2 Pinoy, patay sa gas explosion sa UAE

ni Ronalyn Seminiano Reonico | September 2, 2020

Kinumpirma ng Department of Foreign Affairs (DFA) na dalawa ang Pilipinong namatay nitong Lunes nang umaga sa naganap na gas explosion sa isang restaurant sa Sheikh Rashid Bin Seed Road sa Abu Dhabi, United Arab Emirates.

Ayon kay Philippine Ambassador to the UAE Hjayceelyn Quintana, nakipag-ugnayan na sila sa pamilya ng mga nasawing Pinoy upang magpaabot din ng pakikiramay. Siniguro rin ni Quintana na bibigyan ang pamilya ng mga ito ng “necessary assistance.”

Nakipag-ugnayan na rin ang Philippine Embassy sa Abu Dhabi sa mga local officials para sa mga sugatang Pinoy sa naturang insidente.

Pagsabog sa 2 resto sa UAE, maraming sugatan

ni Lolet Abania | August 31, 2020

Nag-iwan ng maraming sugatan ang dalawang magkahiwalay na pagsabog sa Abu Dhabi at sa tourism hub ng Dubai, sa United Arab Emirates, ayon sa pulisya at local media.

Sa report ng local media, isang gas cylinder ang sumabog sa Dubai restaurant bandang alas-10 ng umaga kanina, kung saan isa ang namatay.

Ayon sa Dubai Civil Defense spokesperson, nagdulot ang naturang pagsabog ng pagkasira ng ground floor ng isang gusali. Inabot ng 33 minuto bago tuluyang naapula ang sunog.

Sa Abu Dhabi, tinamaan ng pagsabog ang KFC at Hardees restaurants sa Rashid bin Saeed Street. Nadamay din ang ibang retail outlets ng siyudad, ayon sa report ng Abu Dhabi-owned newspaper na The National.

Gayunman, ayon sa Abu Dhabi police, karamihan sa mga tinamaan ng explosion ay minor at moderate injuries ang nangyari. Wala ring naitalang casualty sa pagsabog. Pina-evacuate na ang lahat ng residente ng gusali at sa kalapit na lugar.

Samantala, sa Rashid Saeed Street, na kilala rin bilang airport road ng lugar, ay inasahan ang top aides ni US President Donald Trump at Israeli Prime Minister Benjamin Netanhayu, na darating nang hapon kanina, dahil sa isang historic trip sa pagitan ng Israel at isa pang bayan ng Arab.

Dubai PBA Bubble, pinaplano nang itayo, nang alukin ng UAE

ni MC - @Sports | August 29, 2020

Nakikipag-usap na ang Philippine Basketball Assoiation (PBA) sa posibleng pagbubukas ng liga sa Dubai at target umano nitong itayo ang mala-NBA na Bubble sa Coca-Cola Arena kung saan puwedeng manatili ang mga manlalaro habang patuloy ang Philippine Cup.

Kinumpirma ito ni Commissioner Willie Marcial kung saan nagkaroon na umano sila ng meeting kay Mark Jan Kar, ang commercial director ng kilalang arena sa Dubai kung saan ginawa ang ilang mga nakaraang PBA Games.

"Nag-inquire sila tungkol sa ano ang mga kailangan kasi very willing sila to have the PBA Bubble in Dubai," anang Commissioner.

Ayon kay Marcial, nagkaroon na sila ng palitan ng email ni Kar kaugnay sa proposal.

Pero sinabi ng Commissioner na lahat ay pag-uusap lamang at masyado pa umanong maaga para sa ganoong proposal.

Inamin din ni Marcial na maraming mga tao ang nagpahayag ng interes para sa hosting ng bubble matapos ianunsiyo ng liga na balak nilang magtayo ng Bubble na kagaya nang sa NBA para sa muling pagsisimula ng liga.

Binanggit ni Marcial ang Laguna (Inspire Sports Academy), Batangas, Subic at ang Smart Araneta Coliseum na mga lugar na ikinokonsidera para sa itatayong PBA bubble.

May nag-suggest din umano na gawin ang liga sa Palawan, Baguio at Laoag na lahat ay nag-host na ng mga nakaraang laro ng All-Star Games.