Permanent danger zones sa paligid ng mga bulkan, gawing national park — OCD

ni Jenny Rose Albason | June 17, 2023

Iminungkahi ng Office of Civil Defense (OCD) na gawin na lang national park ang mga permanent danger zones na nasa paligid ng mga active Philippine volcanoes, ito ay para protektahan ang mga residenteng naninirahan sa mga lugar na iyon.

Aminado si OCD Administrator Ariel Nepomuceno na tututol ang mga residenteng naninirahan sa mga permanent zones, at inaming may mga isyung maaaring lumabas ukol dito.

"Puwede bang ideklara na national park na lang iyan, hindi ba? Para bawal na talaga," ani Nepomuceno.

Giniit pa ng opisyal na nakakapagod umanong ilikas nang paulit-ulit ang mga tao na naninirahan sa paligid ng bulkan.

Ayuda sa apektado ng Mayon.. Huwag bigay nang bigay ng pera — P-BBM

ni Mylene Alfonso | June 16, 2023

Tiwala si Pangulong Ferdinand Marcos, Jr., na sapat ang pondo ng pamahalaan para tugunan ang pangangailangan ng mga residenteng apektado ng pag-aalburuto ng Bulkang Mayon sa Albay.

Ito ang tugon ni Marcos sa naging pahayag ni Albay Governor Grex Lagman na kailangan ang P166.7 milyong pondo sa loob ng 90 araw ang mga Mayon evacuees.

"Whatever is needed, we will have to provide. Hindi naman… Marami naman tumutulong, marami namang ahensya. All agencies are already engaged in the rehabilitation effort, in the support for the evacuees,” sabi ni Marcos.

Kasabay nito, inatasan ng Pangulo ang iba't ibang tanggapan ng pamahalaan na pag-aralan ang pamimigay ng ayuda.

"I think in terms of the actual na gastos na ano, palagay ko, alam ko naman may budget tayo d'yan, pero ang instruction ko sa kanila, pag-aralan n'yong mabuti, hindi ‘yung basta kayo bigay nang bigay ng pera, kailangan tingnan n'yo ano ba ang problema para maayos natin kung ano ang problema nila,” dagdag pa ng Pangulo.

Bulkang Mayon naglabas ng lava

ni Mai Ancheta | June 13, 2023

Nagpatikim ang Bulkang Mayon sa pamamagitan ng effusive eruption o pagdaloy ng lava nitong Linggo ng gabi.

Ayon kay Philippine Volcanology and Seismology (Phivolcs) Officer-in-Charge Dr. Teresito Bacolcol, pasado alas-7 ng gabi nitong Linggo nang makita ang pagdaloy ng lava mula sa isang bahagi ng Bulkang Mayon.

Ang effusive eruption aniya ay ang mabagal na pagdaloy ng lava at mababa ang kasamang gas kaya dadaloy lang ito mula sa bulkan.

Sinabi ng opisyal na mas mababa ang peligro sa effusive eruption kaysa explosive eruption kaya umaasa ang Phivolcs na sana ay hindi magkaroon ng explosive eruption sa mga darating na araw.

"So hopefully, ganito lang 'yung magiging situation, hindi na ito mag-e-evolve pa into an explosive eruption," dagdag ni Bacolcol.

Nakapagtala aniya ang Phivolcs ng 21 volcanic earthquakes mula sa bulkan pero wala pang palatandaang kailangang itaas sa Alert Level 4 ang sitwasyon sa Mayon.

Samantala, pinalawig ng Albay provincial government sa pitong kilometro ang danger zone sa Bulkang Mayon mula sa dating six kilometers dahil sa tumataas na naitalang aktibidad nito.

Batay sa abisong inilabas ni Albay Governor Edcel Greco Lagman, pinaghahanda ang lahat ng residenteng nasa seven-kilometer status para mailikas agad kapag lumala ang pag-alburoto ng Mayon.

Hangad aniya ng provincial government na matiyak ang zero casualties para masiguro ang kaligtasan ng lahat.

Mahigit 14,000 na residente na ang nailikas na sa mas ligtas na lugar dahil sa patuloy na ipinakikitang abnormal na aktibidad ng bulkan