NU kampeon sa BVR, Tolosa, champ sa ESNAJ

ni VA / RN @Sports | June 21, 2023

Namayani ang National University (NU) pair nina Kly Orillaneda at Kathrina Epa, 21-17, 17-21, 15-11 kontra sa Bacolod tandem nina Bianca Lizares at Honey Grace Cordero para kumpletuhin ang 6-game sweep at angkinin ang women's crown ng Beach Volleyball Republic (BVR) Candon City leg noong nakaraang linggo sa Darapidap Beach.

Ito ang unang pagtatambal nina Orillaneda at Epa sa BVR on Tour.

Sa men's division, bigo naman ang NU na mawalis ang torneo nang matalo sina Pol Salvador at Alex Iraya sa Harbor Pilot duo nina Ranran Abdilla at Rancel Varga, 13-21, 10-21.

Dahil sa panalo, nakumpleto nina Abdilla at Varga ang 5-0 sweep sa men's division.

Ang titulo ang una sa BVR on Tour ni Orillaneda na ang best finish ay second place noong 2018 December Open nang pumangalawa ang tambalan nila ni Roma Joy Doromal kina Dzi Gervacio at Bea Tan, gayundin para kay Epa na nagsimulang maglaro sa BVR noong 2019.

Para makarating sa kampeonato , ginapi ng pareha nina Orillaneda at Epa ang Ateneo 1 pair nina Gena Hora at Yumi Furukawa 21-17, 21-13 sa quarterfinals at ang Ateneo 2 tandem nina Jana Cane at Liz Lomocso 21-17, 21-13 sa semis.

Samantala, ang titulo ang ikalima sa BVR para kay Abdilla habang pangatlo naman ito ng katuwang niyang si Vargas.

Samantala, tagumpay ang batang 11 year's old na si Christian Tolosa ng Imus, Cavite na umiidolo sa First Asian champion Grandmaster Eugene Torre ng makamit nito ang kampeon sa katatapos na 2nd ESNAJ FIDE Standard Invitational Round Robin Chess Tournament na ginanap sa Atrium, Robinsons Place Gen. Trias, Cavite.

Nagtala ng pinakamataas na puntos 7.5 si Tolosa na nagmula ito sa 9 na nakalaban.

Pumangalawa naman si AFM John Peter Caballes ng 7 puntos ng Dasmariñas, Cavite at pumangatlo si John Martin Firmalino 5 puntos ng Gen. Trias Cavite.

Valdez at CCS masusubukan ng 2 foreign guest team sa PVL

ni Gerard Arce @Sports | June 20, 2023

Masusukat ang tibay ng grupo ni Alyssa Valdez at ng defending champions Creamline Cool Smashers sa karagdagang dalawang foreign guest sa sasabak sa darating na 2023 Premier Volleyball League (PVL) Invitational Conference na magbubukas simula Hunyo 27 sa FilOil EcoOil Centre sa San Juan City.

Umaasa ang mga tagasubaybay at kakampi ni Valdez na magiging siyento-por-siyento na itong babanat ng husto para sa Cool Smashers na masusubukan sa 10 ibang local teams, habang kumpirmadong lalaro rin ang isang koponan mula Japan at isa pang hinihintay na foreign team para sa round robin semifinals.

Inihayag ni PVL President Ricky Palou na kasama ang isang koponan mula Japan sa mid-season conference, habang hinihintay pa ang ibang kopponan mula sa Japan, Vietnam, Indonesia, Thailand, at Hong Kong.

Idinagdag nitong makakasama ang unang dalawang koponan na nagkumpirma na lalaro sa komperensiya, kung saan noong nagdaang taon ay naglaro ang Taiwan team na Kingwhale Taipei na tumapos ng runner-up finish sa Cool Smashers. Nakatakda sanang sumali ang Kobe Shinwa Women’s University sa parehong komperensiya noong isang taon, subalit umatras dahil sa COVID-19.

Nilinaw din ni Palou na inimbitahan nila ang mga professional clubs sa mga nasabing bansa, gayundin ang pag-imbita sa ibang national squad, upang maging mas mataas ang kompetisyon at makatulong sa preparasyon ng bansa sa mga darating na international tournament.

Nakatakdang tumulong sa multi-titlist at multi-awarded spiker sina three-time conference MVP Tots Carlos, Jema Galanza, Michelle Gumabao, Celine Domingo, Risa Sato, Pangs Panaga, libero Kyla Atienza, ace setter Julia Morado-De Guzman at ang nagbabalik indoor na si Bernadeth Pons.

Cool Smashers, dedepensa ng titulo sa PVL Invitational

ni Gerard Arce / VA @Sports | June 18, 2023

Sisimulan ng Creamline Cool Smashers ang kanilang pagdepensa sa titulo ng 2023 Premier Volleyball League (PVL) Invitational Conference sa pakikipagharap sa balasadong Cherry Tiggo Crossovers sa pagbubukas ng salpukan simula Hunyo 27 sa FilOil EcoOil Centre sa San Juan City.

Nananatiling matinding line-up ang ipaparada ng Cool Smashers na inaasahang pagbabalik sa koponan ni team captain at multi-titlist MVP Alyssa Valdez, na paniguradong sasaklolohan ng dekalibreng mga atake nina 3-time conference MVP Diana Mae “Tots” Carlos, Jema Galanza, Michelle Gumabao, Celine Domingo, Risa Sato, Pangs Panaga, libero Kyla Atienza, ace setter Julia Morado-De Guzman at ang nagbabalik indoor na si Bernadeth Pons.

Makakatapat ng six-time conference champions ang rookie-laden team na paniguradong pangungunahan ni 2022 Reinforced Conference MVP Mylene Paat ang grupo nina dating National University Lady Bulldogs Cess Robles, Jen Nierva at Joyme Cagande at sina UST stars Imee Hernandez at Eya Laure.

Magduduwelo ang dalawang koponan ng 6:30 p.m., habang magde-debut ang bagong tatag na Farm Fresh Foxies ni coach Jerry Yee laban sa All-Filipino Cup third placer F2 Logistics Cargo Movers ng 1:30 p.m.

Ipararada ang Foxies ng mga back-to-back NCAA champions na Lady Blazers. Ilalatag sa 3-game schedule ang laro ng Pool B preliminaries ng mas pinalakas na Cignal HD Spikers nina ‘GonzAquis’ nina Jovelyn Gonzaga at Rachel Ann Daquis, gayundin ang debut ni Vanie Gandler laban sa All-Filipino runner-up na Petro Gazz Angels sa 4 p.m.

Magpapakitang-gilas din sa PVL debut ang Quezon City Gerflor Defenders laban sa powerhouse Creamline sa Pool A sa Hunyo 29 kasunod ni Cherry Ann “Sisi” Rondina para sa Flying Titans kontra Farm Fresh at tatapusin ng Angels at nagbabalik indoor games na Foton Tornadoes.