Batang Magaling Act, sagot sa job skills mismatch

ni Kuya Win Gatchalian @Win Tayong Lahat | Pebrero 29, 2024

Natalakay natin sa mga nagdaang kolum na mababa ang certification rates ng mga senior high school (SHS) graduate sa technical-vocational-livelihood (TVL) track.

Naitala na 25.7 porsyento lamang noong School Year (SY) 2019-2020 habang 6.8 porsyento naman noong SY 2020-2021 ang nakakuha ng certificate.

Maraming trainees ng Technical Vocational and Education Training o TVET ang sumailalim sa mga programang National Certificate I at National Certificate II pero, kakaunti na lang sa kanila ang dumadaan sa NC III, NC IV, at sa mga programang may mas matataas na lebel na nakatutok sa mas kumplikadong skills na hinahanap ng mga kumpanya.

Bakit? Dahil hindi kayang tustusan ng karamihan sa kanila ang NC assessment na umaabot sa humigit-kumulang P1,009.29 kada estudyante.

Sa pamamagitan ng certification, maaaring tumaas ang tsansa ng ating mga TVL graduate ng SHS na makakuha ng maayos at magandang trabaho. Kaya naman sa mga naging deliberasyon para sa 2024 national budget, mariing isinulong ng inyong lingkod ang paglalaan ng pondo para sa assessment at certification ng mga mag-aaral.

Sa ilalim ng 2024 General Appropriations Act (GAA), P438.16 milyon ang inilaan sa pondo ng TESDA Regulatory Program para sa assessment at paggawad ng National Certification (NC) sa mag-aaral ng TVL sa senior high school. Tinatayang 420,900 Grade 12 TVL graduates ang sasaklawin ng naturang pondo.

Ayon sa isang pag-aaral ng Philippine Institute for Development Studies noong 2020, ang average daily basic pay ng senior high school graduates ay P316 — ito ay mas mataas lang ng P14 sa mga nakatapos ng junior high school.

Bilang chairman ng Senate Committee on Basic Education, nais tiyakin ng inyong lingkod na magagamit nang tama ang inilaan nating pondo upang matulungan ang mga Grade 12 TVL graduate. Sa ating inihaing Proposed Senate Resolution No. 935, susuriin natin ang kahandaan ng Department of Education (DepEd) at ng Technical Education and Skills Development Authority (TESDA) na ipatupad ang libreng Senior High School Assessment and Certification Support Program. Umaasa tayo na makakatulong ang kanilang certification para tugunan ang kawalan nila ng labor market advantage.

Sa patuloy nating pagtugon sa isyu ng job skills mismatch, isinusulong din ng inyong lingkod ang panukalang Batang Magaling Act (Senate Bill No. 2022) upang matulungan ang mga K to 12 graduate na makamit ang angkop at sapat na kaalaman, kahusayan at kasanayan na required sa mga kumpanya. Isinusulong natin ang paglikha ng National at mga Local Batang Magaling Councils upang paigtingin ang ugnayan sa pagitan ng DepEd, local government units, ang akademya, at pribadong sektor para tugunan ang mismatch sa skills ng mga K to 12 graduate at sa mga pangangailangan ng labor market.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mag-aaral ng CAR, nakamit ang Minumum Proficiency sa reading, Science at Math

ni Kuya Win Gatchalian @Win Tayong Lahat | November 27, 2024

Pagsapit muli ng budget season ngayong taon para pag-aralan ang kabuuang pondo ng bansa sa 2025, kasama sa imumungkahi natin ang paglalaan ng pondo para sa 2025 Programme for International Student Assessment (PISA). Mahalaga na mapaghandaan ito ng Pilipinas upang maiangat natin ang marka ng mga 15-taong gulang na mga mag-aaral sa naturang assessment.

Sa nakaraang pagdinig ng Senate Committee on Basic Education kaugnay sa naging resulta ng PISA noong 2022, ipinaalala ni Southeast Asian Ministers of Education Organization (SEAMEO) INNOTECH Center Director at dating DepEd Secretary Leonor Briones ang mga hakbang na ginawa ng Department of Education para paghandaan ang PISA. Kabilang dito ang paghahanda ng mga materyal para sa public school teacher at mga estudyante, pati na rin ang pagtitipon ng supplementary sources at familiarization materials na ginamit ng mga rehiyon sa field preparations.

