Phl binigo ng Bahrain para sa q'finals ng AVC Men's Cup

ni MC @Sports | July 13, 2023

Nabigo ang Philippine men’s national volleyball team na mapanatili ang two-game winning streak sa 2023 Men's Asian Volleyball Challenge Cup kahapon.

Dumanas ang Filipino spikers ng sweep loss sa mga kamay ng Bahrain, 20-25, 17-25, 23-25 sa University of Taipei Hall sa Taiwan. Ang Final 12 loss na rin ang pumigil sa kanila para makapasok sa quarter final stage ng tournament.

Sa naturang pagkatalo, papasok ang Philippine team sa classification phase para sa 7th to 12th places.

Habang ang Bahrain ay nag-aabang sa magwawagi sa matchup ng Australia at Macau. Bago ang panalo, nagwagi pa muna ang Philippines ng dalawang straight matches sa Pool D sa pagsisimula ng kampanya sa AVC Cup.

Winalis nila ang Macau, 25-21, 25-15, 25-14 sa unang match ng torneo at sa sumunod na five-setter win kontra Mongolia, 22-25, 25-21, 26-24, 22-25, 15-12.

Ang dalawang sunod na panalo sa group stage ang nag-angat sa team mula sa 111 places at 167 hanggang sa no. 56 sa International Volleyball Federation (FIVB) world rankings.

“This is one big, major achievement for our men’s indoor volleyball team,” ayon kay Philippine National Volleyball Federation president Ramon “Tats” Suzara kahapon. “This is by far the most significant accomplishment by our men’s team and the PNVF just under three years into its establishment as the national federation,” dagdag niya.

Ang kanilang nakalaban ay may parehong paglundag din sa rankings kung saan ang Macau ay umangat mula sa No. 165 hanggang No. 58, at ang Mongolia mula No. 164 hanggang no. 59.

Third conference ng PVL ipipilit ngayong taon

ni VA @Sports | July 1, 2023

May import o wala, determinado ang Premier Volleyball League (PVL) na idaos ang kanilang ikatlong conference ngayong taon.

Ito ang inihayag ni Sports Vision at PVL president Ricky Palou kasunod ng naunang napaulat na pagpapataw ng sanction sa kanila ng Philippine National Volleyball Federation's (PNVF)na makakahadlang sa pagkuha nila ng international transfer certificates para sa mga foreign guest players o imports.

Pinatawan ng PNVF ng sanction ang PVL dahil sa pagdaraos nito ng torneo-ang kasisimula pa lang na Invitational Conference nang walang awtorisasyon galing sa kanila simula Mayo 16 hanggang Oktubre 15, ang itinakdang national team training period base sa nakasaad sa Article 6.1.1.b ng Fédération Internationale de Volleyball Sports Regulations 2022 na nilabag ng liga.

"We discussed with the team managers and they're going to go back with their principals, the owners of the clubs, and then get back to us. We need a couple of days. By next week we'll know what the plans are but we definitely will have a third conference with or without the imports," ayon pa kay Palou nang makausap ng mga reporters noong Huwebes. "The teams, they're not worried. For them, we'll have a third conference with or without imports. The teams are out for exposure right? So they really want a conference whether there are imports or not, I'm sure they will want to go on."

Ayon kay Palou, sinabihan na sila ni PNVF president Tats Suzara tungkol sa sanction.

Gayunman, kumpiyansa silang maaari nila itong maayos lalo pa't darating sa bansa ang ilang mga opisyales ng International Volleyball Federation (FIVB) para sa Volleyball Nations League (VNL) sa susunod na buwan.

Samantala, nag-adjust ang PVL sa pagdaraos ng Invitational Conference na iniurong nila ng Hunyo 27 upang bigyang-daan ang training at partisipasyon ng Philippine women's volleyball team sa katatapos na AVC Challenge Cup sa Indonesia, kung saan tumapos na pampito ang mga Pinay.

Unahan sa panalo ang 6 Team sa PVL Opening

ni Gerard Arce @Sports | June 27, 2023

Mga laro ngayong araw (Hunyo 27)

(FilOil EcoOil Centre, San Juan City)

1:30 n.h. – Farm Fresh vs F2 Logistics (Pool B)

4:00 n.h. – Cignal vs Petro Gazz (Pool B)

6:30 n.g. – Chery Tiggo vs Creamline (Pool A)

Anim na koponan ang mag-uunahan sa bwenamanong panalo kabilang ang nagtatanggol na Creamline Cool Smashers sa pagbabalik ng bakbakan sa ikalawang kumperensya ng 2023 Premier Volleyball League (PVL) Invitational tourney ngayong Martes ng hapon sa FilOil EcoOil Centre sa San Juan City.

Nakatakdang sumabak agad ang six-time conference champion na Cool Smashers sa pangunguna ni collegiate at pro-ranks multi-titlist at three-time MVP Alyssa Valdez, katulong sina three-time conference MVP Tots Carlos, Jema Galanza at Michelle Gumabao laban sa mas pinalakas na Chery Tiggo Crossovers sa pinakatampok na laro sa alas-6:30 ng gabi.

Masusubukan naman sa unang pagkakataon ang bagong koponan na Farm Fresh Foxies na ipaparada ang mga bagong manlalaro mula sa back-to-back NCAA champions College of Saint Benilde Lady Blazers at dating Adamson University Lady Falcons na sina Trisha Tubu at Kate Santiago na gagabayan ni kontra coach Jerry Yee kontra sa All-Filipino third placers na F2 Logistics Cargo Movers sa unang laro sa ala-1:30 ng hapon sa pagsisimula ng preliminaries para sa Pool B.

Ilalatag rin sa three-game schedule ang laro ng Pool B preliminaries ng mas pinalakas na Cignal HD Spikers na ipaparada ang tambalang ‘GonzAquis’ nina Jovelyn Gonzaga at Rachel Ann Daquis, gayundin ang debut ni Vanie Gandler laban sa All-Filipino runner-up na Petro Gazz Angels sa alas 4:00 ng hapon.

Panigurado ring tutulong para sa Creamline sina last season Finals MVP at middle blocker Celine Domingo, Risa Sato, Pangs Panaga, libero Kyla Atienza, ace setter Julia Morado-De Guzman at ang nagbabalik indoor na si Bernadeth Pons.