Iika-ika na… MARICEL, UMAMING MAY SAKIT SA SPINE

ni Vinia Vivar @Frankly Speaking | Apr. 14, 2025

Maricel Soriano - FB

Photo: Maricel Soriano - FB

Dahil nakitang iika-ika sa ABS-CBN Ball 2025 at sa kanyang 60th birthday celebration kamakailan, ang daming nag-alala sa kalusugan ni Diamond Star Maricel Soriano.

Bukod dito ay ang dami ring espekulasyong lumabas na baka raw may malubha siyang sakit.

Kaya naman sa kanyang latest YouTube (YT) vlog ay in-address ni Maria ang kanyang health issue.

“Kasi, ‘yung spine ko, may arthritis hanggang leeg ko. Tapos nu’ng first na-experience ko ‘to, in-injection-an na ako sa likod. Tapos ‘yung sumunod, dahil hindi pa rin nawawala ‘yung pain, kasi sa side lang, eh, so, ginawa nila, mismong sa spine nila ako sinaksakan ng steroids,” pagre-reveal ni Maricel.

“Tapos, matagal bago nag-effect kaya iika-ika akong maglakad. Saka ‘yung paa ko - ang liit ng paa ko - manhid, parang may mga karayom na tumutusok na ganyan,” dagdag niya.

Bukod dito ay may pinched nerve rin daw siya o naipitan ng ugat.

Ang payo nga raw sa kanya ay magpaopera na pero sa ngayon ay tina-try pa niya ang ibang options.

“Ito namang sakit na ‘to, gumagaling naman 'to. Actually, ang sabi nga, ‘Magpaopera ka na para matapos na ‘yang sakit na ‘yan.’ Pupunta tayo doon pero kasi tinitingan namin lahat ng way kung paano, para hindi nga surgery ang mangyari. Sana, kasi ayoko,” aniya.

Paliwanag niya, “S’yempre, nakatikim na ako ng caesarean (delivery), hindi ba? Ang operation is not a joke, ‘di ba? That's why parang ako. Gusto ko rin, ma-introduce rin ako doon sa ibang anggulo, para gumaling ako.”

Sey pa niya, “Kaya ko ‘to.”

Kaya may mga physical activities daw siyang ginagawa ngayon tulad ng paglalakad sa swimming pool.

“Kailangan kong mag-walk palagi sa swimming pool. Walk with faith and confidence,” sey niya.

“Mayroon akong physical therapist talaga. Stretching, tapos hinahatak ka, hinahatak ‘yung balakang mo, paganyan. Tapos hinahatak ‘yung leeg mo paganu’n,” kuwento pa niya.

Hirit pa niya, “Dapat, gumagalaw, para hindi pumanaw,” sabay tawa.

Sinigurado naman ng Diamond Star na makakayanan niya ito sa dami ng mga pinagdaanan niya sa buhay.

Payo pa niya, “Doon po sa mga tao na may sakit din na ganito, when your body talks, you listen. Dapat ganu’n, eh. Sabi kasi nila, what you eat today will walk and talk tomorrow.”

Dagdag pa niya, “Saka ‘wag kang matatakot, nand’yan si Lord. Saka, dapat lagi nating isipin na ‘yung ibang tao, nagawan ng himala, ‘di ba? Ikaw pa ba? Eh, love ka ni God.”

May mensahe rin si Maricel sa mga nagkakalat ng kung anu-anong maling tsika sa kanyang sakit.

“Hindi natin gamitin ‘yung mga bagay na ganyan sa mga tsika lang. Gamitin natin para sa ikabubuti o may mapapala ‘yung kapwa-Pilipino natin o kapwa-tao natin. We have to be mindful and respectful,” aniya.

Inanunsiyo rin ni Maria na may gagawin siyang bagong pelikula. Excited na nga raw siya dahil after Lavender Fields (LF) ay wala na raw siyang ginagawa.

