Malapit sa Luzon... 'Monster ship' ng China, naispatan

by BRT @Brand Zone | Jan. 6, 2025

PCG Photo: 'The Monster’ China Coast Guard 5901

Namataan malapit sa Luzon ang 'monster ship' ng China Coast Guard, ayon kay American maritime security analyst Ray Powell.

“Today ‘The Monster’ China Coast Guard 5901 has brought its intrusive patrol even further east from Scarborough Shoal. It is now asserting #China’s claim of jurisdiction just 50 nautical miles from the #Philippines’ main island of Luzon,” saad sa post ni Powell, Sabado ng umaga.

Ang “monster ship” ay may timbang na 12 tonelada, na limang beses na mas malaki kaysa sa dalawang pinakamalaking barko ng Philippine Coast Guard (PCG).

Kinumpirma ng PCG ang presensya ng barko ng China sa layong 54 nautical miles sa Capones Island, Zambales.

Agad na ipinadala ang PCG Caravan, BRP Cabra at helicopter para subukin ang CCG at igiit na ang naturang barko ay nasa loob ng exclusive economic zone (EEZ) ng Pilipinas.

Iniulat na ang 'monster ship' ay bumibiyahe pa-kanluran at ngayo'y nasa 85 nautical miles mula sa Zambales.

Ayon naman kay National Security Council Assistant Director General Jonathan Malaya, hindi nakakabiglang malaman na may monster ship ang China na umaaligid sa Bajo de Masinloc dahil matagal nang pinupuno ng mga barko ng China ang naturang lugar.

Mga barko ng China, binantayan ang multilateral exercises sa WPS — AFP

ni Angela Fernando @News | Sep. 29, 2024

Binantayan ng Chinese navy ang pinagsamang multilateral exercises sa dagat at himpapawid ng 'Pinas kasama ang Australia, Japan, at New Zealand sa West Philippine Sea (WPS), ayon sa Armed Forces of the Philippines (AFP) nitong Linggo.

Inorganisa ng Southern Theater Command ng People’s Liberation Army ng China ang kanilang navy at hukbong himpapawid para sa mga regular na misyon ng reconnaissance, maagang babala, at mga exercises ng patrol sa himpapawid at karagatan malapit sa mga katubigan ng Bajo de Masinloc kamakailan.

Ito ay kasabay ng Multilateral Maritime Cooperative Activity (MMCA) kung saan nagsagawa rin ng mga pagsasanay ang mga unit ng hukbong-dagat at himpapawid ng 'Pinas at mga kasama nitong bansa.

Ayon kay Col. Francel Margareth Padilla, tagapagsalita ng AFP, binantayan ng militar ng bansa ang mga barko ng China na nasa paligid ng mga ginawang pagsasanay. Samantala, binigyang-linaw din ni Padilla na nagpatuloy ang mga plano nang walang nangyaring panghihimasok, at hindi nalagay sa panganib ang mga barko ng mga kasamang na bansa.

Mga barko ng China, balik-WPS

ni Angela Fernando @News | September 8, 2024

Nagpahayag ang isang international maritime observer nitong Linggo na muling bumalik ang mga barko ng China sa West Philippine Sea (WPS) matapos silang pansamantalang umatras dahil sa bagyong “Enteng” nu'ng nakaraang linggo.

Ayon kay Ray Powell, direktor ng SeaLight sa Gordian Knot Centre for National Security Innovation sa Stanford University, lumabas sa Automatic Identification System (AIS) tracking na hindi bababa sa anim na barko ng maritime militia ng China na Qiong Sansha Yu at isang barko ng coast guard ang namataan nitong Linggo habang patungo mula sa Panganiban Reef papuntang Bajo de Masinloc (BDM).

Nauna nang iniulat ni Powell na anim pang barko ng Chinese maritime militia ang umalis sa BDM bago dumating ang nasabing bagyo. Samantala, isang 111-metrong barko ng Chinese Coast Guard, na may bow number na 3305, ang nanatili sa bahura at hinarap ang bagyo.