5 Nagkalat ng fake news na 'no vaccine, no ayuda', kinasuhan

ni Lolet Abania | August 9, 2021

Sinampahan ng kaso ng mga awtoridad ang limang indibidwal na nagpakalat umano ng fake news hinggil sa COVID-19 vaccination program ng gobyerno, ayon sa Malacañang.

Isinisi naman ng mga opisyal ng gobyerno ang maling impormasyon na natanggap, na ang mga unvaccinated ay hindi bibigyan ng cash aid sa ilalim ng enhanced community quarantine (ECQ), kaya dinumog ng mga tao ang ilang vaccination sites sa Manila at Las Piñas sa Metro Manila at sa Antipolo City sa Rizal.

“The police has said that cases have been filed against five people for unlawful utterances,” ani Presidential Spokesperson Harry Roque sa press briefing ngayong Lunes, batay sa impormasyong ibinigay sa kanila ng Philippine National Police-Directorate for Investigation and Detective Management (PNP-DIDM).

Matatandaang isinailalim ang Metro Manila sa ECQ, ang pinakamahigpit na quarantine level, na nagsimula noong Agosto 6 hanggang 20 para maiwasan ang pagkalat pa ng mas nakahahawang Delta COVID-19 variant.

Noong Hulyo 28, nagbigay naman ng direktiba si Pangulong Rodrigo Duterte sa mga pulis at barangay officials na huwag payagan ang mga hindi pa bakunado na gumala-gala sa kalsada upang maiwasan ang pagkalat ng virus.

Gayunman, nabanggit ni Roque na ayon kay Pangulong Duterte, hindi na dapat sisihin ang mga dumagsang indibidwal na nagtungo sa mga vaccination centers sa Metro Manila.

Turistang 'di bakunado, bawal sa Canada

ni Ronalyn Seminiano Reonico | July 9, 2021

Hindi muna tatanggap ang Canada ng mga foreign tourists na hindi pa bakunado laban sa COVID-19, ayon kay Prime Minister Justin Trudeau.

Nang matanong ng mga reporter si Trudeau kung maaari bang makapasok ng bansa ang mga unvaccinated tourists, aniya, "I can tell you right now that's not going to happen for quite a while."

Gayunpaman, ayon kay Trudeau, pinag-aaralan nang payagang makapasok sa Canada ang mga fully vaccinated na laban sa COVID-19.

Aniya, "The next step we'll be looking at what measures we can allow for international travelers who are fully vaccinated.

"We will have more to say in the coming weeks."

Samantala, umabot na sa 78% ng mga edad 12 pataas sa Canada ang nakatanggap na ng unang dose ng bakuna kontra COVID-19, ayon sa health officials. Nasa 44% naman ng mga edad 12 pataas ang fully vaccinated na.

Nabakunahan na at hindi pa, paghihiwalayin

ni Lolet Abania | June 18, 2021

Iminungkahi ni Presidential Adviser for Entrepreneurship Joey Concepcion na magpatupad ng segregation o paghihiwalay ng mga nabakunahan na at hindi pa nabakunahang indibidwal sa mga establisimyento.

Sinabi ni Concepcion na kinokonsulta na nila ang mga eksperto hinggil sa usapin sa private sector sa tinatawag na ‘next normal.’

“We’ve been discussing on the idea of segregation kasi bawal na i-ban namin those who will not take the vaccine to enter an establishment,” ani Concepcion sa isang virtual interview ngayong Biyernes.

Tinukoy ni Concepcion ang naging pahayag kamakailan ni Department of Justice (DOJ) Secretary Menardo Guevarra. Aniya, dapat na magkaroon ng batas na nagbabawal umano sa mga 'di pa nabakunahan na pumasok sa mga establisimyento.

Gayunman, ayon kay Concepcion, kung ang segregation ay maipatutupad, dapat na magtakda lamang ng magkaibang oras para sa mga vaccinated at unvaccinated na indibidwal na papasok sa mga business establishments gaya ng mga sinehan at bars.

“Paano kung puwedeng segregation, sa movie time,” ani Concepcion. “Maybe those vaccinated will have a set time in the movie theater and then those that are not vaccinated will have this time,” dagdag niya.