Ilang lugar sa Makati at QC, may water service interruption — Manila Water

ni Lolet Abania | July 3, 2022

Nag-anunsiyo ang Manila Water Company, Inc. na makararanas ang ilang mga kostumer sa Makati City at Quezon City ng water service interruption simula Hulyo 4 hanggang 5, 2022.

Sa isang advisory na ipinost sa Twitter, ayon sa Manila Water, ang mararanasang water service interruption ay dahil sa line maintenance activities na nakaiskedyul sa mga itinakdang araw.

Ang ang apektadong lugar ay ang mga sumusunod:

• Bahagi ng Bgy. Pembo, Makati City: mula 10PM ng Hulyo 4 hanggang 4AM ng Hulyo 5

• Bahagi ng Bgy. Blue Ridge B, Quezon City: mula 10PM ng Hulyo 4 hanggang 5AM ng Hulyo 5

• Bahagi ng Bgy. Horseshoe, Quezon City: mula 10PM ng Hulyo 5 hanggang 5AM ng Hulyo 6.

“Manila Water is advising all residents of the affected areas to store enough water to supply their needs during the service improvement activity,” pahayag ng kumpanya.

Paalala naman ng Manila Water sa mga apektadong residente na hayaan munang dumaloy ng ilang minuto ang tubig sa kanilang mga gripo kapag bumalik na ang serbisyo nito hanggang sa maging malinaw na ang tubig.

Ayon pa sa kumpanya, ang mga kostumer ay maaaring tumawag sa kanilang hotline 1627 o via Facebook o Twitter para sa iba pang katanungan.

Mula Mayo 16 – Hunyo 1.. 10 lugar, nagpatupad ng water service interruptions — Maynilad

ni Lolet Abania | May 16, 2022

Sinimulan na ng Maynilad Water Services Inc. (Maynilad) ngayong Lunes, Mayo 16, ang kanilang implementasyon ng service interruptions sa 10 lugar upang mapangasiwaan ang lebel ng tubig sa reservoirs.

Ayon sa Maynilad, ang mga kostumer ay makararanas ng service interruptions mula alas-10:00 ng gabi hanggang alas-4:00 ng madaling-araw sa ilang bahagi ng mga sumusunod na lugar mula Mayo 16 hanggang Hunyo 1:

• Caloocan

• Makati

• Malabon

• Manila

• Navotas

• Parañaque

• Pasay

• Quezon

• Valenzuela

• Bulacan

Ayon sa Maynilad, ito ay para ma-manage nang maayos ang mabilis na pagbaba ng lebel ng tubig mula sa reservoirs sanhi ng mataas na demand ng tubig sa umaga.

“This will enable us to refill our reservoirs at night in preparation for the daytime peak demand,” paliwanag ng Maynilad.

Pinapayuhan naman ng Maynilad ang mga apektadong kostumer na agad na mag-ipon ng sapat na tubig habang available pa ito sa umaga.

Paalala ng Maynilad sa mga kostumer, kapag bumalik na ang serbisyo ng tubig, hayaan muna na dumaloy saglit ito hanggang sa maging malinaw na ang lumalabas na tubig.

Sinabi rin ng Maynilad, ang mga mobile water tankers ay naka-stand-by lamang at handang mag-deliver ng potable water kung kinakailangan. Alas-6:00 ng umaga ngayong Lunes, nai-record ang water level sa Angat Dam na nasa 191.11 meters, kung saan mas mababa kumpara sa normal high water level nito na 210 meters.

Kakulangan sa tubig, maiwasan.. Cloud seeding, isasagawa na — NWRB

ni Lolet Abania | March 4, 2022

Plano ng pamahalaan na magsagawa ng cloud seeding operations upang maiwasan ang posibleng kakulangan sa tubig sa panahon ng tag-init, ayon sa National Water Resources Board (NWRB).

“Ngayong buwan Marso at Abril ay nag-ready na rin po ang (Metropolitan Waterworks and Sewerage System) at mga konsesyonaryo doon po sa tinatawag nating cloud seeding operations,” pahayag ni NWRB executive director Dr. Sevillo David Jr. sa isang interview.

“At ‘yan po ay gagawin ngayong Marso’t Abril at nakikipag-ugnayan po ang MWSS sa PAGASA, ‘yun pong sapat na panahon para po makapag-conduct po,” anang opisyal.

Ayon kay David, ang water level ng Angat Dam, isa sa pinakamalalaking pinagmumulan ng tubig sa Metro Manila ay nasa 195.9m sa ngayon. Bagama’t sapat ang suplay ng tubig, nanawagan naman si David sa publiko na kailangang magtipid ng tubig upang makatulong sa gobyerno na para maiwasan ang posibleng pagkakaroon ng krisis sa tubig sa dry months.

“Ngayon po ay sa tingin po natin may sapat namang suplay ng tubig na nanggagaling sa Angat Dam, particular po itong mga panahon ng tag-init… Kaya lang po ay nakikiusap din tayo sa mga kababayan natin na magtipid pa rin po kasi hindi ho ganoon kaganda ‘yung lebel ‘no, medyo mababa po ‘yan sa mga inaasahan po natin,” giit ni David.

“At mas maganda po ay pagtulungan po natin ang tamang paggamit ng tubig para naman po mapanatili natin ‘yung medyo maganda-gandang level po ng Angat Dam,” sabi nito. Aniya, bukod sa cloud seeding ay may iba pang measures na kanilang ginagawa para matiyak na magiging sapat ang suplay ng tubig sa Metro Manila.

“Kagaya po dito sa Metro Manila, ay nakahanda po ‘yung mga deep wells at mga treatment plants, para po makatulong ‘no sa pagbibigay ng… para may mapagkunan tayo ng karagdagang tubig po kung sakali po, kung patuloy mang bumaba ang Angat Dam at magkaroon ng adjustment sa alokasyon, ay meron pa hong pwedeng mapagkunan para makadagdag doon sa pangangailangan po natin ng tubig bukod po sa Angat Dam,” paliwanag ni David.

“Sa parte po ng mga irigasyon ay ‘yung mga magsasaka po natin at NIA (National Irrigation Administration) po ay tumutulong din po ‘no dito sa kasalukuyang sitwasyon at mina-manage po nila ‘yung mga nare-release po na tubig na galing sa Angat Dam,” saad ng opisyal.

“At hindi ho nila sinasayang ‘yan at mga nagkakaroon nga po ng tinatawag na mga shallow tube wells para naman po mas ma-optimize ‘no, ‘yung tubig na nare-release po’t nagagamit na irigasyon at mga kanal po,” banggit pa ni David.