Tutukan ang mababang kalidad ng distance learning

ni Kuya Win Gatchalian - @Win Tayong Lahat | April 29, 2021

Ayon sa pinakahuling Pulse Asia survey tungkol sa mga suliraning pang-edukasyon sa gitna ng pandemya, wala pang kalahati sa bilang ng mga magulang o mga guardian ang nagsabing natututo ang kanilang mga anak o inaalagaan na nasa basic education.

Sa isinagawang survey ng Pulse Asia sa mga magulang mula Pebrero 22 hanggang Marso 3, mahigit 60 porsiyento sa 1,200 na kalahok ang may anak o inaalagaan sa basic education. Wala pang 50 porsiyento sa mga magulang o guardians ang nagsabing natututo ang kanilang anak o inaalagaan, habang 25 porsiyento o isa sa apat ang nagsabing hindi natututo ang kanilang mga anak. Tatlo sa sampu o 30 porsiyento naman ang hindi matukoy kung natututo ang kanilang mga anak o hindi.

Kung susumahin ang mga hamon sa ilalim ng distance learning, pinakamaraming magulang o 53 porsiyento ang nagsabing hirap sila sa pagsagot sa modules. Pinakamarami sa kanila ay taga-Mindanao (74 porsiyento). Nakita rin sa survey ang mga itinuturing na educational inequalities sa mga socioeconomic groups, lalo na’t ang mga nabibilang sa Class E (71 porsiyento) ay mas hirap sa pagsagot sa modules kung ihahambing sa mga nasa Class D (52 porsiyento) at Class ABC (35 porsyento).

Malaki ang impluwensiya ng mga magulang sa pag-aaral ng kanilang mga anak, kaya kung hirap ang mga magulang na intindihin ang mga modules, inaasahang hirap din ang maraming mag-aaral. Bukod sa maraming magulang ang nagsabing kulang ang panahon nila upang magabayan ang kanilang mga anak sa ilalim ng distance learning, base sa survey 66 porsiyento naman ang nagsabing may panahon man silang magturo ay nahihirapan pa rin sila dahil hindi sila nakapagtapos.

Kung pagbabatayan ang 2015 Family Income and Expenditure Survey (FIES) noong 2017, 54 porsyento ng mga household heads ng bansa ang hindi nakatapos ng high school.

Bagama’t pinagsisikapan nating ituloy ang edukasyon sa gitna ng pandemya, hindi kaila na marami pa rin sa mga mag-aaral ang hindi natututo sa ilalim ng distance learning. Ipinakikita lamang nito na dapat tutukan ng ating pamahalaan ang kalidad ng distance learning at ang pagbibigay ng prayoridad sa edukasyon sa pagbangon ng bansa mula sa pandemya.

Kung hindi natin tututukan ang pag-angat sa kalidad ng edukasyon sa kalagitnaan at sa pagtatapos ng pandemya ay mas lalo pang mapag-iiwanan ang mga kabataan.

Sa kalagitnaan ng pagpapatupad ng COVID-19 vaccination program, nais nating bigyang-diin bilang Chairman ng Senate Committee on Basic Education, Arts and Culture ang kahalagahan ng paghahanda para sa ligtas na pagbubukas ng mga paaralan upang matugunan ang mga epekto ng matagal nitong pagsasara, kabilang na ang pag-urong ng kaalaman ng kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Dagdagan ang mga quarantine centers upang hindi maantala ang pagbubukas ng mga paaralan

ni Kuya Win Gatchalian - @Win Tayong Lahat | April 27, 2021

Bagama’t mahigit isang libong paaralan ang kasalukuyang ginagamit bilang isolation facilities, mariing hinihimok ng inyong lingkod ang pamahalaan na pabilisin ang pagpapatayo ng mga quarantine centers at field hospitals, lalo na’t ngayon ay patuloy na napupuno ang mga ospital ng mga pasyenteng may COVID-19.

Hindi natin maaaring gamitin nang matagalan ang paggamit sa mga paaralan bilang mga isolation facilities o evacuation centers sa panahon ng kalamidad. Hindi ito nakatutulong upang itaguyod ang kaligtasan ng mga paaralan, lalo na sa ilalim ng new normal. Bukod pa rito, nakaaantala rin sa ligtas na pagbubukas ng mga eskuwelahan para sa mga mag-aaral ang matagal na paggamit sa mga paaralan sa tuwing mayroong sakuna.

