Kahit nahuli-cam.. Ex-cop, 'di inaresto dahil wala raw baril — cyclist

ni Mylene Alfonso @News | September 6, 2023

Bagama't nakita sa viral video na nagkasa ng baril, hindi inaresto ng mga miyembro ng Quezon City Police District (QCPD) ang dating pulis na si Wilfredo Gonzales dahil hindi umano nila nakita ang baril na ginamit nito sa panunutok sa siklistang si Allan Bandiola noong Agosto 8.

Ito ang lumitaw sa isinagawang pagdinig kahapon ni Senador Ronald "Bato" dela Rosa, chairman ng Senate Committee on Public Order and Dangerous Drugs.

"Sabi ni Sir Adan, 'Hindi namin pwedeng arestuhin si Ginoong Gonzales, wala naman kaming nakitang baril' Ganito na lang, sabi niya, tatawag tayo sa traffic sector para maayos 'to at magawan ng incident report," salaysay ni Bandiola sa komite.

Ayon pa kay Dela Rosa, dapat iginiit ni Bandiola sa mga pulis na may baril si Gonzalez.

"Dapat sinumbong mo, may baril 'yan, kinasahan ako," dagdag pa ng senador na dating hepe ng PNP.

Iginiit naman umano ni Bandiola sa mga pulis na may baril si Gonzales pero sinabi ng mga pulis na rumesponde sa insidente na hindi nila ito maaaring arestuhin.

Wala naman sa naturang pagdinig ang mga sinasabing pulis ni Bandiola.

Inamin naman ni Gonzales na isinuko ang kanyang baril sa Galas Police Station matapos siyang sabihan ng mga imbestigador.

Samantala, inihayag naman ni Police Firearms and Explosives Office chief Brig. Gen. Paul Kenneth Lucas na agad naman binawi ang License To Own and Possess Firearms (LTOPF) ni Gonzales matapos mag-viral sa social media ang video ng kanyang pananakit at pagkasa ng baril kay Bandiola.

Matatandaang Agosto 8 nang mangyari ang iringan sa kalye nina Gonzales at Bandiola ngunit noong Agosto 27 lamang lumabas ang viral video na nakitang naglabas ng baril si Gonzales at ikinasa ito sa harap ni Bandiola.

Nagsampa na ng reklamong alarm and scandal ang Quezon City Police District laban kay Gonzales.

Natanggal na rin si Gonzales sa pagiging empleyado ng Korte Suprema.

Bukod dito, nais ng pamunuan ng PNP na isauli niya ang natanggap na retirement benefits matapos matuklasan na may mga kaso pa siyang kinakaharap nang umalis sa serbisyo.

0Plano rin ng PNP na sampahan pa ng ibang reklamo si Gonzales kabilang ang grave threat.

Ex-cop na nanutok ng baril sa siklista, empleyado ng SC

ni Madel Moratillo @News | August 31, 2023

Kinumpirma ng Korte Suprema na naging empleyado si Wilfredo Gonzales, ang dating pulis na nasa video na nanutok ng baril sa isang siklista.

Gayunman, ayon sa SC, agad sinibak at tinerminate ang employment ni Gonzales noong Agosto 27 matapos malaman ang insidente.

Si Gonzales ay coterminous employee umano sa tanggapan ni Associate Justice Ricardo Rosario. Binigyang-diin ng SC na hindi kukunsintihin ni Justice Rosario ang anumang uri ng karahasan o pang-aabuso.

Si Gonzales ay dati nang na-dismiss sa Philippine National Police noong June 2018 dahil sa grave misconduct.

Ex-pulis na nambatok, nagkasa ng baril sa siklista, binawian ng lisensya

ni Mai Ancheta @News | August 29, 2023

Kinumpiska ng Philippine National Police-Firearms and Explosive Office ang tatlong baril na pagmamay-ari ni Wilfredo Gonzales, ang motoristang nanakit at nagkasa ng baril sa isang siklista sa Quezon City.

Ipinakita ni PNP-FEO Director P/BGen. Kenneth Lucas sa media ang mga nakumpiskang baril ni Gonzales na kinabibilangan ng tatlong caliber 45.

Ang baril na kinasa ni Gonzales sa siklista na 9mm pistol ay idineposito sa Quezon City Police District.

Iniutos na rin aniya ni PNP Chief P/Gen. Benjamin Acorda, Jr. ang pagbawi sa mga lisensya ng baril, kabilang dito ang license to own and possess firearms at permit to carry firearms at rehistro ng baril ni Gonzales.

Si Gonzales ay dating pulis na nakatalaga sa Criminal Investigation and Detection Unit ng Quezon City Police District subalit nasibak sa serbisyo noong 2018.