at binibigyang diin ang basic competencies tulad ng literacy at numeracy. 

Kailangan nating maunawaan na ang tagumpay ng bawat mag-aaral ay nakasalalay sa kanilang nakukuhang edukasyon. Kaya naman upang makamit ito, mahalagang maipatupad nang maayos ang programa at maging handa ang ating mga guro para sa pagpapatupad ng MATATAG K to 10 curriculum para sa School Year 2024-2025.

Sa ilalim ng 2024 national budget, may P777.5 milyon na inilaan para sa in-service training ng mga guro, kabilang na ang training ng K to 10 teachers.  

Kaugnay nito, isinusulong ng inyong lingkod ang pagsasabatas ng Revised Magna Carta for Public School Teachers (Senate Bill No. 4670) na layong bawasan ang oras ng pagtuturo mula anim pababa sa apat. Ipinagbabawal din ng panukalang batas ang pagbibigay ng non-teaching tasks sa mga guro at imamandato ang calamity leave, educational benefits, longevity pay, at special hardship allowance batay sa itatalagang mga pamantayan. 

Kaugnay naman sa pagpapatupad ng mga programa para sa learning recovery, tulad ng Catch-Up Fridays, isinusulong din natin ang pagsasabatas ng ARAL Program Act (Senate Bill No. 1604) upang magkaroon ng pambansang programa sa learning recovery na tutugunan ang pinsalang dulot ng COVID-19 pandemic. 

Pagdating naman sa kahandaan ng mga senior high school graduate sa trabaho, inihain natin ang panukalang Batang Magaling Act (Senate Bill No. 2367) na layong paigtingin ang ugnayan sa pagitan ng DepEd, local government units, academe, at mga katuwang sa private sector. Dito natin matitiyak na handa ang mga senior high school graduate para sa kolehiyo, middle-skills development, employment, at pagnenegosyo. 

Sa kabila ng patuloy nating pagharap sa mga hamong may kinalaman sa kalidad ng edukasyon sa bansa, huwag tayong panghihinaan ng loob. 

Sa aking tungkulin bilang chairman ng Senate Committee on Basic Education, kabilang na ang kolaborasyon at pakikipagtulungan sa DepEd, nananatili tayong determinado na maaabot natin ang mga layunin ng MATATAG agenda, maitataguyod ang kapakanan ng ating mga guro, at matitiyak na walang batang mapag-iiwanan. 

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com