Sa ibang bansa, ipinatatayo ang mga field hospitals upang paigtingin ang kakayahan ng mga health care system na pangalagaan ang mga pasyenteng may COVID-19. Nito lang nakaraan ay nag-anunsiyo ang Thailand na maglalagay ng 10,000 field hospital beds matapos maitala ang muling pagtaas ng mga kaso ng COVID-19 sa kanila. Noong nakaraang taon naman, umabot sa 13,000 libong pasyente ang ginamot sa 16 temporary hospitals sa Wuhan, China na dating tinaguriang global epicenter ng pandemya.

Noong nakaraang taon din, ang Lungsod ng Valenzuela ay naglagay ng centralized isolation facilities sa Balai Banyuhay at sa Valenzuela Astrodome, kung saan inilagay ang mga modular tents at higaang pang-militar para magamit ng mga pasyente. Ang Balai Banyuhay ay drug rehabilitation at treatment facility sa aming lungsod.

Ang mabilis na pagpapatayo ng field hospitals at quarantine centers ang paraan upang mabigyan natin ng agarang atensiyon ang mga kababayan nating nagkakasakit. Sa halip na masanay tayong gumamit ng mga paaralan bilang isolation facilities o evacuation centers, ang dapat nating tiyakin ay ang pagkakaroon ng sapat at angkop na mga pasilidad para sa mga nangangailangan ng tulong medikal.

Kaya bilang Chairman ng Senate Committee on Basic Education, Arts and Culture, muling isinusulong ng inyong lingkod ang ating panukalang magkaroon ng evacuation center ang bawat lungsod at munisipalidad sa bansa. Sa ilalim ng Senate Bill No. 747 o Evacuation Center Act na inihain noong 2019, ang mga evacuation center ay magsisilbi lamang na pansamantalang tirahan para sa mga naapektuhan ng mga sakuna, kabilang ang mga outbreak ng mga sakit.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Kakulangan sa RH education, dapat punan ngayong pandemya!

ni Kuya Win Gatchalian - @Win Tayong Lahat | April 13, 2021

Sa kabila ng mandato ng Republic Act 10354 o Responsible Parenthood and Reproductive Health Act of 2012 (RPRH Law) na nakatuon sa angkop na reproductive health education, lumabas sa pag-aaral ng Philippine Institute for Development Studies (PIDS) nitong Marso na may mga kakulangan ang programang health education ng gobyerno tulad ng pagkakaroon ng sapat na teacher training at learning materials para sa pagtuturo.

Nais bigyang-diin ng inyong lingkod na dapat tutukan at paigtingin ang pagtugon ng Department of Education (DepEd) sa mga kakulangang ito lalo na’t kinatatakutang darami pa ang bilang ng mga batang ina sa bansa dahil sa lockdown measures bunga ng pandemya.

Kamakailan ay iniulat ng Commission on Population and Development (POPCOM) na may 2,422 sanggol sa Cordillera na ipinanganak mula sa teenage parents noong 2020, kung saan mas mataas ito ng halos 50 porsiyento mula sa 1,654 na naitala noong 2019. Ayon sa datos ng Philippine Statistics Authority (PSA), tumaas ng pitong porsiyento ang bilang ng mga batang ina na may may edad 15 pababa sa buong bansa noong 2019 kung ikukumpara noong 2018.

Nagpalabas na noon pa lang ang DepEd ng Department Order (DO) 31 s. 2018 upang gabayan ang pagpapatupad ng sexuality education. Ngunit ayon sa pag-aaral ng PIDS, lumalabas na may kakulangan pa rin sa manpower, mga pasilidad, pagsasanay, instructional materials, pakikipag-ugnayan at sistema ng pag-monitor.

Sa isinagawang focus group discussions (FGD) ng PIDS kasama ang mga guro, lumalabas na hindi sapat ang mga pagsasanay na isinagawa na may kaugnayan sa sexuality education. Bagama’t ang DepEd ay sumusunod sa karamihan ng mga probisyon ng batas, sinabi ng PIDS sa pag-aaral nitong kailangang paigtingin pa ang programa upang maisakatuparan ang RPRH Law.

Ilang taon na ang lumipas mula nang magkaroon tayo ng batas sa Reproductive Health at magkaroon ng polisiya ang DepEd sa usapin ng Comprehensive Sexuality Education o CSE. Ngunit ang nakalulungkot na katotohanan ay talagang may mga kakulangan pa rin tayong nakikita upang maging mas mabisa ang pagtuturo ng CSE sa ating mga paaralan.

Bilang Chairman ng Senate Committee on Basic Education, Arts and Culture, mariin nating isinusulong ang sapat na pagtuturo ng CSE sa lalong madaling panahon. Inaasahan natin ang mabilis na pagtugon ng DepEd, mga paaralan at mga guro sa sa usaping ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com