Tambalang Potts-Pearse kampeon sa All-Aussie final ng Asian Sr. Beach Volley

ni MC @Sports News | Nov. 11, 2024

Photo: Pinagmalupitan nina D’Artagnan Potts at Jack Pearse ang kapwa Australian sa all-Australian title showdown para kunin ang kampeonato sa Asian Senior Beach Volleyball Championships sa Nuvali Sand Courts sa City of Santa Rosa. (Gen Villota)

Binugbog nina D’Artagnan Potts at Jack Pearse ang kapwa Australian na sina Mark Nicolaidis at Izac Carracher, 21-19, 21-19, sa all-Australian title showdown para kunin ang kampeonato sa Asian Senior Beach Volleyball Championships kahapon sa Nuvali Sand Courts sa City of Santa Rosa.

Ginulantang ng 21-anyos na si Potts at ng 22-anyos na si Pearse ang tambalan ng sumabak sa Paris Olympics na sina Nicolaidis at Carracher sa loob ng 40 minuto. “Our team connection was really good,” saad ni Pearse.

“They’re a really great team and to beat them shows the potential that we have as a team.” Aminado si Potts na dinaga sila ni Pearse sa five-day tournament sa hanay ng mga top Asian Volleyball Confederation at FIVB-rated teams na nilahukan ng 14 na bansa.

Unang ginapi nina Potts at Pearse sina Pinoy spikers Lerry John Francisco at Rancel Varga sa bisa ng straight sets sa preliminaries.

Sa event na inorganisa ng Philippine National Volleyball Federation at Asian Volleyball Confederation na kapwa pinamumunuan ni Ramon “Tats” Suzara tumapos sina Abbas Pourasgari at Alireza Aghajanighasab ng Iran, ang men’s Nuvali Open champion noong Abril, sa third place nang talunin sina Chinese Wu Jiaxin at Ha Likejiang, 21-15, 21-17.

Rumehistro sa third place ng women's division sina AVC Beach Tour Nuvali Open champions Jana Milutinovic at Stefanie Fejes ng Australia matapos ang 21-15, 21-19 pagdaig kina Japanese Asami Shiba at Saki Maruyama sa torneong suportado ng Nuvali, Ayala Land, Philippine Sports Commission, Philippine Olympic Committee, City of Santa Rosa, One Sports Plus at Pilipinas Live.

Sakalam ang top-rated Chinese teams, Alas Pilipinas nileksiyunan

ni MC @Sports News | Nov. 9, 2024

Photo: Sina Zeng Jinjin at Xue Chen ng China sa mainit na laban sa 2024 Asian Beach Volleyball Championships sa Nuvali, Sta. Rosa, Laguna. (Gen Villota)

Nagmartsa sa quarterfinals ang Olympian at continental champions ng China dahil sa lakas na ipinakita kontra Alas Pilipinas Women sa Asian Senior Beach Volleyball Championships sa Nuvali Sand Courts sa City of Santa Rosa.

Nakausad na sina Xia Xinyi at Xue Chen, kapwa Paris Olympians at winners ng Asian Seniors 2023 sa Pingtan sa round of eight kasabay ng pakay sa titulo. Pinahirapan din nina Xia at Wang Jingzhe sina Gen Eslapor at Kly Orillaneda, 21-13, 21-8 para sa playoffs.

Nanatiling matibay si Xue, ang Olympic bronze medalist at dating world champion at target din ang titulo nang gapiin ng tambalan nila Zeng Jinjin ang Alas Pilipinas’ teen tandem nina Khylem Progella at Sofiah Pagara, 21-14, 21-11.

Naunang lumamang ang Air Force pair nina Eslapor at Orillaneda sa 5-3, pero ang lakas at determinasyon nila ay hindi sapat para tapatan ang Chinese spikers. “We wanted a good start and we did, but we just lost steam because it’s not easy trying to match the game of these veterans,” ayon kay Orillaneda.

Kumpiyansa si Eslapor na mahahasa sila sa nakaharap na Chinese players sa torneo na itinaguyod din ng Nuvali, Ayala Land, Philippine Sports Commission, Philippine Olympic Committee, City of Santa Rosa, One Sports Plus, Pilipinas Live, Asian Volleyball Confederation at ng Philippine National Volleyball Federation.

“We played with nothing to lose, everything to gain. The important thing was we did out best because we were given an opportunity to face players of their level,” saad ni Eslapor.

Brilyo ang naging laro ng 18-year-old na si Progella at ng19-year-old na si Pagara pero malakas ang kontrol ng Chinese six-footers sa 31-minuto na hampasan match sa torneo na itinaguyod ng Philippine National Volleyball Federation at ng Asian Volleyball Confederation ni Ramon “Tats” Suzara.

Progella, Pagara, Eslapor at Orillaneda, wagi sa Asian Volleyball

ni MC @Sports News | Nov. 7, 2024

Photo: Si Khylem Progella ng Philippines laban sa Australia sa Asian Beach Volleyball Championship-Philippines vs. Australia.

Bumanat ang Alas Pilipinas ng dalawang panalo sa women’s division ng Asian Senior Beach Volleyball Championships pool sa Nuvali Sand Courts sa City of Santa Rosa.

Nanaig sina Pinay bets Khylem Progella at Sofiah Pagara kina Shauna Polley at Olivia MacDonald ng New Zealand, 21-19, 21-18, sa Pool E play ng event na pinangangasiwaan ng Philippine National Volleyball Federation (PNVF).

Tinalo rin nina Gen Eslapor at Kly Orillaneda sina Yekaterina Ryukhova at Anastassiya Ukolova ng Kazakhstan, 21-19, 21-13, sa Pool F sa torneong may basbas ng Asian Volleyball Confederation (AVC) na pinamumunuan din ni PNVF president Ramon “Tats” Suzara.

Hindi naman nakausad sina Pinoy spikers Rancel Varga at Lerry John Francisco laban kina D’Artagnan Potts at Jack Pearse ng Australia, 11-21, 16-21. Nabigo rin sina Southeast Asian Games bronze medalists Ran Abdilla at James Buytrago kina Alani Nicklin at Thomas Hartles ng New Zealand, 20-22, 19-21.

Samantala, nagsimula ang kampanya nina AVC Beach Tour Nuvali Open champions Jana Milutinovic at Stefanie Fejes ng Australia sa 21-11, 21-13 na panalo kina Japanese qualifiers Kana Motomura at Nayu Motomura.

Nanalo sina top-rated Chinese pair Wang Jingzhe at Xia Xinyi kina Indonesian qualifiers Kaize Josephine Selvina Anasthasya at Melinda Novita Sari Devi, 21-14, 21-10, sa event na suportado ng Nuvali, Ayala Land, Philippine Sports Commission, Philippine Olympic Committee, City of Santa Rosa, One Sports Plus at Pilipinas Live. Nagwagi sina Tara Phillips at Kayl Mears ng Australia kina Laura Kabulbekova at Nadezhda Ivanchenko ng Kazakhstan, 21-12, 21-13.