90% napababa ang virus count... VCO, dagdag-gamot laban sa COVID-19 – DOST

ni Lolet Abania | October 17, 2021

Nagresulta ang isinagawang community trials ng virgin coconut oil (VCO) bilang adjunct treatment o karagdagang panggamot para sa mild COVID-19 cases, kung saan nagpakita rin ito ng significant reduction o matinding pagbawas sa coronavirus count mula sa mga pasyenteng nakabilang sa pag-aaral.

Sa isang panayam kay Department of Science and Technology Undersecretary (DOST) Rowena Guevarra, sinabi nitong lumabas sa trials na isinagawa sa isang facility sa Sta. Rosa, Laguna na napababa ng VCO ng 60 hanggang 90 porsiyento ang virus count para sa mga mild cases ng COVID-19.

“Nakita na napababa ang amount ng virus ng 60 hanggang 90% sa mild cases, and this is consistent with the community trials natin,” ani Guevarra.

Ayon pa sa opisyal, ang trials ay isinagawa na rin sa mga komunidad sa mga lungsod ng Valenzuela at Mandaluyong.

“Nakita natin sa community trials na umiikli ng about five days ‘yung paggaling ng mga pasyente,” sabi ni Guevarra.

“As with the clinical trial, which is done by the Philippine General Hospital (PGH) on mild and severe cases, the results are still being analyzed and by the end of October or early November, we will be able to report to the public the results of the trial,” dagdag pa ni kalihim.

Lagundi at VCO trials kontra-COVID-19, malapit nang ilabas

ni Lolet Abania | June 27, 2021

Posibleng sa susunod na buwan mailabas ang paunang resulta ng pag-aaral sa mga herbal medicines ng Pilipinas na lagundi at virgin coconut oil bilang potensiyal na gamot para sa mga pasyenteng may COVID-19.

“'Yung VCO at lagundi, malapit na po siguro, by next month, baka mayroong preliminary analyses kung anong sinasabi ng datos ng pag-aaral na ito,” sabi ni Dr. Jaime Montoya, director ng Department of Science and Technology-Philippine Council for Health Research and Development sa interview ngayong Linggo nang umaga.

Matatandaang sinabi ni DOST Chief Fortunato Dela Peña na ang clinical studies para sa paggamit ng VCO kontra-COVID-19 ay makukumpleto sa pagtatapos ng June habang ang clinical trials para naman sa lagundi ay nagsimula noong October ng nakaraang taon.

Ayon sa DOST, nakumpleto ang Phase 2 ng clinical trials para sa VCO noong November habang ang completion ng hospital-based clinical trials para rito ay dapat sanang matapos noong May 31.

Subalit, ayon kay Montoya, naghihintay naman ng maraming volunteers na nais lumahok sa pag-aaral sa clinical trials para sa herbal plant na tawa-tawa na panlaban sa COVID-19.

“'Yung tawa-tawa po, medyo hindi ganoon kabilis ‘yung pagkukuha ng lalahok kasi ito ay boluntaryo, so ito, matatagalan pa nang kaunti,” saad ni Montoya.

Noong 2020, sinabi ng DOST na pinag-iisipan nilang gamitin ang tawa-tawa upang madagdagan ang treatment sa mga pasyenteng infected ng COVID-19.

Noong November, ibinunyag naman ni Montoya na isinagawa na ang Phase 1 clinical trials para sa tawa-tawa.

42 pasyente, pag-eeksperimentuhan ng VCO kontra COVID-19

ni Mary Gutierrez Almirañez | May 8, 2021

Isinalang sa clinical trials ng virgin coconut oil (VCO) ang 42 pasyenteng may COVID-19 upang malaman kung epektibo itong gamot laban sa virus, ayon sa Department of Science and Technology (DOST) ngayong Mayo 8.

Anila, “Currently, the project team has screened 832 patients wherein 42 were enrolled to the study. Out of the 42 enrollees, 20 patients were under the VCO group while 22 received only the standard care.”

Matatandaang nagsimula ang trial ng VCO sa Philippine General Hospital (PGH) nu’ng nakaraang Hunyo, 2020 at inaasahang matatapos iyon ngayong buwan.

Patuloy namang pinaaalalahanan ang publiko na mag-ingat sa pag-inom ng kahit anong gamot kontra COVID-19 hangga’t hindi pa tuluyang napapatunayan ng mga eksperto ang bisa nito.

Maliban sa VCO, ilang hinihinalang gamot na rin ang isinasailalim sa clinical trials laban sa lumalaganap na pandemya.