Mayon, lalong nag-alburoto

ni Eli San Miguel - Trainee @News | October 28, 2023

Nakapagtala ang Mayon Volcano Network ng mas mataas na seismic activities mula 99 pataas sa 111 volcanic earthquakes, kung saan 109 sa mga ito ang volcanic tremors na tumatagal sa isa hanggang 27 minuto.

Ayon sa Philippine Institute of Volcanology and Seismology (Phivolcs), mayroong isang insidente ng pyroclastic density current (PDC) at 122 rockfall na naobserbahan.

Patuloy naman ang pag-agos ng lava sa may habang humigit-kumulang na 3.4 kilometro sa Bonga, 2.8 kilometro sa Mi-isi, at 1.1 kilometro sa Basud Gullies.

Samantala, noong Oktubre 26, nagkaroon ng average na 1,030 toneladang volcanic sulfur dioxide (SO2) emission.

Nagbabala rin ang Phivolcs sa publiko ng posibleng hazardous eruption sa mga darating na araw o linggo, sapagkat patuloy na itinuturing na nasa Alert Level 3 ang Bulkang Mayon, na nangangahulugang "in a relatively high level of unrest" ito.

Pinapayuhan ang publiko na iwasan ang pagpunta sa loob ng 6-km radius Permanent Danger Zone (PDZ) at manatiling maingat sa mga panganib mula sa mga PDCs, lava flows, rockfalls, lahar, sediment-laden stream flow, at iba pang volcanic hazards.

Bulkang Mayon, 24 beses nagpayanig

ni Mai Ancheta | June 26, 2023

Bagama't mabagal, patuloy ang pagpaparamdam ng Bulkang Mayon ng mga aktibidad sa nakalipas na 24 oras.

Ayon sa Philippine Volcanology and Seismology (Phivolcs), nakapagtala sila ng 24 na volcanic earthquake sa nakalipas na 24 oras na sinabayan ng 257 rockfall events at 16 dome-collapse pyroclastic events na tumagal ng tatlong minuto.

Sinabi ng Phivolcs na patuloy na nagpapalabas ng lava ang bulkan at mabagal na dumadaloy ito sa Mi-isi at Bunga gullies.

Nakapagtalaga rin ang Phivolcs ng degassing activity at pagbuga ng sulfur dioxide na umaabot sa average na 663 tonelada.

Nananatiling nakataas sa alert level 3 ang bulkang Mayon.

Nakapagtala naman ang Phivolcs ng anim na pagyanig sa Taal Volcano sa Batangas na tumagal ng dalawa hanggang tatlong minuto.

2 volcanic quakes, 308 rockfall events sa Mayon

ni BRT | June 25, 2023

Dalawang volcanic earthquakes at 308 rockfall events at isang dome collapse pyroclastic density current events ang naitala sa Bulkang Mayon sa nakalipas na 24 oras.

Ayon sa Philippine Institute of Volcanology and Seismology, may mabagal na pagdaloy ng lava na may haba na 2.5 kilometro sa Mi-isi Gully at 1.8 kilometro sa Bonga Gully at pagguho ng lava hanggang 3.3 kilometro mula sa crater ng bulkan.

Nasa 744 tonelada ng sulfur dioxide naman ang ibinuga ng bulkan sa nakalipas na 24 oras.

May 600 metrong taas at katamtamang pagsingaw na napadpad sa timog-kanluran ng plume ang naitala sa bulkan. Nanatili sa Alert Level 3 ang bulkan.