Vaccination site sa Manila, dinagsa dahil sa 'no vaccine, no ayuda'

ni Lolet Abania | August 5, 2021

Kinansela ni Manila Mayor Isko Moreno ang kanyang oath taking sa Aksyon Demokratiko ngayong Huwebes nang hapon matapos ang nangyari sa vaccination site sa nasabing lungsod.

“Mayor Isko Moreno Domagoso decided to put off the Aksyon oath taking which was scheduled this afternoon,” ayon sa pahayag ng kampo ni Moreno. “The chaos in some NCR vaccine centers, especially in Manila this morning, requires utmost collective attention,” dagdag pang statement.

Dumagsa ang napakaraming tao sa COVID-19 vaccination centers sa National Capital Region ngayong Huwebes bago ang pagpapatupad ng enhanced community quarantine (ECQ). Agad namang ipinakansela ng mga awtoridad ang pagbabakuna ng COVID-19 vaccine sa isang mall sa Manila na hiniling na rin ng management nito dahil napuno ng mga taong nais na magpaturok matapos kumalat ang impormasyong “no vaccine, no cash aid”.

Gayunman, agad na niresolba ito ni Moreno habang pinaimbestigahan na ng Metro Manila Development Authority at ng Department of Interior and Local Government (DILG) ang naturang insidente. Nakatakda sana ang oath taking ni Moreno kay Atty. Robbie Pierre Roco, anak ng party founder na si Senator Raul Roco.

Ang Aksyon Demokratiko ay ang partido rin ni Pasig City Mayor Vico Sotto. Sa isang liham nitong Agosto 4 na naka-address kay NUP secretary general Representative Narciso Bravo, naghain ng resignation si Moreno sa partido bilang vice-chairman for political affairs at miyembro na rin. "I am very thankful to the party for giving me the chance to serve it the best way possible," ani Moreno.

Vaccination sites, dinumog… “No vaccine, no ayuda”, fake news — MMDA

ni Lolet Abania | August 5, 2021

Mariing pinabulaanan ni Metropolitan Manila Development Authority (MMDA) Chairperson Benhur Abalos at sinabing “fake news” ang impormasyong kumakalat na ang indibidwal na hindi pa nabakunahan kontra-COVID-19 ay hindi makatatanggap ng cash aid sa ilalim ng enhanced community quarantine (ECQ).

Sa isang ceremonial event ng COVID-19 task force, binalaan ni Abalos ang sinumang nasa likod ng pagpapakalat ng maling impormasyon matapos na maraming mga tao ang nag-panic at dumagsa sa mga vaccination sites sa Metro Manila ngayong Huwebes nang umaga. “Ang sinabi po ba naman na kung wala kang bakuna ay wala kang matatanggap na ayuda. Nag-panic ang mga tao. Nagpuntahan nang umaga sa mga vaccination center. Nagkagulo,” saad ni Abalos.

Ayon kay Abalos, natanggap niya ang mga report ng naturang insidente mula sa Manila, Masinag sa Antipolo City, at Las Piñas. Babala pa ni Abalos sa pasimuno ng fake news na nag-iimbestiga na ang National Bureau of Investigation (NBI) hinggil sa insidente at titiyakin nilang papatawan ng parusa ang sinumang mahuhuling nagsagawa nito.

Ngayong Huwebes nang umaga, naiulat na nagkaroon ng mahabang pila sa maraming COVID-19 vaccination sites sa Metro Manila, isang araw bago simulan ang 2-linggong ECQ period. Sa pagpapatupad ng ECQ, ang mga low-income residents ay makatatanggap ng P1,000 hanggang P4,000 cash aid mula sa national government.

Mga manggagawa, binakunahan na

ni Ronalyn Seminiano Reonico | June 12, 2021

Sinimulan na ang pagbabakuna sa mga economic frontliners laban sa COVID-19 sa Valenzuela City ngayong Sabado.

Pahayag ni Valenzuela Mayor Rex Gatchalian, “Right now we're opening 'yung industry vaccination site namin kung saan ang mga may appointment doon, mga industriya na rito sa Valenzuela. Nag-appointment doon, hindi lang indibidwal kundi korporasyon, para sa manggagawa nila.”

Ayon kay Gatchalian sa isang teleradyo interview, tinatayang umabot na umano sa 25,000 economic frontliners ang nakapagpa-register na para mabakunahan laban sa COVID-19.

Aniya, may inilaang vaccination sites para sa mga industry workers upang hindi maapektuhan ang ongoing na vaccination program para sa priority sectors na kinabibilangan ng mga health workers, senior citizens at mga may comorbidities.

Saad pa ni Gatchalian, “Dito sa Valenzuela, ang mga factories namin, may mga 3,000 empleyado. Gusto naming nakahiwalay sila pero sabay-sabay na binabakunahan today.”