Almost 1 yr. mula nang mamatay ang vice-mayor na BF… KATRINA, GAME PA RING MA-IN LOVE

ni Vinia Vivar @Frankly Speaking | Oct. 29, 2024

Photo: Katrina Halili - Instagram

Unti-unti nang nakaka-move on si Katrina Halili sa pagpanaw ng kanyang boyfriend na si dating Lanao Del Sur Vice-Mayor Jeremy Guiab.

Matatandaang nu'ng January, 2024 nang inanunsiyo ng aktres ang malungkot na balita tungkol sa pagpanaw ng kanyang boyfriend. Atake sa puso umano ang ikinamatay nito.

Almost one year simula nang yumao ang boyfriend, sinabi ng aktres sa Updated with Nelson Canlas na okey naman daw siya.

“So far, okey naman po ako ngayon,” aniya.

“Hindi naman ako puwedeng mag-dwell doon sa past na kasi like may anak ako, kailangan kong magtrabaho. Kung ‘di ako magtatrabaho, sino'ng bubuhay sa anak ko? Kailangan kong magpaka-strong kasi may umaasa sa ‘kin,” pahayag pa ni Katrina.

Aniya ay naging malaking tulong ang kanyang anak na si Katie noong panahong iyon para kayanin niyang magtrabaho dahil that time ay sabay daw niyang ginagawa ang Black Rider (BR) at Mommy Dearest (MD).

“Kinaya kasi kailangan,” diin ni Katrina.

Paliwanag niya, “I mean, ano’ng gagawin ko, iiyak ako nang iiyak sa bahay? Ang ginagawa ko, magte-taping ako, iho-hold ko lang ‘yung sarili ko, wala akong kakausapin, magte-taping ako. 

“After ng taping, punta ng wake. Doon ako bubuhos, naho-hold ko siya. Kaysa wala akong taping, tulala ako sa bahay, iiyak, ganyan.”

Ayon pa sa aktres, kailangan niyang tanggapin ang nangyari at alam niyang may dahilan si God kung bakit ito nangyari.

“Siyempre, baunin na lang natin kung ano ‘yung mga naiwan na magagandang memories. Ano ‘yung natutunan ko sa kanya. So, mas ‘yun ‘yung inisip ko. Ano ‘yung magagandang naiwan n’ya sa ‘kin?” sey niya.

Nang matanong kung ready na ba siya to fall in love again, aniya ay hindi niya pa masasabi ang bagay na ‘yan.

“Ayoko na lang magsalita muna kasi mas gusto kong mag-focus sa career ko. And kasi alangan namang sabihin kong hindi ako ready, tapos baka mamaya, bigla akong ma-in love.

Hindi natin masasabi kasi, ‘di ba?” sey niya.

Basta sa ngayon, ang career daw at ang kanyang anak ang focus niya.

---

PATULOY ang relief efforts ng GMA Kapuso Foundation (GMAKF) sa mga kababayang nasalanta ng Bagyong Kristine. At sa tulong ng Philippine Air Force at Malacañang ay nagawa na ring marating ng Kapuso Foundation ang ilang isolated areas na lubos na naapektuhan ng bagyo.

Noong October 26, nakapagpamahagi ng relief goods ang GMAKF sa Albay para sa tinatayang 4,000 indibidwal. 

Kinabukasan (October 27), nagtungo ang GMAKF sa Barangay Pantao sa Libon, Albay para hatiran ng tulong ang tinatayang 1,200 pamilya o 4,800 indibidwal. Isa ang barangay na ito sa mga kasalukuyang isolated places dahil sa naranasang apat na landslides. 

Sa parehong araw, nagtulung-tulong ang mga sundalo, pulis at residente ng Bula, Camarines Sur para magbigay ng relief goods sa mga apektadong pamilya. 

Nagkaroon naman ng feeding program sa Minalabac, Camarines Sur para sa 500 indibidwal. 

Samantala, ipinadala ng GMAKF ang mga donasyong pet food at vitamins sa isang animal rescue center sa Tabaco, Albay.

Tuluy-tuloy pa rin ang airlifting operations ngayong October 28 para maipamahagi pa ng GMAKF ang tatlong toneladang relief goods sa mga naninirahan sa mga liblib na lugar sa Albay. 

