UAE ginawang apat at kalahating araw ang work week; weekend ginawang Sabado at Linggo

ni Jasmin Joy Evangelista | December 8, 2021

Magiging apat at kalahating araw nalang ang working week at Sabado at Linggo na ang weekends sa United Arab Emirates simula January 1, 2022.

Dati ay tuwing Biyernes at Sabado ang weekend sa UAE.

Layon daw ng four-and-a-half day work week na ma-boost ang productivity ng mga tao at ma-improve ang work-life balance.

"The UAE is the first nation in the world to introduce a national working week shorter than the global five-day week," ayon sa official news agency na WAM.

Ang UAE rin ang tanging Gulf country na may Saturday-Sunday weekend. Magsisimula ang kanilang weekend tuwing Biyernes nang tanghali, ang araw ng pagdarasal sa Muslim countries.

"The extended weekend comes as part of the UAE government's efforts to boost work-life balance and enhance social wellbeing, while increasing performance to advance the UAE's economic competitiveness,” ayon pa sa pahayag.

Travel ban sa India, UAE, atbp. bansa, extended ng July 15

ni Ronalyn Seminiano Reonico | June 29, 2021

Pinalawig pa ng pamahalaan ang ipinatutupad na travel ban sa mga biyaherong manggagaling sa India, United Arab Emirates (UAE), Pakistan, Sri Lanka at Bangladesh hanggang sa July 15 dahil sa banta ng mas nakahahawang Delta COVID-19 variant, ayon sa Malacañang ngayong Martes.

Ang Delta variant ay unang na-detect sa India.

Samantala, unang ipinatupad ang travel ban sa mga biyahero mula sa mga nabanggit na lugar noong Abril dahil sa paglobo ng kaso ng COVID-19.

Pinoy driver, wagi ng P13 M sa raffle sa Abu Dhabi

ni Lolet Abania | June 10, 2021

Isang Pilipinong delivery van driver sa isang bakeshop sa Abu Dhabi ang nagwagi ng AED1 million o tinatayang P13 milyon sa isang raffle draw.

Ayon sa lalaki, ang perang kanyang makukuha ay gagamitin niyang pambayad sa kanyang utang para makauwi na siya sa bansa at panggastos din sa pinapangarap na kasal.

“Masayang-masaya. Hindi po ako nakatulog. Tumaas pa ang blood pressure ko,” sabi ni ‘Roland’, hindi tunay na pangalan sa isang interview online.

Ayon kay Roland na tubong Pangasinan, ang kanyang live-in partner nang tatlong taon ay nagulat sa ibinalita niya.

“Number combination niya kasi ‘yun,” ani Roland, tungkol sa winning combination ng mga numero.

Kuwento ng 38-anyos na si Roland na 10 taon nang nagtatrabaho sa United Arab Emirates (UAE), una sa kanyang listahan na maisaayos ang transfer ng land title ng pamilya mula sa kanyang grandparents at mapunta sa kanyang ina.

Prayoridad din ni Roland ang maisagawa na ang dream wedding nila ng kanyang partner.

Gusto rin niyang magsimula ng pagnenegosyo gaya ng condo unit, subalit mas nais niyang pasukin ang farming at fishery.

“Mabilis maubos ang pera. Nagtitingin-tingin ako ng mabi-business kung sakaling mag-for good na,” ani Roland na balak nang umuwi at manatili sa 'Pinas.

Sinabi rin ni Roland na marami na rin siyang naipon para sa dalawang anak (isang 16-anyos at 10-anyos) sa kanyang partner.

Plano na ring mabayaran ni Roland ang lahat ng kanyang utang at makauwi na sa bansa.

“Ang dami kong mga utang sa mga kaibigan at kamag-anak sa Pilipinas. Kaya hindi ako makauwi kasi hindi makabayad. Ngayon, uumpisahan ko na silang bayaran,” sabi ni Roland.

Pangalawang OFW si Roland na nanalo sa raffle draw ng Mahzooz, ang nag-iisang weekly live draw sa naturang region na nag-aalok sa mga players ng magandang oportunidad.

Nitong May, isang 31-anyos na single mom na nagtatrabaho bilang office manager sa isang HR Consultancy ang nagwagi ng AED201,000 o katumbas na P2.63 milyon.

Sinabi ni Wendy Arroz na tubong-Cagayan Valley, gagamitin niya ang pera para bayaran ang isang housing loan na kanyang kinuha dalawang taon na ang nakararaan para sa kanyang anak na babae.

Ayon sa Mahzooz, kasama rin ni Roland na nanalo ang isang Emirati na may limang numero mula sa anim ang tumama at nagwagi ng AED1,000,000.

Ang dalawang ito ay nag-share sa AED2,000,000 para sa second prize, kung saan doubled batay ito sa Rules of Mahzooz, matapos na walang nakakuha nito sa nakaraang 26th draw.