Congo, naglunsad ng kauna-unahang mpox vaccination campaign

ni Eli San Miguel @Overseas News | Oct. 6, 2024

Naglunsad ang mga opisyal ng kalusugan ng Congo, ng kanilang kauna-unahang kampanya sa pagbabakuna laban sa mpox nitong Sabado upang pigilan ang lalong paglaganap ng sakit sa Democratic Republic of Congo patungo sa iba pang mga bansa sa Africa ngayong taon.

Isinagawa ang isang seremonya sa Goma, kung saan ang mga health worker ang unang tumanggap ng mga dosis ng bakuna. Nagbabala ang Ministry of Health na maliit ang saklaw ng kampanya dahil sa limitadong mga resources, na mayroong 265,000 dosis ng bakuna na kasalukuyang magagamit, bagaman may mga karagdagan pang paparating.

"The rollout of the vaccine marks an important step in limiting the spread of the virus and ensuring the safety of families and communities," pahayag ni Matshidiso Moeti, ang direktor ng World Health Organization sa Africa.

Kumakalat ang mpox sa pamamagitan ng malapitang kontak, at maaari itong maging nakamamatay sa mga bihirang pagkakataon. Karaniwan itong nagdudulot ng mga sintomas na parang trangkaso at mga pus-filled lesions sa katawan. Noong Agosto, idineklara ng World Health Organization ang outbreak bilang isang public health emergency.

77 M indibidwal, target na maturukan laban sa COVID-19 hanggang Hunyo — DOH

ni Lolet Abania | May 14, 2022

Target na ngayon ng gobyerno para sa kanilang COVID-19 vaccination program na makapagbakuna ng nasa 77 milyong indibidwal o 85% ng eligible population sa pagtatapos ng Hunyo, ayon sa Department of Health (DOH).

“Our target would be 77 million individuals by the end of June. This is 85% of our targeted eligible population which is 90 million,” ani DOH Undersecretary at spokesperson Maria Rosario Vergeire sa Laging Handa briefing ngayong Sabado.

“Currently that is our working target. We already were able to vaccinate 68.5 million Filipinos. We expect only a little number, we hope to reach them by the end of June,” dagdag ng opisyal.

Ini-report naman ni Vergeire na may 7,407 indibidwal ang nakatanggap ng COVID-19 vaccine sa mga vaccination sites malapit sa mga polling precincts noong Mayo 9, Election Day.

“This is something small kung ikukumpara natin sa pang-araw-araw nating accomplishment pero maganda na rin po kasi nakita natin na 'yung ating mga kababayan interesado at willing magpabakuna kahit na pagkatapos pa ng eleksyon na ubod ng init ng araw,” pahayag ni Vergeire.

Kaugnay nito, ang Bangsamoro Autonomous Region in Muslim Mindanao (BARMM) ay kasalukuyang nagsasagawa ng special vaccination days dahil ito sa kanilang mababang vaccination turnout. Gayundin, ang DOH ay nag-a-assist sa Quezon sa Region 4-A, at Regions 4-B, 5, 7, at 12 upang madagdagan ang antas ng pagbabakuna kontra-COVID-19 sa mga naturang lugar.

8 ospital, pilot vaccination ng edad 12-17

ni Lolet Abania | October 6, 2021

Isasagawa ang pilot vaccination ng mga kabataan na edad 12 hanggang 17-anyos na may comorbidities sa walong ospital simula Oktubre 15.

Ang mga ospital na napiling mag-administer ng COVID-19 vaccine sa mga menor-de-edad na may comorbidities ay Makati Medical Center, St. Luke’s Hospital, Philippine Children Medical Center, National Children's Hospital, Philippine Heart Center, Pasig City Children’s Hospital, Fe Del Mundo Medical Center at Philippine General Hospital.

Naglabas na rin ang Department of Health (DOH) ng list ng 11 medical conditions para maging eligible ang mga kabataan sa pagbabakuna kontra-COVID-19.

Sinabi naman ni DOH Undersecretary Maria Rosario Vergeire, ang mga bata na magpapabakuna ay kinakailangang may clearance mula sa kanilang mga doktor kasabay ng pagbibigay ng mga ito ng consent at pagsang-ayon.

Payo rin ni Vergeire sa mga magulang na i-register ang kanilang mga anak sa kanilang local government units (LGUs). Sa isang interview kay vaccine czar Carlito Galvez Jr., sinabi nitong ang mga batang edad 15 hanggang 17-anyos ang unang babakunahan laban sa COVID-19.

Ayon pa kay Galvez, sakaling walang nakita o lumabas na adverse side effects, ang inoculation program ay ipagpapatuloy naman sa ibang lugar.

“Kung magkaroon man ng mga adverse event following immunization, at least nasa loob na po ng mga ospital at mabilis na matugunan kung magkaroon man ng emergency,” paliwanag ni DOH Secretary Francisco Duque III.

Para naman sa posibleng side effects, sinabi ni DOH Undersecretary Myrna Cabotaje na ilan dito ang anaphylaxis, myocarditis, sakit ng ulo, masakit na katawan at allergies.

Gayunman, tiniyak ni Cabotaje sa publiko na mayroong guidelines para gamutin ang mga batang makararanas ng side effects.