Troopers at Chargers, unahan sa panalo; Crossovers sa 4th win

ni Gerard Arce @Sports | February 21, 2023

Mga laro ngayong araw (Martes):

(Philsports Arena)

4:00 n.h. – Army Black Mamba vs. Akari Chargers

6:30 n.g. – PLDT High Speed Hitters vs. Chery Tiggo Crossovers

Hahagilapin ng Chery Tiggo Crossovers ang kanilang ika-apat na sunod na panalo at subukang manatiling nag-iisang undefeated na koponan kontra sa konektadong PLDT High Speed Hitters, habang magsasagupa rin ang parehong walang panalo na Army Black Mamba Lady Troopers at Akari Chargers sa pagpapatuloy ng 2023 Premier Volleyball League (PVL) All-Filipino Conference sa Philsports Arena sa Pasig City.

Tanging ang Chery Tiggo na lang ang nananatiling koponan na walang talo sa liga na itinuturong isa sa mga dahilan ay ang mahusay na pagmamando ng opensa ni playmaker Alina Bicar na unti-unting dinadala sa mas diretso at swabeng daan patungo sa inaasam na mataas na puwesto ang koponan.

“Alina is now really showing a lot of heart. I can see the aggressiveness. Hindi 'yan masalita, hindi 'yan expressive,” pahayag ni coach Aaron Velez, na muling masusubukan ang kakayanan kontra sa matatayog na manlalaro ng PLDT High Speed Hitters sa tampok na laro sa alas-6:30 ng gabi sa Philsports Arena sa Pasig City.

Maging si league-leading scorer at team captain Mylene Paat ay hindi maiwasang papurihan ang 25-anyos na 5-foot-6 setter dahil sa ibinibigay nitong leadership sa loob ng court, kahit na medyo maliit ito sa pagiging setter ay hindi nila nararamdaman dahil kahit depensa.

“'Yung leadership niya kasi kumbaga sa barko, siya 'yung captain namin. Ako 'yung captain ng team pero siya 'yung captain ng game,” wika ni Paat, na patuloy na pinangungunahan ang opensiba ng Chery Tiggo. “Short talaga siya, as in short setter. 'Pag once nasa loob siya, hindi namin napi-feel 'yung height niya,” dagdag ni Paat na makakatulong din sina Czarina Carandang, EJ Laure, Shaya Adorador, at Pauline Gaston.

Lady Knights, inisahan agad ang Red Spikers sa NCAA Volley

ni Gerard Arce @Sports | February 20, 2023

Mga laro sa Martes:

(San Andres Sports Complex)

9:00 n.u. – Mapua vs LPU (men’s)

12:00 n.t. – Mapua vs LPU (women’s)

2:00 n.h. – CSB vs EAC (women’s)

4:30 n.h. – CSB vs EAC (men’s)

Pumalo ng unang panalo ang Colegio de San Juan de Letran Lady Knights matapos matakasan ang San Beda University Lady Red Spikers sa dikdikang third set upang makuha ang straight set panalo sa bisa ng 25-20, 25-23, 28-26, kahapon sa opening weekend ng 98th season ng National Collegiate Athletic Association (NCAA) women's volleyball tournament sa San Andres Sports Complex sa Maynila.

Nagpamalas ng All-around performance si Daisy Melendres para sa Lady Knights na mag-isang nagtapos ng double-digit iskoring sa 15 puntos mula sa walong atake, limang blocks, isang ace at limang excellent digs para sa bwenamanong panalo ng Muralla-based squad. Nag-ambag rin si Judiel Nitura ng walong puntos, gayundin ang tig-pitong puntos nina Lea Rizel Tapang at Julienne Castro, na may apat na digs.

Nagawa pang bumira ang Letran ng matinding 12-1 kalamangan sa pagbubukas ng third set, subalit nagsimulang magbaga ang mga hambalos ng Lady Red Spikers upang itabla ang laro sa 19. Nagawa pang mabitbit ang laro sa karagdagang set dahil sa pananatili ng San Beda na mapahaba ang laro patungong fourth set. Subalit tinapos ni Nitura ang laro para sa Lady Knights kasunod ng magkasunod na birada.

Naaksaya naman ang tig-10 puntos nina Kleiner Abraham at Chynna Castillo para sa San Beda, habang kinapos naman sa doble pigura sina Marianne Tayaga at Katleya Molina sa siyam puntos at kapitana Trisha Paras sa walong puntos.

Makakaharap naman ng Letran sa darating na Biyernes ang Mapua University Lady Cardinals, habang magbabawi ang San Beda kontra sa three-time champions na Arellano University Lady Chiefs sa Miyerkules.

Maxwell, mainit sa Fuel Masters, CSB, wagi sa NCAA volley opening

ni Clyde Mariano @Sports | February 19, 2023

Nakaahon ang Phoenix Fuel Masters sa malalim na hukay at tinalo ang perrenial tail-ender Terrafima Dyip, 125-100, sa Governors Cup sa PBA 47th season sa Smart Araneta Coliseum kagabi.

Gustong makaahon sa kasalukuyang kinasasadlakan sa kartada 1-5, naglaro nang husto ang LPG Fuel Masters na outshoot at outrebounded ang Car Makers para kunin ang pangalawang panalo at palakasin ang kanilang campaign na makapasok sa quarterfinals at panatilihin ng Phoenix ang kanilang lakas sa Terrafirma.

Dinomina ng Phoenix ang laro na lumamang ng 25, 94-69, iposte ang impresibong panalo para makaahon sa lungga ng kabiguan. Ang talo ay pang-apat at bumagsak ang Car Makers sa team standings sa kartadang 3-4 sa ibaba ng Meralco 3-3.

Pinangunahan ni import Da Vaughn Maxwell ang opensiba ng Phoenix kontra Jordan Williams sa kanilang match up katuwang sina Jayson Perkins, RJ Jazul, Encho Serrano, Tyler Tio at dating North Port Sean Anthony at ibigay sa LPG Fuel Masters ang mahalagang panalo na ikinatuwa ni coach Jamikie Jarin at sabay binati ang kanyang mga players sa magandang laro na ipinakita.

Samantala, nanaig ang De La Salle-College of Saint Benilde sa unang laro at depensahan ang title retention campaign sa NCAA Season 98 women’s volleyball tournament opening kahapon.

Bumagal pa ang laro nila dahil sa ipinakitang improvement ng San Sebastian College-Recoletos mula sa paghahabol ng last season sophomore na sina Kath Santos, Kj Dionisio, Amaka Tan, at Tina Marasigan. Aminado si Benilde assistant coach Jay Chua na hindi nagpakabog ang kanyang players.