Naging kaagapay din ng Kapuso Foundation ang Cebu Pacific Air para makarating ang mga donasyon mula Maynila patungong Bicol International Airport sa Daraga, Albay.

Aktres, buwis-buhay sa paglambitin… OGIE, AMINADONG NANALO SA MAGPASIKAT DAHIL KAY KIM

ni Vinia Vivar @Frankly Speaking | Oct. 28, 2024

Photo: Team Ogie Kimmy Magpasikat - It's Showtime

Para kina Ogie Alcasid, Lassy and MC, si Kim Chiu ang lucky charm nila kaya nanalo sila sa Magpasikat 2024 ng It’s Showtime (IS).

Ang Fourtastic Combo nga na sina Ogie, Kim, Lassy at MC ang hinirang na champion sa Magpasikat 2024.

Kitang-kita nga ang saya sa apat nang makapanayam ng ABS-CBN after the show last Saturday. Natanong nga sila kung sino ang kanilang lucky charm at walang kagatul-gatol na sagot nina Ogie, Lassy at MC ay si Kim daw.

Pero hirit pa ni Ogie, “At si Pau (Paulo Avelino).”

Natawa naman si Kim sa sinabi ni Ogie.

“Nasama kami sa mga mahuhusay,” sey ni Lassy.

“Nakakatakot (ang) stunts pero sobrang nakakatawa ang team na ‘to kaya nakakawala ng pagod. Tamang timpla kami. Kaya itong moment na ‘to sobrang sarap sa pakiramdam,” sabi naman ni Kim na nakakabilib naman talaga ang buwis-buhay na paglalambitin.

Ayon pa sa aktres ay hindi nga raw nila inaasahang mananalo sila at tanggap na nilang talo sila. Aniya pa, ang grupo raw nila ang may pinakamaigsing oras ng preparasyon. 

“Hashtag acceptance na kami, eh,” sey ni Kimmy.

“Basta nagawa namin nang maayos ang production namin,” dagdag niya.

Ayon kay Ogie, bonus na lang daw ang panalo nila dahil ang mas importante ay naiparating nila ang mensaheng nais nilang sabihin sa manonood.

Ang tema ng Fourtastic Combo ay “Tigil, Hinga, Kalma” at ipinakita nila ang kahalagahan ng pagpapahinga at pagkalma sa gitna ng mga mabigat na pinagdaraanan.

“Nabasa ko (ang mga) comments na naintindihan nila (ang) gusto naming sabihin more than anything else. Nakuha nila,” sey ni Ogie.

---

PERSONAL na nakiramay si Senator Ramon “Bong” Revilla, Jr. sa mga kababayang namatayan at sinalanta ng Bagyong Kristine nang magtungo ito sa Naga at iba't ibang bayan sa Camarines Sur. 

Ayon kay Sen. Bong, nakikidalamhati siya sa masakit at matinding pagsubok na sinapit ng mga kababayan sa Naga. 

“Mula po sa ‘kin, kasama na ang aking pamilya, ay gusto ko pong ipaabot sa inyo ang aming mahigpit na pagyakap! Hindi po kayo nag-iisa sa mga panahon na ‘to. Kasama n’yo kaming titindig para sa inyong muling pagbangon,” ani Revilla. 

Sa buong Bicol Region, aabot sa 28 katao ang namatay habang 78 lugar ang isinailalim sa state of calamity. 

Hinimok ni Sen. Bong ang mga kababayan na sa kabila ng trahedya, huwag mawalan ng pag-asa at sama-samang bumangon. 

“Napakahirap po ng pinagdaanan ng bawat isa. Sobrang nakakahabag ng puso ang sinapit ng ating mga kababayan. Nakakalungkot. Sa totoo lang po, hindi ko lubos maisip ang tindi at hirap na nararanasan ngayon. Ang sakit isipin ang sinapit ng ating mga kababayan,” pahayag ng senador. 

Personal na nag-abot si Sen. Bong ng tulong sa mga kababayang nasalanta ng bagyo. Namahagi siya ng mga tubig, relief packs at iba pang pagkain para sa mga kababayan.

