ROTC sa kabataan, makatutulong para sa seguridad ng bansa

ni Kuya Win Gatchalian @Win Tayong Lahat | April 23, 2024

BILANG isa sa mga may-akda ng Reserve Officers’ Training Corps o ROTC Act, kasalukuyang isinusulong ng inyong lingkod na gawing institutionalized ang mandatory Basic ROTC Program sa Higher Education Institutions (HEIs) at Technical Vocational Institutions (TVIs) para sa lahat ng mga mag-aaral na naka-enroll sa hindi bababa sa dalawang taong undergraduate degree, diploma, o mga certificate program. 

Sa pamamagitan nitong panukalang batas, mabibigyan ang mga mag-aaral ng kaukulang pagsasanay upang tumugon sa panawagan sa paglilingkod sa bayan. Paiigtingin natin ang kakayahan ng mga mag-aaral na magbigay ng serbisyo sa panahon ng mga kalamidad at sakuna, kabilang na ang disaster response operations, rescue and relief operations, at early recovery activities. 

Bukod d’yan, maibabahagi natin at maituturo sa mga kabataang mag-aaral ang pagmamahal sa bayan o pagiging makabayan. 

Taong 2016 pa lang ay itinutulak na ng inyong lingkod ang panukalang Mandatory Military and Civic Reserve Officers’ Training Corps para sa lahat ng mga kolehiyo, unibersidad, at technical-vocational institutions. At nakita natin na maganda naman ang tugon dito ng taumbayan. 

Sa pinakahuling Pulse Asia survey na isinagawa noong Disyembre 3 hanggang 7, 2023 at kinomisyon ng ating Senate President, malinaw ang boses ng ating mga kababayan pagdating sa panukala na ipatupad ang ROTC: karamihan sa mga Pilipino (69 porsyento) ang sumusuporta sa mandatory ROTC para sa mga kabataan. Ang pinakamataas na suporta ay nanggaling sa Mindanao (79 porsyento), sumunod ang Visayas (74 porsyento), National Capital Region (67 porsyento), at Balance Luzon (63 porsyento). 

At kung babalikan natin ang resulta ng isa pang Pulse Asia survey na kinomisyon ng inyong lingkod noong March 15-19 ng nakaraang taon, lumabas na 78 porsyento ng mga kalahok sa buong bansa ang nagsabing pabor sila sa pagpapatupad ng ROTC sa mga college student. 

Malaki ang ginagampanan at gagampanan pang papel ng mga mag-aaral sa ating lipunan. Kaya hangga’t maaga pa lang ay dapat pangalagaan na ang kanilang kinabukasan sa pamamagitan ng tamang disiplina at katatagan, lalo na sa gitna ng mga hamong kinakaharap ng ating bansa pagdating sa seguridad. 

Isa ito sa mga prayoridad natin sa ating pamumuno ng Committee on Basic Education sa Senado.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Digital transformation, mas kailangan sa sektor ng edukasyon

ni Kuya Win Gatchalian @Win Tayong Lahat |April 18, 2024

KAILANGANG paghandaan natin ang posibleng mas mainit pang panahon sa mga susunod na taon lalo na’t patuloy ang climate change at global warming.

Kaya naman sa gitna ng pagpapatupad ng blended learning dahil sa matinding init, muling isinusulong ng inyong lingkod ang pangangailangan para sa digital transformation ng sektor ng edukasyon, bagay na makakatulong din sa kahandaan ng mga guro na magpatupad ng remote learning. Ito ang ating inihain ngayong 19th Congress, ang Digital Transformation of Basic Education Act o Senate Bill No. 383.

Maliban sa pagpapabilis ng installation at activation ng libreng public Wi-Fi sa lahat ng public schools, imamandato ng naturang panukala sa Department of Education (DepEd) na paigtingin ang kahandaan ng mga paaralan sa information and communications technology (ICT) para magpatupad ng distance learning.

