Walang trabaho, umabot na sa 3.76 milyon

ni Ronalyn Seminiano Reonico | August 3, 2021

Bahagyang tumaas ang bilang ng mga Pinoy na walang hanapbuhay noong Hunyo na umabot sa 3.76 million kumpara sa 3.73 million noong Mayo, ayon sa tala ng Philippine Statistics Authority (PSA).

Nananatili naman sa 7.7% ang unemployment rate sa bansa, ayon sa PSA. Samantala, inaasahan na tataas pa ang bilang ng mga walang hanapbuhay ngayong buwan dahil sa ipatutupad na enhanced community quarantine (ECQ) sa Metro Manila.

Simula noong July 31 hanggang sa Agosto 5 ay isinailalim ang Metro Manila sa general community quarantine (GCQ) “with heightened restrictions” at simula naman sa August 6 hanggang sa 20 ay ipapatupad na ang enhanced community quarantine (ECQ) sa rehiyon.

3.73 milyong Pinoy, walang trabaho — PSA

ni Ronalyn Seminiano Reonico | July 1, 2021

Bumaba ang bilang ng mga Pinoy na walang trabaho ngayong Mayo, ayon sa datos ng Philippine Statistics Authority (PSA) sa isinagawang Labor Force Survey (LFS).

Ayon kay National Statistician and PSA Chief Claire Dennis Mapa, naitala ang 7.7% unemployment rate ngayong Mayo na mas mababa kumpara sa 8.7% noong Abril.

Samantala, katumbas ng 7.7% unemployment rate ang 3.73 million adult Filipinos (15 anyos pataas) na walang hanapbuhay.

Noong Abril, pumalo sa 4.14 million ang bilang ng mga walang trabaho.

4.14 M Pinoy, walang trabaho

ni Ronalyn Seminiano Reonico | June 8, 2021

Pumalo na sa 8.7% ang unemployment rate sa bansa matapos makapagtala ang Philippine Statistics Authority (PSA) ng 4.14 million Pinoy na walang trabaho noong buwan ng Abril.

Mas tumaas ang bilang ng mga walang hanapbuhay noong Abril kumpara noong March kung saan naitala ang 3.44 million jobless na mga Pinoy.

Sumipa rin sa 7.1% ang unemployment rate noong Marso, ayon sa datos ng PSA.

Samantala, matatandaang noong Abril 12 hanggang Abril 30, isinailalim ang NCR Plus na binubuo ng Metro Manila, Cavite, Laguna, Rizal, at Bulacan sa modified enhanced community quarantine (MECQ).

Mas maluwag ito kumpara noong March 29 hanggang April 11 kung saan ibinaba ang enhanced community quarantine (ECQ) sa mga nasabing lugar.

Ayon kay National Statistician Claire Dennis Mapa, ang unemployment figure noong Abril ay ang pangalawa sa pinakamataas na record. Sumunod ito sa pinakamataas na unemployment rate na 15.8% na naitala noong July, 2020.