Dagdag-benepisyo para sa mga guro, mas dapat palawigin

ni Kuya Win Gatchalian @Win Tayong Lahat | July 26, 2024

Malaking tagumpay sa ipinapanukala ng inyong lingkod ang suporta ni Pangulong Marcos sa pagpapalakas ng kapakanan ng ating mga guro, bagay na kanyang binigyang-diin sa kanyang State of the Nation Address (SONA) noong Lunes.

Unang-una na rito ang pagsasabatas ng Kabalikat sa Pagtuturo Act (Republic Act No. 11997). Sa pamamagitan ng batas na ito, makakatanggap na ang mga guro ng teaching allowance mula sa halagang P5,000 sa halagang P10,000 simula School Year 2025-2026.

Ikinagagalak din natin ang pagbanggit ng Pangulo sa kanyang SONA na makakatanggap ang ating public school teachers ng personal accident insurance mula sa Government Service Insurance System (GSIS) at special hardship allowance.

Inilahad din niya ang planong paglalaan ng pondo ng pamahalaan sa implementasyon ng career progression system at pagsusulong ng professional development at career advancement ng bawat public school teacher. Sa ilalim ng expanded system ng Department of Education (DepEd), maaaring pumili ang mga guro ng tatahakin nilang career progression – ang tuluy-tuloy na pagtuturo sa klasrum, pag-focus sa school administration track, o ang pagiging principal. Sa pamamagitan nito, maibibigay natin sa ating mga guro ang magagandang oportunidad na nararapat sa kanila. Sa ilalim din ng naturang sistema, sinabi ng Pangulo na wala nang public school teacher ang magreretiro bilang Teacher I lamang.

Nagpapasalamat tayo sa ating Pangulo dahil binigyan niya ng pansin ang kapakanan ng ating mga guro sa kanyang SONA. Nakasalalay sa ating mga guro ang tagumpay ng sistema ng edukasyon, kaya naman patuloy din nating isusulong ang mga panukalang batas para dagdagan ang kanilang mga benepisyo at itaguyod ang kanilang mga kapakanan.

Bilang chairman ng Senate Committee on Basic Education, patuloy na isusulong ng inyong lingkod ang mga panukalang batas na layong gawing institutionalized ang mga benepisyo at proteksyong natatanggap ng mga guro. Kabilang na rito ang Revised Magna Carta for Public School Teachers (Senate Bill No. 2493) na layong amyendahan ang Magna Carta for Public School Teachers (Republic Act No. 4670). Nakapaloob sa ating panukala ang pagkakaroon ng calamity leave, educational benefits, at longevity pay. Kasama rin ang grant para sa special hardship allowance at pagsusuri ng basehan ng sahod, maging ang proteksyon ng mga guro na gumagastos para sa mga materyales sa pagtuturo gamit ang sarili nilang pera.

Pinag-aaralan din natin ang paghahain ng panukala para sa institutionalization ng career progression system para sa lahat ng public school teachers.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

LGUs, kailangan ng aktibong partisipasyon sa edukasyon

ni Kuya Win Gatchalian @Win Tayong Lahat | July 23, 2024

Patuloy nating pinaiigting ang pakikilahok ng local government units (LGUs) sa pag-angat sa kalidad ng edukasyon at upang maipatupad ang panukalang decentralization sa education governance. 

Nakasaad ang mungkahing ito ng inyong lingkod sa 21st Century School Boards Act (Senate Bill No. 155), kung saan imamandato sa mga local school boards ang pagdisenyo at pagpapatupad ng mga polisiya sa paghahatid at pag-angat ng kalidad ng edukasyon sa bansa. Susukatin ang tagumpay ng mga programang ito sa participation rate ng mga mag-aaral, sa bilang ng mga dropout at out-of-school youth, at marka sa mga national test at iba pang assessment tools. Layon din ng nasabing panukala na palawakin ang local school board upang makalahok ang iba pang mga education stakeholders. 

