Higit 1M COVID-19 vaccine, naiturok na sa QC

ni Ronalyn Seminiano Reonico | July 15, 2021

Umabot sa mahigit 1 million COVID-19 vaccine doses ang naiturok na sa Quezon City.

Ayon sa QC local government, umabot sa kabuuang bilang na 1,013,988 doses ang naibakuna na simula nang mag-umpisa ang vaccination rollout noong Marso hanggang noong July 13.

Sa naturang bilang, 686,311 o 40.37% ang nakatanggap ng unang dose ng bakuna habang 327,677 o 19.28% naman ang fully vaccinated na.

Samantala, paalala ng lokal na pamahalaan sa mga residenteng babakunahan ng kanilang second dose:

1. Sundin ang vaccination card para sa petsa ng second dose,

2. Bumalik sa parehong vaccination site,

3. Bumalik sa parehong oras at pumunta lang ng 15 minuto bago ang nakatakdang schedule.

Hindi na rin umano kailangang mag-book pa ng schedule para sa second dose at kailangan lamang dalhin ang vaccination card at Valid ID at sumunod sa mga ipinatutupad na health and safety protocols.

Basta nabakunahan na… Estudyante at guro sa US, oks nang 'di mag-face mask

ni Ronalyn Seminiano Reonico | July 10, 2021

Maaari nang hindi magsuot ng face mask ang mga estudyante at guro na bakunado na laban sa COVID-19 sa loob ng paaralan sa pagbabalik ng klase, ayon sa US health authorities.

Sa naunang anunsiyo ng Centers for Disease Control and Prevention (CDC) noong Mayo, saad ng ahensiya, "Indoors: Mask use is recommended for people who are not fully vaccinated, including students, teachers, and staff."

Samantala, sa updated guidance, ayon sa CDC, malaya na ang mga paaralan na sundin o hindi ang naunang anunsiyo.

Saad pa ng ahensiya, "Based on the needs of the community, school administrators may opt to make mask use universally required (i.e., required regardless of vaccination status) in the school.”

2.8 M Pinoy, fully vaccinated na kontra-COVID-19

ni Lolet Abania | July 5, 2021

Umabot na sa mahigit 2.8 milyong indibidwal ang naitalang nakatanggap ng kumpletong dalawang doses ng bakuna hanggang nu'ng Hulyo 4 matapos ang higit na apat na buwan mula nang simulan ng bansa ang vaccination program kontra-COVID-19.

Batay sa latest bulletin ng National Task Force Against COVID-19, umabot sa 11,708,029 doses ng COVID-19 vaccines na ang kanilang na-administer mula sa 1,197 vaccination sites sa buong bansa.

Ayon din sa NTF, noong nakaraang linggo, humigit-kumulang sa 254,141 doses kada araw ang nabigyan nila ng COVID vaccines.

Nasa kabuuang 8,839,124 katao ang nakatanggap ng unang dose ng COVID-19 vaccine habang 2,868,905 indibidwal ang fully vaccinated na matapos na makumpleto ang dalawang doses ng bakuna.

Kabilang sa mga nabakunahang indibidwal ng unang dose ay nasa mahigit 1.7 milyon na mga health workers, 2.5 milyong senior citizens, 2.9 milyon na persons with comorbidities, 1.3 milyon na mga essential workers at 256,431 na mga indigents.

Habang ang mga fully vaccinated na Pinoy ay nasa mahigit sa 1.1 milyon na mga health workers, 788,630 mga senior citizens, 897,719 persons with comorbidities, 26,109 mga essential workers, at 227 mga indigents.

Target ng pamahalaan na tapusing mabakunahan kontra-COVID-19 ang 50 milyon hanggang 70 milyong indibidwal ngayong taon.

“The government is urging eligible populations belonging to priority groups A1 to A5 to register with their local government units, get vaccinated, and complete the required number of doses as scheduled,” pahayag ng task force.

“Regardless of vaccination status, everyone is urged to continue practicing the minimum public health standards as you may still get infected with COVID-19 and infect other people,” dagdag ng NTF.