---

BALIK-SHOWBIZ ang aktor na si Mark Neumann matapos ang ilang taong pamamahinga. Kasama siya sa cast ng Beyond the Call of Duty (BTCOD) produced by Pinoyflix Films in collaboration with The Philippine National Police (PNP), Philippine Safety College, Bureau of Fire Protection (BFP), Department of the Interior and Local Government (DILG) Public Safety, and LCS GROUP/Gov. Chavit Luis Singson.

Nakausap namin ang aktor sa ginanap na storycon ng nasabing pelikula kamakailan at dito ay inamin niya ang dahilan kung bakit siya nawala pansamantala.

“I just wanted to raise my son in peace and you know, try something else as well,” pahayag ni Mark.

Ikinagulat namin ang sinabing ito ng aktor since wala namang nababalitang nag-asawa siya at nagkaroon ng anak.

Aniya ay wala raw siyang asawa at isa siyang single dad. Pero okay naman daw sila ng ina ng kanyang anak at co-parenting sila sa kanilang 6-year-old son. Non-showbiz girl daw ito at isang Cebuana.

Mga 5-6 years ding nawala si Mark sa showbiz na siya ring age ng kanyang anak. Gusto raw niyang mag-focus sa pagpapalaki ng baby niya that time kaya umalis muna siya sa showbiz.

Hindi naman daw niya itinatago ang kanyang anak at makikita sa kanyang social media accounts ang mga larawan nila.

Matatandaang produkto si Mark ng Artista Academy sa TV5 noong 2012. Marami siyang naging proyekto sa Kapatid Network at nagbida pa siya sa remake ng hit Korean drama na Baker King (BK).

Taong 2016 nang lumipat siya sa ABS-CBN at naging talent ng Star Magic.

Inamin din ng single dad na nami-miss niya ang pag-arte kaya naman nagdesisyon siya na magbalik sa showbiz nang matanggap ang offer to be part of BTCOD.

Aniya ay friend niya ang direktor ng movie na si Jose Olinares, Jr. bago pa man siya nag-lie-low.

“We had a few projects before and then, it’s just randomly like, ‘Hey, you wanna do a movie?’ and I was like, ‘Yeah, sure, why not?’” kuwento ng Fil-British actor.

Nang umalis sa showbiz si Mark ay nagtayo siya ng coffee shop sa Cebu and so far ay okay naman daw ito.

Ginagampanan ng aktor sa BTCOD ang kapatid ng karakter ni Jeffrey Santos at miyembro sila ng isang malaking sindikato.

Kasama rin sa nasabing pelikula sina Maxine Trinidad, Martin del Rosario, Paolo Gumabao, Christian Singson, Devon Seron, Martin Escudero, Migs Almendras, Simon Ibarra, Teejay Marquez, Alex Medina at marami pang iba.

Kasalukuyan nang isinu-shoot ang movie at tentative playdate nito ay ngayong Mayo.

Marjorie, sinisiraan daw… DENNIS SA MGA ANAK: PAGLAKI N’YO, I WILL TELL YOU WHAT YOUR MOM DID TO ME

ni Vinia Vivar @Frankly Speaking | Apr. 13, 2025

Dennis Padilla - Instagram

Photo: Dennis Padilla - Instagram

Punto por puntong sinagot ni Marjorie Barretto ang mga hinaing ng dating asawang si Dennis Padilla sa nangyaring kasal ng anak nilang si Claudia Barretto last Tuesday, April 8.

It’s all over town kasi ang mga rants ni Dennis kung paano raw siya itinratong visitor or guest lang sa kasal, gayung siya ang father of the bride. Ikinasama nga rin ng loob ng aktor na hindi siya ang naghatid sa altar sa anak.

Bukod sa posting sa social media ay nagpa-interview pa si Dennis kay Ogie Diaz tungkol sa kanyang sama ng loob sa nangyari.

Sa kauna-unahang pagkakataon ay bumuwelta si Marjorie at isa-isang in-address ang mga issues sa kanyang exclusive interview sa vlog ni Ogie.

