MECQ sa Metro Manila, fake news — NCRPO

ni Lolet Abania | December 20, 2020

Mariing inihayag ng National Capital Region Police Office (NCRPO) ngayong Linggo na peke ang kumakalat sa social media na diumano’y memo na isasailalim ang Metro Manila sa modified enhanced community quarantine (MECQ).

Ipinunto ni NCRPO acting director Police Brig. Gen. Vicente Danao na tanging ang Inter-Agency Task Force (IATF) ang makapagdedesisyon sa quarantine classification ng isang lugar. “Actually, it is an unsigned memo. So, definitely it is not an official document. It is only the IATF ang nag-a-announce niyan,” ani Danao.

“Kung meron po tayong sasabihin, it is just a recommendation from our part. Definitely po, 'yung lumalabas na memo is a fake news,” dagdag pa niya. Ang memo umano na nakuha ng NCRPO ay tinawag nilang “covert deployment” para sa pagpapatupad ng sinasabing MECQ sa naturang rehiyon.

Kasalukuyang nasa general community quarantine hanggang December 31 ang Metro Manila. Gayunman, ayon kay Danao, ang NCRPO ay nag-deploy ng mas maraming pulis sa mga nasabing lugar upang magpatupad ng health protocols para maiwasan ang pagkalat ng COVID-19.

Bukod dito, aniya, nagdagdag sila ng kapulisan sa iba’t ibang lugar bilang hakbang ng ahensiya sa maaaring mangyaring kriminalidad at terorismo. “Medyo naghigpit tayo ng kaunti sa ating GCQ o sa ating health protocol implementation,” sabi ni Danao.

“Hindi lang po health protocol ang atin pong ini-implement diyan kundi most of the anti-criminality and especially sa anti-terrorism,” aniya pa.

Matatandaang sinabi ni Department of National Defense (DND) Sec. Delfin Lorenzana na hindi totoo ang kumakalat na ulat na isasailalim sa MECQ ang Metro Manila, gayundin sina Department of Interior and Local Government (DILG) Sec. Eduardo Año at Joint Task Force COVID Shield commander Police Lt. Gen. Cesar Hawthorne Binag na nagsasabing walang katotohanan ang mga pahayag na ito.

Sec. Ano, kinontra... Menor de edad, bawal pa rin sa mall — Danao

ni Thea Janica Teh | December 1, 2020

Bawal pa rin lumabas ng bahay at pumasok sa mga malls ang mga menor de edad sa Metro Manila sa ilalim ng general community quarantine (GCQ) kahit na sinabi na ni Interior Secretary Eduardo Año na puwede na basta’t may kasamang magulang.

Ayon kay Police Brig. Vicente Danao, ang mga authorized persons outside homes (APOR) at essential workers lamang ang maaaring lumabas at papasukin sa mga malls sa Metro Manila.

Aniya, makikipag-usap umano ito sa mga mall managers upang hindi papasukin ang mga menor de edad dahil sa panahon ngayon, mas marami umanong pumupunta sa mall upang mamili.

Ito rin umano ay para makaiwas sa pagkalat ng COVID-19. Ibinahagi rin ni Dr. Tony Leachon, dating adviser ng pandemic task force ng pamahalaan na maaaring maging “superspreaders” ng COVID-19 ang mga bata kung papayagan itong makalabas ngayong holiday.

Dagdag pa ni Danao, magtatalaga pa ng mas maraming pulis sa Divisoria at ilan pang mga malls upang mas mapahigpit ang implementasyon ng minimum health standard tulad ng physical distancing at pagsusuot ng face mask at face shield.