JOEY, IPINASARA ANG TODAS DAHIL SA MGA LATE NA CO-STARS

ni Vinia Vivar - @Frankly Speaking | December 14, 2022

Naaliw ang lahat kay Joey de Leon sa grand media conference ng Metro Manila Film Festival 2022 na My Teacher held last Monday na ginanap sa Winford Hotel. Binanggit niya kasi ang issue ni Alex Gonzaga kay Dina Bonnevie at bale ba ay katabi pa niya ang kapatid nitong si Toni Gonzaga na isa rin sa mga bida ng pelikula at the same time ay producer.

Isa sa mga naitanong kay Joey ay kung ano ang worst and best thing of being an actor in the industry. “Pinakamasarap na trabaho, eh,” sey ni Joey. “Huwag na ‘yung sikat ka, huwag na ‘yung malaki ang kita mo, marami kang nami-meet na mga idols mo at mga tao.”

Ang worst thing daw para sa kanya ay kapag nga may mga nale-late sa oras na katrabaho. At dito na nga niya nabanggit ang insidente nina Alex at Dina kung saan nga diumano’y tinalakan ng huli ang una dahil late ito sa taping ng pinagsamahan nilang teleserye.

“Sa akin, ‘yung sa time, eh, sabi nga nila, nang-aaway sila pag may nale-late,” aniya sabay-tingin kay Toni, “'yung kapatid mo, nabasa ko na naman. Luma na nga, eh. Si Mareng Dina.”

Napangiti na lang si Toni.

“Pinag-umpisahan nu’n, sa time, ‘di ba?” sey pa ni Joey.

Magaan pa nga raw ang ginawa ni Dina dahil siya raw, 'pag may nale-late ay nagwo-walkout siya.

“Sabi ko, ‘Wala ‘yan.’ Ako, matindi ako, 'pag may nale-late, nilalayasan ko ‘yung show,

ipinapasara ko,” aniya.

Ikinuwento niya ang dati niyang show na T.O.D.A.S. sa Channel 13 na natigil daw dahil sa

kanya.

“Nagalit ako dahil na-late ‘yung ibang cast. Sabi ko, ‘Tigilan na natin ‘to.’ Napatigil ko ‘yung show, wala silang magawa. Sabi ko, ‘Kaya wala ‘yan,’ ‘yang mga away-away na ‘yan sa late, nangyayari talaga ‘yan,” tsika ni Joey.

Ang importante raw ay mag-abiso lang kung male-late dahil may cellphone naman.

“At saka, ang importante, ‘yung time. On time ka dapat. ‘Wag mong sayangin ang oras mo at nu’ng iba,” payo pa ni Joey.

Samantala, after so many years ay balik-pelikula si Joey. Hindi na nga raw siya gumagawa ng pelikula dahil semi-retired na siya, pero pumayag siya sa My Teacher dahil nagustuhan daw niya ang kuwento na si Toni pa ang sumulat.

Bukod dito, alam daw niyang walang MMFF entry ang kaibigan niyang si Vic Sotto kaya hindi na siya nag-alangan na tanggapin ito. If ever daw na mayroon ay tatanggihan niya ito.

Mula sa direksiyon ni Paul Soriano, kasama rin nina Toni and Joey sa My Teacher ang magka-love team on and off cam na sina Loisa Andalio at Ronnie Alonte, Carmi Martin at marami pang iba, showing na this Dec. 25.

3 months lang nagsama… FINAL ANSWER: CARLA, IPAPA-ANNUL NA ANG KASAL NILA NI TOM

ni Vinia Vivar - @Frankly Speaking | May 29, 2022

Ibinalita ng veteran writer-TV host na si Cristy Fermin na naghahanda na raw si Carla Abellana ng mga papeles para sa annulment ng kasal nila ni Tom Rodriguez.

Sa kanyang online show na Showbiz Now Na ay ito ang napag-usapan nila ng kanyang mga co-hosts na sina Morly Alinio at Rommel Chika. Ayon nga kay 'Nay Cristy ay lumala na raw ang sitwasyon sa pagitan ng mag-asawang Carla at Tom.