Pero hindi lang sa gitna ng matinding init natin kailangang mapahusay ang digitalisasyon, kailangan din nating tiyaking magpapatuloy ang pag-aaral ng mga kabataan sa mga panahong humaharap tayo sa mga sakuna o anumang emergency situation sa bansa.

Nakasaad din sa naturang panukala na imamandato sa Department of Science and Technology (DOST) ang pagtulong sa DepEd at Department of Information and Communications Technology (DICT) sa pagsulong sa agham, teknolohiya, at inobasyon. Ito ay para paigtingin ang pag-aaral at pagtuturo, at ihanda ang sektor ng edukasyon sa Fourth Industrial Revolution.

Kamakailan, ipinag-utos ng DepEd ang pagpapatupad ng asynchronous classes sa lahat ng public schools noong Abril 15 hanggang 16. Muli ring binigyang diin ng DepEd ang mga pamantayan sa DepEd Order No. 037 series of 2022, kung saan nakasaad na sa kaso ng matinding init at iba pang mga kalamidad, maaaring magsuspinde ang mga punong-guro ng klase at ipag-utos ang pagpapatupad ng remote learning.

Ang iba pa nating mga panukala upang isulong ang digitalization sa sektor ng edukasyon ay ang Philippine Online Library Act (Senate Bill No. 477), Public School Database Act (Senate Bill No. 478), at ang One Learner, One Laptop Act (Senate Bill No. 474).

Umaasa tayong mapapabilis ang proseso ng digitalization sa bansa para matiyak na hindi mapag-iiwanan sa edukasyon ang ating mga kabataan. 

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Free assesment program sa mga TVL graduating, malaking pakinabang

ni Kuya Win Gatchalian @Win Tayong Lahat | Abril 16, 2024

Hinikayat natin ang mga graduating students ng senior high school (SHS) sa ilalim ng technical-vocational-livelihood (TVL) track na pakinabangan ang libreng assessment program. Kapag makapasa sa assessment ang isang TVL graduating, hindi lang diploma ang matatamo niya kundi pati na rin ang national certification. Kaya kung susulitin nila ang pagkakataong ito, tiyak na tataas ang tsansa nila na makakuha ng maayos at magandang trabaho.

Kung inyong matatandaan, itinulak ng inyong lingkod ang paglalagay ng pondo para sa assessment at certification ng mga bata noong panahon ng mga deliberasyon para sa 2024 national budget. At ngayong nakatalaga na ito sa naturang budget, nakatakdang ipatupad ng Department of Education (DepEd) at Technical Education and Skills Development Authority (TESDA) ang libreng assessment program na mapapakinabangan ng mahigit 400,000 na TVL graduates.

 Sa pamamagitan ng programang ito, matutugunan natin ang mababang certification rate ng mga TVL graduate. Noong School Year (SY) 2019-2020, umabot lang ito sa 25.7 porsyento habang 6.8 porsyento naman noong SY 2020-2021. Ngunit hindi rin ito nakakapagtaka, dahil ang mga mag-aaral din kasi ang gumagastos para sa National Certificate (NC) assessments na nagkakahalaga ng isang libong piso. 

Maiiwasan din nito ang job mismatch. 

Samantala, ang ating panukalang Batang Magaling Act (Senate Bill No. 2022) ay isang solusyon din sa problema ng job mismatch. Layon nitong tumulong sa mga K to 12 graduates na makamit ang angkop at sapat na kaalaman, kahusayan, at kasanayan na required sa mga kumpanya at korporasyon. 

Dito, isinusulong natin ang paglikha ng National at mga Local Batang Magaling Councils upang paigtingin ang ugnayan sa pagitan ng DepEd, local government units (LGUs), ang akademya, at pribadong sektor para tugunan ang mismatch sa skills ng mga K to 12 graduates at sa mga pangangailangan ng labor market.

Sama-sama nating isulong ang competitiveness at kahandaang magtrabaho ng mga Pilipino!

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com