Nilinaw ng dating aktres na walang nang-api kay Dennis sa kasal at ang nasabing event ay hindi tungkol sa kanila kundi sa kanilang anak na supposedly ay happiest day of her life na sinira mismo ng ama nito.

“This wedding was not about Dennis, the bride has the right to choose who will walk her down the aisle,” pahayag ni Marjorie.

Itinanggi rin niya ang hinaing ni Dennis sa panayam kay Ogie na hindi raw sinabi sa kanya beforehand na hindi siya part of the program.

Ayon kay Marjorie ay sinabi raw ni Claudia kay Dennis noong magkita ang mag-ama noong March 18 na siya lang daw mag-isa ang maglalakad sa altar at umokey naman daw ito.

Pinauupo raw si Dennis sa front row na siyang pinakaimportanteng seat sa kasalan pero mas ginusto raw nitong maupo sa pinakadulong row.

Inamin naman ni Marjorie na siyempre ay hindi sila puwedeng magtabi ni Dennis sa upuan bilang father and mother of the bride since matagal na rin silang estranged to each other, pero of course, tatay pa rin daw ito ng kanyang mga anak.

“Yes, I was seated at the front row where the mother and the father of the bride should be, and I will not say sorry for that. I raised my child single-handedly, Dennis. I was there with her. I deserved that seat in the front,” sey niya.

Sa interview ni Ogie kay Dennis ay parang kaawa-awa raw ito at malumanay na tinanong ang coordinator kung ano ang nangyari, pero hindi raw ito totoo.

“Galit siya, he was causing a commotion. Dennis, you were causing a commotion. Pagdating pa lang ni Claudia, hindi ko ‘to nakikita, all of these were told to me after the ceremony, before the reception.

“He was causing a commotion, he was pacing, walking and walking, ganu’n, complaining, tumataas ang boses mo, Dennis, they had to ask you to please lower your voice. And when you cannot be controlled, they told you ‘Can we take this outside? Can we take this discussion outside?’” kuwento ni Marjorie.

Saad pa niya, “Sino’ng mang-aapi sa kanya? We were all focused on the bride and the groom, listening to the homily of the priest. You know, sino ang nananakit sa ‘yo? Kung nale-left out ka, wala ka kasi sa buhay ng mga anak mo, eh. Mas gusto mo kasing magpa-interview, eh.”

Ipinunto rin ni Marjorie na si Dennis pa raw ang unang-unang nag-post ng kasal sa social media ranting na nabudol siya. Hiniling daw ni Claudia beforehand na huwag magpo-post ng detalye ng kasal since very private nga ito at walang nakakaalam talaga ng wedding.

Masyado raw ginawang drama ni Dennis ang kasal at naging makalat na ang kuwento gayung dapat ay ine-enjoy ni Claudia ang happiest moment na ito.

“Grabe, talagang you wanted to destroy that day for everybody. Kung naghinahon si Dennis sana, alamin n’ya muna ‘yung totoo, sana in-enjoy mo na lang, ninamnam mo na lang ‘yung kasal ng anak mo, ‘di ba? Set aside your anger for 2 days,” aniya.

Ayon pa kay Marjorie, atensiyon daw at hindi relasyon ang gusto ni Dennis sa mga anak.

Natanong naman ni Ogie kay Marjorie kung kumusta si Julia since nagkomento rin si Dennis sa post ng aktres ng words na “Kapal n’yo” na binura na rin naman ng aktor.

“How is Julia? Alam mo, Ogie, 10 years or more na ‘tong nangyayari. We know the drill – Father’s Day, birthdays, Christmases, he’ll always do something like that. Tuwing biglang may magte-text, ‘Nagpa-interview na naman ‘yung tatay n’yo, nagpa-interview.’

“Over the years, my children have become silent, it’s an eerie kind of silence, it’s a surrender kind of silence. ‘Yung parang ‘You did it again?’ ‘Yung parang disbelief na, eh,” ani Marjorie.

“So, itong wedding na ‘to, Leon is a little upset, he’s really upset. Julia is very quiet and I’m scared when they’re silent. Masyado nang malalim.