Matatandaang tatlong buwan pa lang ikinakasal sina Tom at Carla nang umugong ang balitang hiwalay na ang mag-asawa, pero hanggang ngayon ay nananatiling tikom ang kanilang bibig.

Ang tatay ni Carla na si Rey “PJ” Abellana ang tanging nagsalita tungkol sa issue nang mainterbyu nga ni 'Nay Cristy last March kung saan ay ibinunyag nga ng aktor na nagkaroon ng one-night stand si Tom.

Pero dahil nagalit si Carla sa ama, ngayon ay ayaw na ring magsalita ni PJ.

Anyway, sa nasabing online show ay pinayuhan ni 'Nay Cristy si Carla na magsalita nang minsanan lang para naman malaman din ng publiko kung ano ba talaga ang katotohanan.

Pinaaatras tumakbo... CONG. ALFRED AT UTOL, PINADALHAN NG BALA

ni Vinia Vivar - @Frankly Speaking | May 4, 2022

Humarap sa entertainment press kahapon si Congressman Alfred Vargas at ang kapatid niyang si Konsehal PM Vargas para ipaalam ang nakakabahalang karanasan nila last Monday.

Ang magkapatid ay parehong nanunungkulan sa 5th District ng Quezon City at tumatakbo rin ngayong Halalan 2022. Dahil pangatlong termino na ni Cong. Alfred, he’s running for councilor naman at si PM naman ang tumatakbong congressman.

Ayon sa kuwento ni Konsi PM, last Monday ay nakatanggap siya sa kanilang opisina sa Novaliches ng isang package at nang buksan niya ay naglalaman ito ng dalawang bala — isa para sa kanya at isa ay para sa kanyang Kuya Alfred.

“Kami po ay nababahala sa isang insidente na nagaganap sa amin. Kahapon, eksaktong 1:17 PM, mayroong dumating sa district office, sa Novaliches District Center, isang pakete na naka-address sa akin. Ang laman ng pakete, dalawang bala ng M-16, isa para sa akin, isa para kay Kuya,” pagbabahagi ni Konsi PM.

“Maliwanag na ang intensiyon ng nagpadala ay takutin kami at ang aming pamilya. Sa mahigit isang dekada nating paglilingkod dito sa distrito, ngayon lang po ako nakatanggap ng death threat. Ngayon lang nagkaroon ng ganitong klaseng halalan – marumi, magulo at mapanganib,” patuloy niya.

Pero hindi raw nila hahayaang matinag sila ng ganitong klaseng pangyayari at tuloy na tuloy pa rin ang kanilang laban.

Ibinunyag naman ni Cong. Alfred na apat na beses na silang hinihikayat na umatras sa laban kung saan ay daan-daang milyong piso ang naging alok sa kanilang magkapatid.

“Hindi tayo magpapatinag kahit anong pananakot pa ang gawin nila sa atin,” ani Cong. Alfred.

“Ngayon ay nahaharap kami sa ganitong klase ng death threat na itinaon pa sa dulo ng kampanya. Nananawagan kami sa aming pamilya, mga kaibigan at supporters na samahan ninyo kaming maging vigilant sa lahat ng uri ng kasamaan, pananakot at pandaraya na ginagawa ng ating mga kalaban ngayong eleksiyon,” patuloy ng aktor-pulitiko.

Kitang-kita rin ang labis na pag-aalala ni Cong. Alfred para sa kapamilya kaya naman nakiusap din siya sa kanilang mga kadistrito na protektahan ang bunsong kapatid at bantayan ang boto ng bawat Novalenyo.

“Walang puwang sa District 5 ang mga nagsisiga-sigaang sindikato para makuha lang ang kanilang gusto. Habang papalapit na ang araw ng eleksiyon, samahan n’yo po kaming protektahan ang ating boto. Tumayo po tayo sa likod ni PM. Let us all stand together to protect PM and District 5,” pahayag ni Cong. Alfred.