Simula Hulyo 4-23 Voter registration, tuloy na — Comelec

ni Lolet Abania | July 3, 2022

Handa na Commission on Elections (Comelec) na ipagpatuloy ang voter registration na magsisimula sa Lunes, Hulyo 4.

“Ang pagpapatuloy ng voters registration ay magsisimula bukas, July 4, 2022 hanggang July 23, 2022... Lunes-Sabado, mula 8:00 a.m. hanggang 5:00 p.m.,” pahayag ni Comelec spokesperson Atty. John Rex Laudiangco sa isang radio interview ngayong Linggo.

Tatagal ang registration hanggang Sabado, Hulyo 23, na para sa lahat ng uri ng aplikasyon na in-person nang gagawin.

Ayon sa Comelec, ang mga voter applicants ay maaaring pumunta sa Office of the Election Officer sa kani-kanilang district o city o municipality sa mga nabanggit na petsa mula Lunes hanggang Sabado, alas-8:00 ng umaga hanggang alas-5:00 ng hapon, kabilang na ang mga holiday.

Sinabi ni Laudiangco na target ng Comelec ang mga bagong voters para sa Sangguniang Kabataan (SK) elections na magparehistro sa ibinigay nilang registration period.

“Ang target sa voters registration ay ‘yung mga bagong botante para sa Sangguniang Kabataan (SK)... Ito ‘yung mga magiging 15 years o 15 years old to 17 years old... Kung hindi pa 15 pero magfi-15 [years old] by December 5, 2022, pwede nang magparehistro,” aniya.

Kaugnay nito, ayon kay Laudiangco, ang mga kwalipikadong nag-apply na bumoto para sa regular elections kabilang na ang barangay elections ay iyong magiging 18-anyos na sa Disyembre 5.

“Para naman sa ating regular registration kasama na ‘yung sa barangay dito, ‘yung mag-e-18 years old on or before December 5,” sabi ni Laudiangco. Gaganapin ang barangay at SK elections sa Disyembre 5, 2022.

“Ang boboto sa SK sa December 5, 2022 ay ‘yung 15 to 30 years old; Sa regular barangay election, 18 and above... ‘Yung 18 to 30 years old, dalawang balota ang sasagutan nila dahil saklaw sila ng Barangay at SK elections,” paliwanag niya.

“Nakasaad sa batas na kailangan isagawa ang Barangay at SK elections sa December 5... Hangga’t walang batas para ‘wag itong ituloy, tuloy ang paghahanda ng Comelec,” giit pa ni Laudiangco.

Voter registration, bukas na ulit sa Hulyo 4-23 — Comelec

ni Lolet Abania | June 23, 2022

Ipagpapatuloy na ng Commission on Elections (Comelec) ang voter registration mula Hulyo 4 hanggang Hulyo 23, 2022. Ayon kay acting Comelec spokesperson John Rex Laudiangco, inaprubahan ng Comelec en banc ang resumption ng voter registration sa kanilang regular session na ginanap nitong Miyerkules.

Sinabi ni Laudiangco na nagdesisyon ang Comelec na ipagpatuloy ang voter registration dahil na rin sa napipintong Barangay and Sangguniang Kabataan Elections (BSKE) na nakatakda sa Disyembre 5, 2022.

“Under RA 8189 (Continuing Voter’s Registration Act), voter registration is prohibited within 120 days prior to elections. Ang BSKE po is on December 5, 2022. Roughly starting August 7, prohibited na,” pahayag ni Laudiangco.

Binanggit naman ni Laudiangco na mayroon ding post-registration activities at requirements na kailangang iproseso ang poll body bago ang susunod na eleksyon.

“Roughly starting August 7, prohibited na. Therefore, we only have July 24 to August 6 to Post/Publish names of voter registration applicants; Calendar/Set the Election Registration Board (ERB) Hearings; Subject registrants to database verification; Conduct said ERB Hearings; Draft and Approve the Project of Precincts; Cluster established precincts as may be necessary,” paliwanag niya.

“Madami po kasing post registration activities and requirements na kailangan bigyan ng sapat na oras. Bukod pa po sa Petitions for Inclusion or Exclusions which will be filed with, heard and decided by MeTCs or MTCs,” saad pa ni Laudiangco.

Gayunman, ani Laudiangco, “the resolution will still be formally promulgated.” Ayon sa Comelec, nasa mahigit 67.5 milyon ang registered voters sa katatapos na national at local elections noong Mayo 9.

Hanggang Okt. 30, 2021.. Voter registration, extended — Comelec

ni Lolet Abania | September 29, 2021

Nagkakaisa ang naging boto ng Commission on Elections (Comelec) en banc ngayong Miyerkules hinggil sa pagpapalawig ng voter registration para sa 2022 national at local elections.

“Extension is unanimously approved,” ani Comelec Spokesperson James Jimenez sa mga reporters.

Sa post sa Twitter ni Comelec commissioner Rowena Guanzon, ang ekstensiyon ng voter registration ay mula Oktubre 11 hanggang 30, 2021, alas-8:00 ng umaga hanggang alas-5:00 ng hapon.

Una nang sinabi ni Comelec chairman Sheriff Abas na ang pagpapalawig ng voter registration ay mula Oktubre 9 hanggang 31.

Ang Oktubre 9 ay natapat na Sabado habang ang 31 naman ay isang Linggo. Paliwanag ni Guanzon, walang registrations kapag Sabado maliban sa Oktubre 30, ang huling araw ng voter registration.

Sinabi pa ng Comelec commissioner na maaari namang isagawa ang reactivation sa pamamagitan ng e-mail o personal na magpunta sa kanilang opisina. Tatanggapin naman ang mga registrants sa lahat ng mga election offices at registration sites sa mga malls.

Samantala, ayon kay Jimenez, lahat ng registrations services ay kanilang isasagawa kabilang na rito ang transfer ng voter registration at reactivation. Extended din ang overseas voter registration ng dalawang linggo, mula Oktubre 1 hanggang 14.

“Note that for overseas voting, the filing of COCs is not an issue, thus the extension starts immediately,” sabi ni Jimenez. Nabuo ang desisyon ng Comelec en banc dahil ayon kay Guanzon, “As requested by the Senate.”

“As I have voted a month ago, I voted again today to extend voter registration because of the necessity for it and to ensure access of all voters to the elections,” saad pa ni Guanzon.

Kaugnay nito, sa isang interview naman kay Abas, sinabi nitong napagdesisyunan din nila na ipagpatuloy ang voter registration matapos ang Oktubre 1 hanggang 8 na paghahain ng certificate of candidacy para sa mga nais tumakbo sa 2022 elections dahil aniya, batid nilang ang Comelec ay magiging sobrang abala sa pag-accommodate ng mga kandidato sa buong mundo na gustong pumasok sa pulitika.

Hanggang nitong Setyembre 11, sinabi ni Abas na umabot na sa 63,364,932 registered voters para sa eleksyon sa 2022. Mayroong 9 milyong karagdagang botante para sa darating na halalan.

Sa naturang bilang, 5 milyon ay mga bagong registrants, 3.2 milyon ay nai-transfer na voter registrations, at tinatayang nasa 871,000 ay reactivated registrations.