“Itong huling ginawa mo, Dennis, sobrang betrayal sa mga bata. Sobrang betrayal. Talagang ‘yung pagka-expose mo ng wedding ni Claudia, pagka-pangit ng ginawa mo, hindi mo na maibabalik.

“‘Yung ilang Father’s Day na ni-ruin mo, birthdays ng mga bata, lahat ng okasyon na ni-ruin mo for the children — next year, may Father’s Day uli, eh, next year, may birthday pa, there’s time — pero wedding, wala na, eh. No more. It’s once in a lifetime, and you made it about you, Dennis,” diin niya.

Sa nasabing panayam, for the first time ay tinalakay din ni Marjorie ang relasyon ni Dennis sa 3 nilang anak simula nang maghiwalay sila.

“Dennis and my other children have been estranged for many, many years. Bakit sila estranged? Du’n muna tayo mag-ugat. Because for the past 10 years, wala nang ginawa si Dennis kundi magpa-interview nang magpa-interview.

“Iiyak s’ya, magpapaawa s’ya and make it seem like he really misses the children and I

believe he does miss the children, but the point here is napapahiya ang mga bata, nasasaktan sila na pinag-uusapan sila sa publiko and he may make it seem like hindi niya sinisiraan pero naba-bash ang mga anak ko tuwing nagpapa-interview siya,” lahad ni Marjorie.

Paglilinaw pa niya, “Gusto ko lang klaruhin for 18 years na magkahiwalay kami, pinapalabas n’ya, ako ang nagpe-prevent na maging close s’ya sa mga anak ko. Na bine-brainwash ko ang mga anak ko laban kay Dennis, hindi totoo ‘yan, Ogie.”

Ginagawa raw ni Dennis ang paninira sa kanya sa tuwing hinihiram nito ang mga bata noong maliliit pa ang mga ito.

“God is my witness, ako ang sinisiraan n’ya sa mga anak ko. Dennis, ‘wag mo itong ide-deny ever because ang lagi mong sinasabi sa tuwing susunduin n’ya ang mga anak ko, ‘Paglaki n’yo, I will tell you what your mom did to me,’” aniya.

Sa ngayon ay wala pang pahayag si Dennis Padilla sa mga rebelasyon ni Marjorie Barretto at bukas ang aming kolum para sa kanyang panig.

Palaban talaga! IVANA, GAME IBUYANGYANG ANG KEPS SA MOVIE

ni Vinia Vivar @Frankly Speaking | Apr. 11, 2025

Photo: Ivana Alawi - Instagram

Walang pag-aalinlangang sinabi ni Ivana Alawi na willing siyang maghubad at magpakita ng private parts sa isang pelikula basta kailangan talaga sa eksena.

Sa panayam ng aktres/content creator sa Fast Talk with Boy Abunda (FTWBA) nitong nakaraang Miyerkules, naitanong sa kanya ni King of Talk Boy Abunda kung hanggang saan ang kaya niyang ipakita at willing ba siyang mag-frontal nudity sa isang pelikula?

“Baka sila, hindi nila kayanin,” tila panghahamong sambit ni Ivana.

“Oo, kung kailangan. Kung para sa trabaho at maganda naman ‘yung script at maganda ‘yung istorya, why not?” matapang niyang pahayag.

Komento naman ni Kuya Boy, “That’s how comfortable you are with your body,” sabay-tanong din kay Ivana kung ano ang insecurities nito.

Ayon naman sa aktres, na-embrace na rin niya ang lahat ng insecurities niya ngayon pero dati raw ay insecure siya sa kanyang ilong.

“Kaya nga sinasabi n’yong retoke… retoke? Insecurity ko nga ‘to. Ayan, oh,” pagpapakita niya sa kanyang ilong.

Nang tanungin kung may balak ba siyang magparetoke ng ilong, ayon kay Ivana ay wala na raw.

“Hindi na, bahala kayo, okey na ako, masaya na ako, contour-contour na lang ‘yan,” sagot ng aktres.

