Bivol, dinurog si Canelo sa WBA light heavyweight title

ni MC - @Sports | May 9, 2022

Napanatili ni unbeaten Dmitry Bivol ang kanyang WBA light-heavyweight world title sa bisa ng unanimous points decision laban kay Saul "Canelo" Alvarez kahapon at ganap na ibigay sa Mexican superstar ang ikalawang pagkatalo sa buong buhay nito bilang boksingero.

Umibayo ang record ng Russian na si Bivol, 31-anyos, sa 20-0 panalo-talo at may 11 knockouts, habang ang multiweight champion na si Alvarez, isang heavy favorite ay lagpak sa 57-2 at may 2 draws. Ang tangi niyang talo ay ang laban niya kay Floyd Mayweather sa light middleweight noong 2013.

Nakapagtala uli sa boxing history si Alvarez noong Nobyembre nang talunin niya si Caleb Plant upang maging unang boksingero na napag-isa ang lahat ng apat na super middleweight world title belts.

Nagwagi rin siya sa light-heavyweight kontra Sergey Kovalev sa 11th round para sa WBO 175-pound title noong November 2019.

Hindi sumuko si Bivol bagama’t nasisiyapulan na siya ng pressure kay Alvarez at hindi rin nagpapakitang nasasaktan ng Mexican na nahirapan din sa depensa ng Russian.

"He hurt my arm," ani Bivol habang ipinakikita ang puro pasa na braso. "I felt his power, you can see on my arm. He beat my arm up — but not my head."

Lahat ng 3 hurado na sina Tim Cheatham, Dave Moretti at Steve Weisfeld ay nagbigay ng iskor na 115-113 pabor kay Bivol. Napakalaking pagkadismaya naman ito para sa pro-Alvarez fans sa T-Mobile Arena sa Las Vegas, na umaasa pa naman ng Mexican victory sa panahon ng Cinco de Mayo holiday weekend.

Crawford, hinahamon: Ang sagot kay Spence, Let's Go!

ni GA - @Sports | April 25, 2022

Inaabangan na ang mega boxing event na maaaring mangyari sa susunod na ilang buwan — ang pagtatapat nina unified IBF/WBC at newly crowned WBA (super) welterweight champion Errol “Truth” Spence, Jr. at WBO 147-pound titlist Terence “Bud” Crawford – matapos na magkasundo ang dalawa na tapusin na paghihintay ng mga boxing fans upang matukoy ang pinakamahusay na boksingero sa welterweight at maituturing na pound-for-pound fighter sa larangan ng boksing.

“Everybody knows who I want next, I want Terence Crawford next,” bulalas ni Spence, Jr. kasunod ng 10th round TKO victory kontra kay Yordenis “54 Milagros” Ugas noong nakaraang Linggo nang umaga sa AT&T Stadium sa Arlington, Texas.

“That's the fight that I want. That's the fight that everybody wants. I'm going to go over there and take his shit too. Terence, I'm coming for that motherf---ing belt."

Sumegunda naman ang 34-anyos na three-division World champion na si Crawford sa kanyang Twitter account nang ipahayag ang kanyang kagustuhang matuloy na ang inaasam na bakbakan at sagupaan sa ibabaw ng ring.

“@ErrolSpenceJr congratulations great fight. Now the real fight happens. No more talk, no more side of the street. Let’s go!!!” pahayag ni Crawford sa kanyang opisyal na Twitter account nitong Linggo na matagumpay namang nadepensahan ang korona nang limang beses laban kina Jose Benavidez, Jr., Amir Khan, Egidijus Kavaliauskas, Keli Brook at noong Nobyembre 20, 2021 kay dating welterweight champ Shawn “Showtime” Porter na nagtapos sa 10th round TKO.

Matatandaang hindi matuloy-tuloy ang pagtatapat nina Spence at Crawford dahil sa pagkakaiba ng promotional outfits ng mga ito — si Spence ay nasa poder ng Premier Boxing Champions ni Al Haymon, habang nasa ilalim ng Top Rank Promotions ni Bob Arum si Crawford – subalit, nagdesisyon si Crawford na lisanin ang Top Rank upang hanapin ang tsansang makatapat ang 32-anyos mula DeSoto, Texas.

“I’m pretty sure my decision is made already,” wika ni Crawford sa naunang panayam ni Kevin Iole ng Yahoo Sports.

Ugas, napinsala ang mata nang ma-TKO kay Spence, Jr.

ni GA - @Sports | April 20, 2022

Daraan sa matagal na pagpapahinga ang dating WBA (super) welterweight champion Yordenis “54 Milagros” Ugas kasunod ng 10th round TKO na pagkatalo kay bagong unified IBF/WBC/WBA titlist Errol “Truth” Spence, Jr., nitong linggo sa AT&T Stadium sa Arlington, Texas.

“I have a fracture in my eye and in the next few days the doctors will say how they will treat it,” pahayag ng 35-anyos ng Santiago de Cuba sa kanyang opisyal na Instagram post. “I spent all morning in a hospital and I write these words with only one eye, the other one is still closed.”

Inawat ni referee Laurence Cole ang kanilang laban sa 10th round kasunod na rin ng abiso ng ringside physician dahil sa namamagang kanang mata ni Ugas mula sa malulutong na patama ng kaliweteng si Spence, Jr. na nanatiling undefeated sa 28 na laban kasama ang 22 panalo mula sa knockouts.

Bumagsak sa 27-5 rekord kasama ang 12 knockouts ang 2008 Beijing Olympic bronze medalist na nagsimulang mamaga ang kanang mata kasunod ng kaliwang uppercut ni Spence sa 7th round.

"I couldn't see from the eye, but I wanted to keep going to the end,” pahayag ni Ugas matapos ang laban sa in-ring interview.

Iniulat ng ESPN na hindi kinakailangan ng agarang operasyon sa natamong bugbog ni Ugas, ngunit kinakailangan itong suriing muli matapos na humupa ang pamamaga upang matukoy kung kakailanganin pa ng medical na atensiyon.