Nabakunahan sa ‘Pinas kontra-COVID, lagpas 1 million na!

ni Ronalyn Seminiano Reonico | April 12, 2021

Mahigit isang milyong katao na ang nabakunahan laban sa COVID-19, kumpirmasyon ng Malacañang ngayong Lunes.

Ayon kay Presidential Spokesperson Harry Roque, 1,007,356 na ang nakatanggap ng first dose ng bakuna at 132,288 naman ang nakatanggap na ng second dose. Sa kabuuang bilang ay umabot na sa 1,139,644 ang mga nabakunahan sa bansa.

Saad pa ni Roque, "Importanteng achievement po ito dahil lumampas na po tayo ng one million na nabakunahan."

Samantala, 70 million Pinoy ang target mabakunahan ng pamahalaan ngayong taon laban sa coronavirus. Sa bilang ng mga nabakunahan, ayon kay Roque, 965,169 doses ang naibakuna sa mga healthcare workers na nangungunang prayoridad ng pamahalaan sa isinagawang vaccination program.

Ayon din kay Roque, karamihan sa mga nabakunahan ay taga-Metro Manila na sinundan ng Central Luzon, Calabarzon, Central Visayas, Davao Region, SOCCSKSARGEN, Ilocos, Northern Mindanao, at Western Visayas regions.

Matatandaang nakatanggap ang Pilipinas ng 2.5 million COVID-19 vaccine doses mula sa Sinovac Biotech at 525,600 AstraZeneca vaccine ng COVAX Facility.

656,331, nabakunahan na kontra-COVID-19 — DOH

ni Ronalyn Seminiano Reonico | March 29, 2021

Umabot na sa 656,331 indibidwal ang nabakunahan laban sa COVID-19 base sa datos ng Department of Health (DOH).

Samantala, umabot sa 80% o 1,233,500 ng 1,525,600 doses ang naipamahagi na sa mga vaccination centers.

Ayon pa sa DOH, umabot sa 2,494 vaccination sites sa 17 rehiyon ng bansa ang nagsagawa ng pagbabakuna.

Tinatayang nasa 1.7 milyong healthcare workers naman ang target mabakunahan ng pamahalaan.

Nakatanggap na ang bansa ng 1 million doses ng Sinovac COVID-19 vaccines mula sa China bukod pa sa mga bagong dating ngayong araw.

Umabot naman sa 525,600 doses ng AstraZeneca ang natanggap ng pamahalaan mula sa COVAX Facility ng World Health Organization (WHO).

Samantala, ayon kay Health Usec. Maria Rosario Vergeire, maaantala ang pagdating ng mahigit 900,000 doses ng AstraZeneca vaccines sa bansa.

Pahayag niya, “‘Yung AstraZeneca na 979,000 (vaccine doses), ang sabi ni Sec. (Carlito) Galvez, it’s not going to happen last week or this week. Nagsabi rin naman ang WHO sa atin na there might be some delays sa pagbibigay sa atin ng COVAX Facility.

“The assurance was there na darating ito ng April or early May.”

P500-M pondo para sa makararanas ng side effects ng COVID vaccine, oks na

ni Lolet Abania | February 27, 2021

Ganap nang batas ang COVID-19 Vaccination Program Act of 2021 matapos na pirmahan ni Pangulong Rodrigo Duterte upang maipatupad ang vaccination rollout laban sa COVID-19, ayon kay Senator Bong Go.

Nakapaloob sa batas ang P500-million indemnity fund na ilalaan para sa mga indibidwal na makararanas ng masamang epekto matapos na mabakunahan ng COVID-19 vaccine.

Ayon kay Presidential Spokesperson Harry Roque, agad nang maisasagawa ang pagbabakuna kontra-coronavirus dahil dito.

"We are confident that the signing of this landmark piece of legislation would expedite the procurement and administration of vaccines for the protection against COVID-19," ani Roque.

"Indeed, we remain committed in our fight against the coronavirus pandemic and we are using necessary means, such as the enactment of this Republic Act, certified urgent by the President, as a way to start our vaccine rollout," dagdag ng kalihim.

Sa ilalim ng batas, ang Department of Health (DOH) at ang National Task Force Against COVID-19 (NTF) ang otorisado na magsagawa ng negosasyon sa pagkuha ng COVID-19 vaccines kabilang na ang mga ancillary supplies at services para sa storage, transport at distribusyon ng bakuna.

Ang indemnity fund ay gagamitin para sa kompensasyon ng mga indibidwal na makararanas ng adverse effects matapos maturukan ng COVID-19 vaccine.