Cool Smashers, mabagsik; Bulldogs, nilapa ang ADMU

ni Gerard Arce @Sports | February 26, 2023

Nakabawi mula sa first set na pagkabigo ang five-time conference champion na Creamline Cool Smashers upang muling biguin ang Chery Tiggo Crossovers upang makuha ang tatlong sunod na set patungo sa four-set panalo sa 17-25, 25-11, 25-19, 25-21 kahapon sa 2023 Premier Volleyball League (PVL) All-Filipino Conference sa Philsports Arena sa Pasig City.

Lumista ng triple-double na kontribusyon si dating one-time conference MVP Jessica Margaret “Jema” Galanza na bumuhos ng 25 puntos mula sa 22 atake, 13 digs, at 12 receptions, gayundin sina Michelle Gumabao na may 17 puntos mula lahat sa atake, Celine Domingo sa 16pts at ang pambihirang 34 excellent sets ni Julia Morado-De Guzman kasama ang apat na puntos.

Subalit mas naging matibay ang ipinakitang pagsubsob sa bola para sa mahigpit na floor defense ni libero Kyla Atienza upang iligtas sa balakid ang Creamline. Sinalo ng 2019 league at 2022 ASEAN Grand Prix Best Libero ang 20 na digs upang maisalba ang mga matitinding atake at opensibang pinakawalan ng mga kakampi.

Samantala, sinimulan ng defending champions NU Lady Bulldogs ang malupit na kampanya nang walisin ang Ateneo Blue Eagles sa bisa ng 25-15, 25-20, 25-16, habang walang kahirap-hirap na tinapos ng Adamson Lady Falcons ang UE Lady Warriors sa loob lang ng 63 minuto para makuha ang 25-19, 25-9, 25-5 panggugulpi sa pagbubukas ng 85th UAAP women’s volleyball tournament kahapon sa SM Mall of Asia Arena sa Pasay City.

Lumapa ng husto si heavy-hitter Alyssa Solomon sa kabuuang 12 puntos mula sa 10 atake at tig-isang block at service ace para sa Lady Bulldogs, habang sumegunda si team captain Princess Anne Robles sa 11pts mula sa 10 atake, kasama ang 8 digs para makuha ng Sampaloc-based lady squad ang buwenamanong panalo.

Bolts, 'di napalagan ng NLEX; Titans, diniskaril ang Troopers

ni Clyde Mariano / GA @Sports | February 24, 2023

Kinuryente ng Meralco Bolts ang NLEX Road Warrriors, 114-98 para umabanse sa team standings sa 4-3 at palakasin ang quarterfinal campaign sa Governors Cup sa 47th PBA season sa Philsports Arena sa Pasig City.

Pinangunahan ni KJ McDaniel ang pagdiskaril sa kayang dating koponan at katuwang na tumipa ng game high 31 points sina Alein Maliksi, Chris Newsome, Aaron Black at Cliff Hodge upang dalhin ang Bolts sa pang-apat na panalo sa 7 laro at matagumpay na naiwasan ang pangalawang sunod na talo nang yumuko sa league-leading sister team at unang q'finalist Talk ‘ N Text, 104-111.

Nag-ambag si Maliksi ng 19, Newsome ng 18, Aaron Black, 15 at Hodge at diniskaril ang ambisyon ni Road Warriors coach Frankie Lim na lumapit ng isang laro para umabanse sa next round sa kartadang 5-2.

Samantala, naiwasan ng Choco Mucho Flying Titans na mauwi sa disgrasya ang panalo kontra Army Black Mamba Lady Troopers upang maitakas ang panalo sa dikdikang 5th set -23-25, 25-20, 25-16, 25-27, 15-11 mula sa mahusay na hambalos ni Regine Arocha sa unang laro ng 2023 Premier Volleyball League (PVL) All-Filipino Conference kahapon sa FilOil EcoOil Centre sa San Juan City.

Matapos makuha ang 2-1 set na kalamangan, tila nagulo ang mundo ng Choco Mucho sa 4th set ng gumuho ang 19-14 na bentahe sa fourth set ng unti-unting tyagain ng Lady Troopers na habulin ang kalamangan mula sa pagtutulungan nina Jeanette Villareal, Royce Tubino, at Nene Bautista na maitulak ang deciding 5th set.

Naging malaking tulong ang dating AU Lady Chiefs outside hitter sa 5th set na kumulekta ng kabuuang 13 puntos mula sa 12 atake at isang block, kasama ang 8 reception, upang suportahan ang pagbida ni Katrina Tolentino at Isa Molde na kumamada ng tig-18 atake, mula sa 20 at 19 puntos, ayon sa pagkakasunod.

AU Lady Chiefs nakalusot, CSB, mabangis sa NCAA Volley

ni Gerard Arce @Sports | February 23, 2023

Mga laro ngayong Huwebes: (San Andres Sports Complex)

9:00 n.u. – San Sebastian Stags vs Lyceum Pirates (men’s)

12:00 n.t. – San Sebastian Lady Stags vs Lyceum Lady Pirates (women’s)

Naging mahusay sa kanyang plays at services si playmaker Donnalyn Paralejas para ibigay sa dating three-peat champions Arellano University Lady Chiefs ang unbeaten 2-0 marka upang talunin ang San Beda University Lady Spikers sa bisa ng 25-11, 24-26, 25-7, 25-12, Miyerkules ng hapon sa 98th National Collegiate Athletic Association (NCAA) women’s volleyball tournament sa San Andres Sports Complex sa Malate, Manila.

Inihahanda ng Lady Chiefs ang koponan upang bawiin ang titulong nabitawan noong isang taon matapos na kapusin sa Finals para maging runner-up kontra defending champions De La Salle-College of Saint Benilde Lady Blazers.

Kuminang si Paralejas ng kabuuang 9 na puntos mula sa tatlong atake at mataginting na 6 na aces kabilang ang 15 excellent sets, habang pinagbidahan ni Laika Tudlasan ang opensa ng Lady Chiefs sa 15 puntos, kabilang ang anim na service aces, gayundin sina Pauline De Guzman sa 14pts na bumida sa atake sa siyam at limang blocks, Marianne Padillon sa 13pts, at Dodee Joy Batindaan na may 11pts.

Samantala, ipinaramdam ng De La Salle-College of Saint Benilde ang bangis sa laro higit na sa third set ng walisin ang Emilio Aguinaldo College Lady Generals sa 25-17, 25-20, 25-8, mula sa mga nagbabagang hambalos ni Jade Gentapa sa ikatlong laro. Manila.

Aminado mang ramdam ang pressure sa kawalan ni last season MVP Francis Mycah Go dulot ng knee injury, patuloy pa rin umanong hinahanap ang mas matinding kombinasyon para sa koponan sa mga darating na laro.