Covid patients sa India, sa kotse na namamatay

ni Mary Gutierrez Almirañez | May 3, 2021

Nagpadala ng pandemic aid ang iba’t ibang bansa sa India upang matulungan ang healthcare system nito laban sa lumalaganap na COVID-19.

Kabilang ang United States, Russia at Britain sa mga nag-donate ng oxygen generators, face masks at mga bakuna. Nagpadala rin ang United Kingdom ng 495 oxygen concentrators, 200 ventilators at 1,000 oxygen ventilators. Ang France nama’y nagdagdag din ng 8 oxygen generator plants at 28 ventilators na donasyon sa India.

Sa huling tala, umabot na sa 19,919,715 ang kumpirmadong kaso ng COVID-19 sa India, kung saan 16,281,738 ang mga gumaling. Mahigit sampung araw na ring magkakasunod na pumapalo sa halos 300,000 ang nagpopositibo sa naturang virus.

Samantala, 218,945 naman ang iniulat na mga pumanaw sa India at dulot ng kakulangan sa libingan ay isinasagawa na nila ang mass cremation, kung saan magkakasamang sinusunog ang katawan ng mga namatay sa COVID-19.

"People are sometimes dying in front of the hospitals. They have no more oxygen. Sometimes they are dying in their cars,” paglalarawan pa ni Germany Ambassador to India Walter J. Lindner.

Sa ngayon ay tinatayang 147,727,054 na ang mga nabakuhan sa India kontra COVID-19 at karamihan sa Indian nationals ay desperado nang mabakunahan upang hindi mahawa.

2 kaso ng COVID-19 P.3 variant, naitala sa UK

ni Mary Gutierrez Almirañez | March 17, 2021

Dalawang kaso ng P.3 variant ng COVID-19 ang naitala sa United Kingdom, kung saan unang na-detect sa Central Visayas noong nakaraang buwan, ayon sa datos ng UK Health Department ngayong araw, Marso 17.

Anila, "One of the cases is linked with international travel and the other is currently under investigation. All appropriate public health interventions are being undertaken."

Nauna nang inulat na nakapasok na rin sa Japan ang P.3 variant mula sa isang biyahero galing ‘Pinas.

Giit naman ng Department of Health (DOH), ang P.3 variant ay mula sa lineage ng P.1 o ang variant na na-detect sa Brazil, kung saan idinepensang hindi ito ang variant of concerned na dapat katakutan.

Sa ngayon ay umabot na sa 98 ang aktibong kaso ng P.3 variant sa bansa. Ang naturang variant ay itinuring na mutations ng E484K at N501Y mula sa orihinal na variant ng South Africa, Brazil at UK.

Pinoy nars palit sa COVID-19 vaccine, tinanggihan ng UK

ni Lolet Abania | February 25, 2021

Sang-ayon ang Malacañang sa panukala ni Department of Labor and Employment (DOLE) Secretary Silvestre Bello III na i-deploy ang mga Pinoy health workers sa Germany at sa United Kingdom kapalit ng 600,000 COVID-19 vaccine doses na ibibigay sa 'Pinas.

Ayon kay Spokesperson Harry Roque, kahit na makakuha ng sapat na COVID-19 vaccines ang gobyerno para sa 70 milyong adult population, hindi naman makasasama kung magkakaroon pa ng dagdag na doses ang bansa.

“Wala pong inconsistencies sa mga sinabi ni Secretary Bello at [DFA] Secretary [Teddyboy] Locsin at sa sinabi ko. Nag-order po tayo ng sapat, sobra-sobra pa, 90 million, sinobrahan pa nga natin. Pero siyempre, kung mas maraming supply ang makukuha natin, bakit hindi?” ani Roque sa Palace briefing.

“This is an idea of Secretary Bello. Wine-welcome natin ito because more is better than less,” dagdag ng kalihim. Agad namang tinanggihan ng UK ang mungkahi ni Bello, kung saan ayon kay Ambassador Daniel Pruce, hindi sang-ayon ang British government sa ganu'ng klase ng kasunduan.

“I’d say we’ve got no plans to link vaccines with those conversations around the recruitment of nurses,” ani Pruce sa isang virtual chat sa mga reporters.

Ayon pa kay Pruce, mas ninanais na tulungan ng UK ang mga umuunlad na bansa na maka-access ng COVID-19 vaccines sa pamamagitan ng COVAX facility ng World Health Organization.