Natagalan aniya ang pagdadala ng tulong dahil marami pang kalsada at tulay ang nasıra at hindi madaanan dahil sa hagupit ni Kristine. 

“Basta tatandaan n’yo po, hindi tayo dapat mawalan ng pag-asa. Tuloy po ang buhay at hindi po kayo mag-iisa sa pagbangon at muling pagsisimula,” saad ng aktor-pulitiko.

Nanghingi ng donasyon sa mga netizens… MADIR AT MGA KAANAK NI BARBIE, NASALANTA NG BAGYO SA BICOL

ni Vinia Vivar @Frankly Speaking | Oct. 26, 2024

Photo: Barbie Imperial - IG

Labis ang pag-aalala ni Barbie Imperial sa kanyang ina at mga kamag-anak na nasa Legazpi, Albay na naapektuhan ng Bagyong Kristine.

“‘Yung iba kong mga auntie, sobrang binaha na ‘yung mga bahay nila,” kuwento niya sa recent interview.

Patuloy ng aktres, “‘Yung mom ko actually, nandoon. Mag-isa lang s’ya kaya medyo kinakabahan talaga ako for her kasi wala talaga s’yang kasama.”

Good thing ay safe naman daw ang kanyang ina, but at the same time ay nalulungkot siya sa sinapit ng kanyang mga kapwa Bicolano.

“Nagpapasalamat ako sa Diyos na okey ang nanay ko, pero of course, I feel bad for all my kababayan,” aniya.

Kaya naman isa si Barbie sa mga tumutulong mangalap ng donasyon para sa mga naapektuhan ng bagyo sa Bicol.

In her Facebook (FB) account ay ipinost ni Barbie ang halaga ng perang nalilikom na nila. 

“P81,896 na po ang nalikom naming pera para sa mga kababayan nating Bicolano,” anunsiyo ng aktres.

“Bibilhin (sic) po namin ito ng mga pagkain, bigas, de-lata, at iba pang mga pangangailangan. Magsisimula na po kaming mag-repack bukas para maiabot natin agad ang tulong. Maraming salamat po sa mga nag-donate. Diyos Mabalos!” anang aktres. 

---

SAMAHAN ang Next Gen Multimedia Star na si Shanaia Gomez na lutasin ang kababalaghang bumabalot sa pagitan ng mundong ibabaw at impiyerno sa iWantTFC horror original na The Gatekeeper, now streaming nang libre at on-demand sa iWantTFC.com.  

Sa kanyang kauna-unahang lead role, gagampanan ni Shanaia ang isang antiques dealer na si Cita Mendoza na makadidiskubre ng misteryosong aparador, na isinumpa palang magsilbing tulay patungo sa kadiliman — ngayong nagbabadya ring makawala ang mga kaluluwang uugnay din sa kanyang masalimuot na nakaraan.  

Mula sa direksiyon nina Matthew at Dean Rosen ng award-winning biopic na Quezon’s Game, ilang taon din ang inabot bago mabuo ang pelikula na kakaiba ang atake sa horror genre, tampok ang blend ng biblical elements sa Filipino folklore. 

Ani Direk Matthew sa naunang interview, “I’ve been working on it since 1984 and it took a lot of research. There’s a lot of stuff to get your head around through it. From the initial discovery that I had in the Holy Land of something mystical that happened 3,500 years ago. I have had to research it because it's not very commonly known.” 

Samantala, pinuri naman ng mga manonood ang kababalaghan factor ng pelikula, pati ang pagganap ni Shanaia sa kanyang very first lead role. 

Libreng mapapanood ang iWantTFC Original na TG sa iWantTFC.com at sa official app nito (available sa iOS at Android). 

Bukod sa TG, ipapalabas din nang libre ang ilang horror classics na swak sa panonood ngayong Undas, tampok ang sariling picks ni Shanaia gaya ng Feng Shui, Segundo Mano, Seklusyon, ‘Wag Kang Lilingon, The Ghost Bride, Shake, Rattle, Roll XV, atbp..

Mapapanood din ang iWantTFC sa mas malaking screen sa piling devices. Available na rin ang iWantTFC via Chromecast at Airplay.