Inamin din niyang milyones talaga ang kinikita niya buwan-buwan bilang content creator kaya nga raw nagse-share rin siya ng kanyang blessings.

---

NATUTUWA ang Honorary President ng Federation of Filipino Chinese Chambers of Commerce & Industry, Inc. (FFCCCII) at may-ari ng Lamoiyan Corporation (maker of

Hapee toothpaste) na si Dr. Cecilio Pedro kapag napag-uusapan ang napakaraming malalaking celebrity endorsers noon ng kanilang kumpanya.

Matatandaang ilan sa mga naging endorsers ng Hapee Toothpaste ay sina Angel Locsin, Ruffa Gutierrez, Kathryn Bernardo, Kristine Hermosa, Marian Rivera, Alden Richards, Maine Mendoza, Sarah Geronimo, Maja Salvador at iba pang malalaking celebrities at personalidad.

“Halos lahat ng artista, endorsers ko,” sey ni Dr. Pedro nang makatsikahan namin sa Pandesal Forum last Tuesday sa Kamuning Bakery ni Wilson Flores.

That time ay siya pa ang in-charge sa kumpanya at siya lahat ang kumuha ng mga nasabing endorsers. Ngayon daw kasi ay ang anak na niya ang namamahala sa kumpanya at siya naman ay ine-enjoy na lang ang buhay bilang philanthropist at honorary president ng FFCCCII.

Samantala, kaabang-abang ang napakagandang project ng (FFCCCII) kaugnay ng 50th Anniversary ng Philippine-China Diplomatic Relations.

Ayon kay Dr. Pedro, dapat abangan sa June 9 ang gagawin nila sa Jones Bridge hanggang Chinatown.

“Nauna na ‘yung ginawa ni First Lady Liza Araneta-Marcos sa Pasig River Esplanade sa Intramuros. At ang second part is to beautify the Jones Bridge,” pagmamalaki ni Dr. Cecilio.

Nakita nga ang ganda ng Pasig River Esplanade nang magbigay-pugay ang Unang Ginang Liza Araneta-Marcos sa moda at pagkakayari ng Filipino na pinagtagpi para sa kapakinabangan ng mga atletang Filipino.

Dumalo ang Unang Ginang sa Gintong Sinag: Hinabi ng Lakas, Ginawa nang may Pagmamalaki, isang fundraiser fashion show sa Pasig River Esplanade sa Intramuros, Manila kamakailan.

Ang fashion show ay brainchild ng kilalang Filipino designer na si Avel Bacudio na nagtampok sa mga Olympic medalists na sina Carlos Yulo, Aira Villegas, at Nesthy Petacio.

“We will install lots of laser lights so that this coming June 9, we will start to showcase, we will show everyone that we can make Jones Bridge truly beautiful. And we can attract tourists to Jones Bridge and visit Chinatown along the way.

“We will also install lights in Chinatown, that’s part two. Hopefully tuluy-tuloy ang project including the Intramuros. So all of this will be done in celebration of our 50th Anniversary Philippine-China Diplomatic Relations,” pahayag pa ni Dr. Pedro who is also the former president of FFCCCII.

Bukod dito, kasali rin sa proyekto nila ang paglilinis ng Pasig River.

“We will clean the Pasig River. Magkakaroon na tayo ng canal tour. Hindi ba sa ibang bansa, mayroon niyan? May tour, dinner cruise, kailangan pagandahin, linisin ang Pasig River, ‘yan ang next project pa namin.

“From new bridge to Jones Bridge to MacArthur Bridge, tatlong bridges iyon. We will combine these three bridges to make it into a clean space for tourism,” anang business tycoon/philanthropist.

Nabalitaan nga rin niya na nag-shooting pala sa Jones Bridge sa Binondo sina Kim Chiu at Paulo Avelino at nakita nga sa pelikulang My Love Will Make You Disappear (MLWMYD) ang kagandahan ng lugar.

Kaya nga mas lalo pa raw nilang pagagandahin ang Jones Bridge para mas marami pang maengganyong mag-shoot at pumuntang turista as well.