Sa pagdalaw noon ng Second Congressional Commission (EDCOM II) on Education sa Vietnam, kapansin-pansin dito ang halimbawa ng bansa pagdating sa pamamalakad ng sektor ng edukasyon. Ang kanilang Ministry of Education and Training (MOET) ang nagpapasya ng mga polisiya para sa buong bansa, habang ang People’s Committee sa mga probinsya naman ang may pananagutan para sa mga resulta. Ang mga naturang komite rin ang nagbabantay sa kalidad at nagpapatupad ng mga programa sa edukasyon. 

Ang local school board ay isa nang magandang mekanismo upang magpatupad ng devolution sa mga lokal na pamahalaan dahil bahagi nito ang alkalde at superintendent. Ngunit isinusulong din natin na palawakin ang responsibilidad ng mga local school board at tiyaking may pananagutan sila. Ang ating panukala ay isang paraan para ibaba sa lokal na lebel ang edukasyon gamit ang mga mekanismong meron na tayo. 

Iminumungkahi rin natin ang pagpapalawak ng paggamit ng Special Education Fund (SEF) na nagmumula sa dagdag na isang porsyentong buwis sa real property. 

Bagama’t nakasaad sa Local Government Code of 1991 (Republic Act No. 7160) na maaaring gamitin ng local school board ang SEF sa operasyon, pagpapanatili, pagpapatayo, at pagkumpuni ng mga school buildings, iminumungkahi nating palawakin ang SEF upang magamit sa sahod ng mga guro at non-teaching personnel, sahod ng mga preschool teachers, at honoraria at allowances ng mga teacher at non-teaching personnel para sa karagdagang serbisyo sa labas ng regular na oras ng pagtuturo.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

‘Batang Magaling Act’, para SHS graduates maging ready sa trabaho

ni Kuya Win Gatchalian @Win Tayong Lahat | July 16, 2024

Sa patuloy nating pagtugon sa isyu ng jobs-skills mismatch, at sa direktiba ng Pangulo na siguruhing handa ang ating senior high school (SHS) graduates na makamit ang angkop at sapat na kaalaman, kahusayan at kasanayan na required para makuha sila sa trabaho, patuloy na nananawagan ang inyong lingkod sa pagsusulong ng panukalang ‘Batang Magaling Act’ (Senate Bill No. 2367).

Isa sa mga layunin ng nasabing panukala ang pagiging institutionalized ng libreng national competency assessments para sa national certification. Matatandaan natin na sa ilalim ng 2024 national budget, ipinanukala natin ang paglalaan ng P438 milyon sa ilalim ng Technical Education and Skills Development Authority (TESDA) Regulatory Program para sa libreng assessment at certification ng mga mag-aaral sa ilalim ng Technical-Vocational-Livelihood (TVL), kung saan mahigit 420,900 TVL graduates ang inaasahang makikinabang sa naturang pondo.

Kabilang din sa naturang panukala ang inisyatibong iuugnay ang mga kurikulum ng mga paaralan at work immersion component ng SHS sa market needs ng mga industriya at mga ahensya ng gobyerno. Layon din ng ating panukalang batas na tiyakin ang kahandaan ng SHS graduates, piliin man nilang mag-kolehiyo, pumasok sa pagnenegosyo, o magpatuloy sa skills development.

Bukod sa kahandaan sa trabaho, layon din ng ating panukala ang paglikha ng National Batang Magaling Council na bubuuin ng Department of Education (DepEd), TESDA, Department of Labor and Employment (DOLE), tatlong national industry partners, isang national labor group, at ng Union of Local Authorities of the Philippines. Layon ding imandato sa DepEd na iugnay ang SHS program sa quality assurance framework at training regulations ng TESDA.

Patuloy nating ipaglalaban ang Batang Magaling Act para mapaigting ang kahandaan ng SHS graduates para makapaghanapbuhay. Kailangan nating alalahanin na kung hindi natin maipapakita sa ating mga kababayan ang dagdag na benepisyo ng dalawang taon sa high school, dadami ang ating mga Pilipinong hindi makukuntento sa programang K to 12.

Bilang chairman ng Senate Committee on Basic Education, titiyakin natin ang kakayahan ng mga kabataan na makapagtrabaho batay sa kanilang galing at kasanayan. Matitiyak din natin na katuwang natin ang pribadong sektor upang mabigyan ng trabaho ang ating senior high school graduates.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com