Sa Cordillera Administrative Region (CAR) naman, sinabi ni DepEd-CAR Director Estella Cariño na sinanay nila ang kanilang mga mag-aaral na gumamit ng computer. Kung kulang o wala talagang computer ang isang paaralan, humihingi na lang sila ng tulong sa local government units.

Ang CAR ang isa sa tatlong pangunahing rehiyon na may pinakamaraming mag-aaral na nakapagkamit ng minimum proficiency sa reading, science, at math. Habang ang dalawa pang rehiyon ay ang National Capital Region at Region IV-A (CALABARZON).

Ang isasagawang PISA sa 2025 ay sesentro sa science. Kasama rin dito ang makabagong larangan na tinatawag na Learning in the Digital World na layuning sukatin ang kakayahan ng mga mag-aaral na makilahok sa self-regulated learning habang gumagamit ng digital tools.

Sa tulong ng sapat na suporta para mapaghandaang mabuti ang PISA, umaasa tayong magiging maganda ang performance ng mga mag-aaral sa 2025 assessment.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

TEIs, repasuhin para sa dekalidad na pagtuturo

ni Kuya Win Gatchalian @Win Tayong Lahat | Pebrero 22, 2024

Napakahalaga ng mga public hearing na ginagawa natin sa Senado. Importante rin ang pagsubaybay ng publiko sa ating mga talakayan sa sektor ng edukasyon — kung saan mapapanood ito sa YouTube at iba pang official social media platforms ng Senado at ng inyong lingkod — upang maging maalam at mapagmatyag tayo sa mga pinakahuling kaganapan o anumang pagbabago sa sistema at sa mga paaralang pinapasukan ng ating mga anak.

Isa na rito ang mungkahi ng inyong lingkod bilang chairman ng Senate Committee on Basic Education na repasuhin ang mga non-performing Teacher Education Institution (TEIs). Ito ang mga kolehiyo na hindi nagtatagumpay na magkaroon ng Licensure Examination for Teachers (LET) passers.

Sa nagdaang hearing tungkol sa resulta ng 2022 Programme for International Student Assessment (PISA), ibinahagi ng Chairperson ng Technical Panel for Teacher Education of the Commission on Higher Education (TPTE-CHED) na si Dr. Edizon Fermin na maglalabas ng isang CHED Memorandum Order para sa unti-unting pagtanggal ng dalawang uri ng TEIs: iyong mga hindi maayos ang performance sa LET at iyong mga hindi nakakasunod sa pamantayan ng komisyon.

Mayroon naman kasi tayong solusyon sa hindi pagkakatugma ng pre-service at in-service. Sa pamamagitan ng isinabatas na Excellence in Teacher Education Act, pinapatatag natin at binibigyan ng mas malawak na kapangyarihan ang Teacher Education Council.

Kabilang dito ang pagbibigay ng mas malaking boses sa DepEd para tiyaking may ugnayan sa lahat ng yugto ng edukasyon at pagsasanay ng mga guro mula pre-service education sa kolehiyo hanggang sa in-service education sa panahong nagtuturo na sila. Patuloy nating hinihintay na maipatupad nang ganap itong naturang batas.

Sa ulat na pinamagatang “Miseducation: The Failed System of Philippine Education,” walang alinlangang pinuna ng Second Congressional Commission on Education (EDCOM II) ang mababang passing rates sa LET at mahinang quality assurance ng mga TEI. Mula 2009 hanggang 2023, ang average LET passing rate sa elementary ay 33 porsyento habang 40 porsyento naman sa secondary.

Napansin din ng komisyon na mula 2012 hanggang 2022, 77 na mga Higher Education Institution (HEIs) na may programang Bachelor of Elementary Education at 105 HEIs na may programang Bachelor of Secondary Education ang nagpapatuloy sa kanilang mga operasyon kahit na wala silang graduate students na pumapasa sa LET.

Malinaw na indikasyon ito ng mariing pangangailangan na maituwid ang mga pagkakamali at mapunan ang mga pagkukulang ng mga paaralan. Naniniwala tayo na kung maganda ang mismong pundasyon ng mga guro, inaasahang dekalidad din ang ibibigay nilang klase ng pagtuturo sa kanilang mga mag-aaral.

Katuwang ang Senate Committee on Higher Education at EDCOM II, sinusuportahan natin sa Senate Committee on Basic Education ang unti-unting phaseout ng underperforming TEIs.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com