ni GA @Sports | October 27, 2023
Mga Laro sa Sabado
(Candon City Arena, Ilocos)
4 n.h. – Galeries Tower vs F2 Logistics
6 n.h. – NXLed vs Petro Gazz
Hindi maawat sa pagkalam ng panalo ang defending champions Creamline Cool Smashers ng durugin ang kulelat na Gerflor Defenders sa pamamagitan ng straight set 25-15, 25-12, 25-10 upang maagang makuha ang liderato at ikatlong sunod na panalo sa unang laro ng triple-header ng 6th Premier Volleyball League (PVL) 2nd All-Filipino Conference kahapon sa Ynares Center sa Antipolo City.
Patuloy na rumatsada sa paghambalos si Michele Theresa Gumabao na pumalo ng 10-of-18 sa atake para sa kabuuang 12 puntos para solong tumapos ng double digit para sa Creamline, habang umayuda rin sa koponan sina Diana Mae “Tots” Carlos at Jessica Margaret Galanza ng tig-7 puntos, habang may tig-anim na kontribusyon sina Bernadeth Pons at Pau Soriano.
“It feels good to see lahat ng hirap namin sa practice, so we have to show up every single day and every single morning and just try to contribute as much as we can as whether in points or to rotate, and team work ang pinaka-importante for us, to see it every game,” wika ni Gumabao, na muling nanguna sa koponan matapos umiskor ng tig-20 puntos sa panalo kontra Choco Mucho Flying Titans at Cignal HD Spikers para sa 3-0 kartada.
Naging madali para sa Cool Smashers ang nakuhang panalo dulot ng mahusay na depensa na sinabayan ng balanseng opensiba na kinakitaan ng 11 blocks at limitahan lamang sa 37 puntos sa tatlong sets ang Defenders. “Any team naman laging pinaghahandaan, kahit sino yung makakalaban. Mga players talagang nagtatrabaho yan,” wika ni Creamline coach Sherwin Meneses.